ممبئی: گلوکار قاضی توقیر نے 2005 میں گائیکی کے مقبول مقابلے ’فیم گُروکل‘ جیتنے کے 21 برس بعد اپنی کامیابی کے سفر کو یاد کرتے ہوئے اعتراف کیا ہے کہ جب انہوں نے یہ مقابلہ جیتا تھا تو انہیں خود نہیں لگتا تھا کہ وہ اچھے گلوکار ہیں۔

قاضی توقیر نے رُوپ ریکھا بینرجی کے ساتھ ’فیم گُروکل‘ کا فاتح بننے کے بعد شہرت حاصل کی تھی۔ حال ہی میں ’بگ باس 20‘ کی ایک قسط میں انہوں نے 1972 کی فلم ’میرے جیون ساتھی‘ کا مقبول گیت ’او میرے دل کے چین‘ گایا جس پر دیگر شرکا نے ان کی خوب تعریف کی۔

’بگ باس‘ کی جانب سے گزشتہ ادوار کے یادگار شرکا اور لمحات پر مشتمل ایک فلم دکھائے جانے کے بعد گھر کے شرکا کو نئے ’لیگیسی روم‘ سے متعارف کرایا گیا۔ اسی دوران سب شرکا وہاں بیٹھے تھے کہ قاضی توقیر نے ’او میرے دل کے چین‘ پیش کیا۔ ان کی آواز سے متاثر ہوکر دیگر شرکا نے ان کی کارکردگی کو سراہا۔

امراپالی دوبے نے قاضی توقیر کے ’فیم گُروکل‘ کے دنوں کو یاد کرتے ہوئے کہا کہ ان کی گائیکی کی صلاحیت کے باعث پورے ملک نے انہیں ووٹ دیا تھا۔ اس پر قاضی نے مقابلے کے دوران ملنے والی عوامی حمایت کا ذکر کیا تاہم اعتراف کیا کہ اس وقت انہیں خود محسوس نہیں ہوتا تھا کہ وہ اچھی گائیکی کرتے ہیں۔ انہوں نے کہا کہ ’’لیکن میں اس وقت اچھا نہیں گاتا تھا۔‘‘

قاضی توقیر نے 2005 میں سونی ٹی وی کے ’فیم گُروکل‘ کی کامیابی کے بعد شہرت حاصل کی تھی۔ انہیں اور رُوپ ریکھا بینرجی کو 20 اکتوبر 2005 کو ناظرین کی حمایت حاصل کرنے کے بعد مقابلے کا فاتح قرار دیا گیا تھا۔

دلچسپ بات یہ ہے کہ اسی پروگرام میں نوجوان اریجیت سنگھ نے بھی حصہ لیا تھا۔ وہ اختتامی مرحلے سے قبل مقابلے سے باہر ہوگئے تھے اور چھٹی پوزیشن پر رہے تھے۔

قاضی توقیر اور اریجیت سنگھ کے درمیان برسوں بعد بھی دوستی برقرار ہے۔ قاضی اکثر اریجیت کے ساتھ اپنی تصاویر اور ویڈیوز بھی سماجی رابطے کی ویب گاہوں پر شیئر کرتے رہتے ہیں۔

’فیم گُروکل‘ کی کامیابی کے کئی برس بعد قاضی توقیر ایک مرتبہ پھر ’بگ باس 20‘ کے شرکا میں شامل ہوکر خبروں میں ہیں۔ سلمان خان کی میزبانی میں نشر ہونے والے اس مقبول پروگرام کے رواں سلسلے کا موضوع ’تتستو‘ ہے جس کے تحت شرکا کو دو زندگیاں دی گئی ہیں۔

اس ہفتے امراپالی دوبے لو گِل اریشفا خان اور کنیکا مان نامزد کیے گئے ہیں۔ ’بگ باس 20‘ جیو ہاٹ اسٹار اور کلرز ٹی وی پر نشر کیا جا رہا ہے۔