ممبئی/ آواز دی وائس
بالی ووڈ کے "مسٹر پرفیکشنسٹ" کہلائے جانے والے اداکار عامر خان ان دنوں اپنی فلم "ستارے زمین پر" کی ریلیز کو لے کر سرخیوں میں ہیں۔ وہ ان دنوں فلم کی پروموشن میں مصروف ہیں، جو کہ 20 جون کو سینما گھروں میں ریلیز ہونے والی ہے۔ یہ فلم عامر خان کی تین سال بعد اسکرین پر واپسی کا ذریعہ ہے۔ ایسے میں مداح انہیں دوبارہ پردے پر دیکھنے کے لیے بے حد پُرجوش ہیں۔
اگرچہ عامر خان کی کچھ فلمیں حالیہ برسوں میں ریلیز ہوئیں، لیکن زیادہ تر ناکام رہیں۔ ان کی آخری بڑی کامیاب فلم "دنگل" تھی، جو 2016 میں ریلیز ہوئی تھی۔ اس فلم نے نہ صرف باکس آفس پر زبردست کمائی کی تھی بلکہ عالمی سطح پر خوب تعریفیں بھی سمیٹی تھیں۔ لیکن کیا آپ جانتے ہیں کہ اس فلم کو لے کر پاکستان کی طرف سے عامر خان کے سامنے ایک شرط رکھی گئی تھی؟ جس پر عامر خان نے سخت جواب دیا تھا۔
انہوں نے اپنے فلمی کیریئر سے متعلق کئی باتیں شیئر کیں۔ اسی دوران انہوں نے فلم "دنگل" سے جُڑا ایک دلچسپ واقعہ سنایا اور بتایا کہ یہ فلم دنیا بھر میں ریلیز ہوئی، لیکن پاکستان میں اسے کیوں ریلیز نہیں کیا گیا؟
عامر خان نے بتایا کہ جب دنگل لگی تھی تو ڈزنی اس فلم کے پروڈیوسرز میں شامل تھا۔ انہوں نے بتایا کہ پاکستان کے سنسر بورڈ نے ہم سے کہا ہے کہ فلم کے آخر میں جب گیتا پھوگٹ جیتتی ہے تو ہندوستان کا ترنگا (پرچم) اوپر جاتا ہے اور ہندوستان کا قومی ترانہ بجتا ہے۔۔۔ تو پاکستان نے کہا کہ ان دونوں چیزوں کو نکال دیں، ورنہ ہم فلم پاس نہیں کریں گے۔
عامر خان کا دو ٹوک جواب
عامر خان نے اس مطالبے پر فوری ردعمل ظاہر کرتے ہوئے کہا کہ میں نے ایک سیکنڈ میں ڈزنی والوں سے کہا کہ ہماری فلم پاکستان میں ریلیز نہیں ہوگی۔ انہوں نے کہا کہ بزنس میں فرق پڑے گا، نقصان ہوگا۔ میں نے کہا کہ ایسی ہندوستانی فلم جس سے ہمارا جھنڈا نکال دیا جائے اور کوئی کہے کہ قومی ترانہ ہٹا دو… تو مجھے ایسا کاروبار نہیں چاہیے۔
فلم ’سرفروش‘ سے جڑا واقعہ بھی سنایا
عامر خان نے اسی دوران اپنی فلم "سرفروش" کا ذکر بھی کیا۔ انہوں نے بتایا کہ یہ فلم ہندوستانی سنیما کی پہلی فلم ہے جس میں کھلے عام پاکستان اور آئی ایس آئی (انٹرسروسز انٹیلیجنس) کا نام لیا گیا۔ عامر کے مطابق ماضی میں سینسر بورڈ کی ہدایت پر "پڑوسی ملک" کہا جاتا تھا، لیکن ’سرفروش‘ میں براہِ راست پاکستان کا نام لیا گیا۔
عامر نے بتایا کہ ابتداء میں پاکستان میں ’سرفروش‘ کو ریلیز کرنے کی اجازت نہیں دی جا رہی تھی۔ فلم کے ڈائریکٹر یجون میتھیو نے کہا تھا کہ پاکستانی سنسر بورڈ فلم کو پاس نہیں کرے گا۔ تو عامر نے سوال کیا کہ کیوں نہیں کرے گا؟ جب لال کرشن اڈوانی پارلیمنٹ میں کہہ سکتے ہیں کہ پاکستان غلط رویہ اختیار کر رہا ہے، آئی ایس آئی ہندوستان میں دہشتگردی پھیلا رہی ہے، تو فلم میں یہ کیوں نہیں کہہ سکتے؟
اسی دلیل کی بنیاد پر پاکستان میں سرفروش کی ریلیز کی اجازت ملی تھی۔
