ممبئی

شاہ رخ خان کو ان کے مداح کئی ناموں سے جانتے ہیں، لیکن جس نام سے انہیں سب سے زیادہ پکارا جاتا ہے وہ ہے کنگ خان۔ انہیں بالی ووڈ یعنی ہندی سنیما کا بادشاہ کہا جاتا ہے۔ تاہم تین دہائیوں پر محیط اپنے کیریئر میں انہوں نے کبھی ’کنگ‘ نام سے کوئی فلم نہیں کی۔ اب یہ کمی جلد پوری ہونے جا رہی ہے۔ بالی ووڈ کے کنگ اب بڑے پردے پر بھی کنگ بن کر جلوہ گر ہونے کے لیے تیار ہیں۔ حال ہی میں ایک انٹرویو میں شاہ رخ نے لفظ ’کنگ‘ کے بارے میں بات کرتے ہوئے بتایا کہ اس لفظ کا ان کے لیے اصل مطلب کیا ہے۔

شاہ رخ خان نے انٹرویو میں اپنے لیے استعمال ہونے والے کنگ کے خطاب پر گفتگو کی۔ انہوں نے کہا كہ کنگ کا مطلب میرے لیے کبھی طاقت نہیں رہا۔ یہ ہمیشہ ایک ذمہ داری کی طرح رہا ہے۔ ان لوگوں کے لیے جو آپ پر یقین کرتے ہیں، اور اُن کہانیوں کے لیے جنہیں آپ سنانے کا فیصلہ کرتے ہیں۔

ٹائٹل سے کوئی فرق نہیں پڑتا

شاہ رخ کا کہنا ہے کہ وقت کے ساتھ یہ احساس ہوتا ہے کہ کسی خطاب سے کوئی خاص فرق نہیں پڑتا، اصل فرق اس بات سے پڑتا ہے کہ آپ کیا کرتے ہیں۔ انہوں نے کہا كہ زندگی اور کیریئر کے اس مرحلے پر، کنگ کا ٹائٹل شناخت سے کم اور اس بات کی یاد دہانی زیادہ ہے کہ دل سے، عاجزی کے ساتھ اور مقصد کے ساتھ جینا چاہیے۔ چاہے وہ کسی ڈزنی ایڈونچر فلم کی کہانی سنانا ہو یا میری اگلی فلم کا انتخاب میرے لیے سب سے اہم یہ ہے کہ میں ایسا کام کروں جو لوگوں کو قریب لائے، انہیں کچھ محسوس کرائے اور انہیں تھوڑی خوشیاں دے۔

کنگ میں دکھائی دیں گی بیٹی سہانا

شاہ رخ خان کے لیے فلم کنگ کئی وجوہات سے خاص ہے۔ ایک تو اس کا عنوان ہی خاص ہے، اور دوسری وجہ یہ کہ اسی فلم کے ذریعے ان کی بیٹی سہانا خان بڑے پردے پر قدم رکھنے جا رہی ہیں۔ او ٹی ٹی کے ذریعے دی آرچیز سے ڈیبیو کرنے والی سہانا، فلم ’کنگ‘ میں ایک اہم کردار میں نظر آئیں گی۔ اس فلم میں ابھیشیک بچن اور دیپیکا پادوکون بھی نمایاں کردار ادا کریں گے، جبکہ فلم کی ہدایت کاری سدھارتھ آنند کر رہے ہیں۔