ممبئی (پی ٹی آئی) ‘آپریشن سندور’، ‘مشن سندور’ اور ‘سندور: دی ریونج’ جیسے فلمی عنوانات حاصل کرنے کے لیے بالی ووڈ کے فلمساز اور اداکاروں نے درخواستوں کی قطار لگا دی ہے۔ صرف دو دنوں میں 30 سے زائد درخواستیںدی جا چکی ہیں۔بھارت نے جموں و کشمیر کے پہلگام میں 26 افراد (جن میں اکثریت سیاحوں کی تھی) کے قتل عام کے دو ہفتے بعد بدھ کو علی الصبح پاکستان اور پاکستان کے زیر قبضہ کشمیر میں دہشت گرد ٹھکانوں پر ‘آپریشن سندور’ کے تحت میزائل حملے کیے تھے۔اس کارروائی کے بعد، انڈین موشن پکچر پروڈیوسرز ایسوسی ایشن(IMPPA)، انڈین فلم اینڈ ٹیلیویژن پروڈیوسرز کونسل(IFTPC)اور ویسٹرن انڈیا فلم پروڈیوسرز ایسوسی ایشن(WIFPA)کے دفاتر میں ایسے عنوانات کے لیے درخواستوں کا سیلاب آ گیا۔

IMPPA کے سیکریٹری انیل ناگراتھنے پی ٹی آئی کو بتایاکہ ان تین تنظیموں کو ‘آپریشن سندور’ سے متعلق عنوانات کے لیے ای میل کے ذریعے 30 سے زیادہ درخواستیں موصول ہوئی ہیں۔ یہ تعداد جلد 50-60 تک پہنچ جائے گی۔ یہ کوئی نیا رجحان نہیں ہے۔ زیادہ تر لوگوں نے ‘آپریشن سندور’ اور ‘مشن سندور’ کے لیے درخواست دی ہے۔انہوں نے بتایا کہ ایک شخص جتنے چاہے عنوانات کے لیے درخواست دے سکتا ہے، مگر عنوان اسی شخص کو الاٹ کیا جائے گا جس نے پہلے درخواست دی ہو۔ فلم بنانے والے ہمیشہ خبروں میں رہنے والے موضوعات کو تلاش کرتے ہیں، اور یہ معاملہ ملک کے فخر سے جڑا ہے۔ اس لیے فلمساز اس کہانی کو پردۂ اسکرین پر لانا چاہتے ہیں۔

ناگراتھ نے مزید بتایا کہ ماضی میں ’کارگل‘، ’اُڑی‘، ’کُنبھ‘جیسے موضوعات پر بھی ایسی درخواستیں دی گئی تھیں۔

درخواست دیے گئے دیگر عنوانات میں شامل ہیں

• ‘ہندوستان کا سیندور’
• ‘مشن آپریشن سیندور’
• ‘سیندور کا بدلہ’

اسی طرح پہلگام کے حملے سے متعلق بھی عنوانات کے لیے درخواستیں موصول ہوئی ہیں، جیسے۔

• ‘پہلگام: دی ٹیرر اٹیک’
• ‘پہلگام اٹیک’ وغیرہ۔

ذرائع کے مطابق 2019 کی فلم ’اُڑی: دی سرجیکل اسٹرائیک‘ کے ہدایت کار آدتیہ دھر، اداکار سنیل شیٹی، فلم ساز مدھور بھنڈارکر، ویویک اگنی ہوتری، اشوک پانڈت اور پروڈکشن ہاؤس ٹی سیریز نے بھی مذکورہ عنوانات کے لیے درخواست دی ہے۔ناگراتھ نے بتایاکہ ایک بار جب عنوان کے لیے درخواست دی جاتی ہے، توIMPPA، IFTPC، WIFPA اور پروڈیوسرز گلڈ آف انڈیا کے ارکان پر مشتمل کمیٹی فیصلہ کرتی ہے کہ عنوان کس کو دیا جائے، اور یہ مکمل طور پر پہلے درخواست دینے والے کی بنیاد پر ہوتا ہے۔ اس میں کسی قسم کی جانبداری نہیں ہوتی۔

عنوان کے اندراج کی فیس₹300 + جی ایس ٹی ہے، جب کہ ہنگامی بنیاد پر درخواست دینے کی صورت میں یہ فیس ₹3,000 + جی ایس ٹی ہو جاتی ہے۔

انہوں نے وضاحت کی کہ ایک ٹائم لائن تین سال کی ہوتی ہے۔ اگر تین سال کے اندر فلم مکمل نہیں ہوتی، تو عنوان واپس لے لیا جاتا ہے۔اس سے قبل یہ بھی خبر سامنے آئی تھی کہ ریلائنس انڈسٹریز لمیٹڈ اور پانچ دیگر اداروں نے "آپریشن سندور" کی تجارتی مارک کے طور پر رجسٹریشن کے لیے درخواست دی تھی، تاکہ اس اصطلاح کو تفریحی خدمات، آڈیو/ویڈیو مواد، فلم سازی، براہِ راست پرفارمنس، ڈیجیٹل اشاعت اور ثقافتی و کھیلوں کی سرگرمیوں میں استعمال کیا جا سکے۔

یہ درخواستیں نائس کلاسیفکیشن کی کلاس 41 کے تحت دائر کی گئی تھیں۔بعد ازاں ریلائنس انڈسٹریز لمیٹڈ نے وضاحت کی کہ یہ درخواست ایک جونیئر ملازم کی جانب سے غلطی سے بغیر اجازت دائر کی گئی تھی، جس کے بعد کمپنی نے اسے واپس لے لیا۔