پٹنہ::بالی ووڈ اداکار سنی دیول نے کہا ہے کہ وہ سمراٹ اشوک کی زندگی پر مبنی فلم بنانا چاہتے ہیں اور اگر یہ منصوبہ حقیقت کا روپ اختیار کرتا ہے تو وہ اپنے دونوں بیٹوں کرن دیول اور راجویر دیول کو بھی اس فلم کا حصہ بنا سکتے ہیں۔

پٹنہ میں اپنی آنے والی فلم "بٹوارہ 1947" کی تشہیری مہم کے دوران میڈیا سے گفتگو کرتے ہوئے سنی دیول نے کہا کہ سمراٹ اشوک کا کردار ان کے دل کے بہت قریب ہے۔ انہوں نے بتایا کہ مرحوم اداکار اور ہدایت کار راج کپور سے انہوں نے پہلی بار سمراٹ اشوک کی داستانیں سنی تھیں۔

سنی دیول نے کہا کہ ہدایت کار راج کمار سنتوشی اور چندر پرکاش دویدی دونوں انہیں سمراٹ اشوک پر مبنی فلم کی کہانی سنا چکے ہیں۔ تاہم انہوں نے واضح کیا کہ اس نوعیت کی تاریخی فلم بنانے کے لیے بہت بڑے بجٹ کی ضرورت ہوتی ہے۔

انہوں نے کہا، "سمراٹ اشوک کا موضوع میرے دل کے بہت قریب ہے۔ راج کمار سنتوشی اور چندر پرکاش دویدی دونوں نے مجھے اس کی کہانی سنائی ہے۔ لیکن ایسی فلموں کے لیے بہت زیادہ سرمایہ درکار ہوتا ہے۔ پہلے میرے پاس ایسی کامیاب فلم نہیں تھی، مگر 'غدر 2' کے بعد حالات بہتر ہوئے ہیں اور امید ہے کہ مستقبل میں مزید بہتر ہوں گے۔ میں ضرور اس موضوع پر فلم بنانا چاہوں گا۔ یہ ایک شاندار کہانی ہے۔ میرا ماننا ہے کہ اس فلم میں اپنے دونوں بیٹوں کو بھی شامل کر سکتا ہوں کیونکہ اس میں ہندوستان کی وسیع تاریخی وراثت موجود ہے۔"

سنی دیول اب فلم "بٹوارہ 1947" میں نظر آئیں گے۔ اس فلم کی ہدایت کاری راج کمار سنتوشی نے کی ہے جبکہ اسے عامر خان پروڈکشنز کے بینر تلے تیار کیا گیا ہے۔ فلم میں سنی دیول، پریتی زنٹا، شبانہ اعظمی، کرن دیول، علی فضل اور ابھیمنیو سنگھ اہم کردار ادا کر رہے ہیں۔

1947 کی تقسیم کے پس منظر میں بنائی گئی اس فلم کی کہانی ایک ایسے خاندان کے گرد گھومتی ہے جس کی زندگی فرقہ وارانہ تشدد، خوف اور جبری نقل مکانی کے باعث یکسر بدل جاتی ہے۔ فلم میں بے پناہ نقصان اور نفرت کے ماحول کے باوجود انسانیت، ہمدردی اور امید کے پیغام کو اجاگر کیا گیا ہے۔

یہ فلم 14 اگست 2026 کو دنیا بھر کے سینما گھروں میں ریلیز ہوگی۔ فلم کی موسیقی اے آر رحمان نے ترتیب دی ہے جبکہ گیت جاوید اختر نے تحریر کیے ہیں۔