سرینگر۔ وادی کشمیر میں موسم کروٹ بدل رہا ہے اور ٹھنڈی ہواوں کے جھونکے یہ کشمیر ہے کی صدائیں دے رہے ہیں ۔ جبکہ وادی ایک بڑے جشن کے لیے تیار ہے ،ایک میوزیکل نائٹ ،ایک رنگین شب ۔جب سری نگر میں ڈل جھیل کے کنارے گونجیں گی یاد رفیع میں وہ آوازیں ،جنہوں نے بالی ووڈ کو کیا ہے سحر زدہ۔ جن میں سونو نگم ہونگے مرکزی کردار ۔ ترقی کی جانب گامزن کشمیر میں سری نگر پہلی بار ایک بڑے لائیو کنسرٹ کی میزبانی کے لیے تیار ہے جس میں مشہور گلوکار سونو نگم 26 اکتوبر کو اسٹیج پر جلوہ گر ہوں گے۔ یہ تاریخی تقریب شیر کشمیر انٹرنیشنل کانفرنس سینٹر (ایس کے آئی سی سی) میں پرسکون ڈل جھیل کے کنارے منعقد کی جائے گی۔
این ڈی ٹی وی گُڈ ٹائمز کے زیرِ اہتمام یہ تقریب موسیقی، یادوں اور وراثت سے بھرپور ایک یادگار شام کا وعدہ کرتی ہے۔ اس موقع پر سونو نگم اپنے مشہور بالی وُڈ نغمے پیش کریں گے اور عظیم گلوکار محمد رفیع کو خراجِ عقیدت بھی پیش کریں گے۔ یہ وادی میں پہلا میوزیکل ایونٹ ہوگا جو 22 اپریل 2025 کو پہلگام میں ہونے والے دہشت گردانہ حملے کے بعد منعقد کیا جا رہا ہے۔
کنسرٹ سے قبل ڈل جھیل کے قریب اسٹیج کی تیاری زور و شور سے جاری ہے۔ مزدور شب و روز محنت کر کے اسٹیج کی ساخت تیار کر رہے ہیں۔ آواز اور روشنی کے آلات نصب کیے جا رہے ہیں اور سسٹم کی مکمل جانچ کی جا رہی ہے۔ کنسرٹ کے دن حتمی حفاظتی اور سسٹم ٹیسٹ کیے جائیں گے تاکہ تقریب کے آغاز سے پہلے سب کچھ درست اور محفوظ ہو۔
This is our city, our voice, our choice. See you at SKICC!
— Shah Faesal (@shahfaesal) October 24, 2025
October 26.#ndtvgoodtimesconcert@nazir_masoodipic.twitter.com/NBR4rpjJ0J
سونو نگم نے اس موقع کی اہمیت پر بات کرتے ہوئے کہا تھا کہ یہ لمحہ میرے لیے بہت خاص ہے کیونکہ ہم نے کبھی ڈل جھیل پر محمد رفیع صاحب کے 100 سالہ جشن کو نہیں منایا۔ سوچئے، ساری دنیا میرے اور میرے گرو رفیع صاحب کے تعلق کو جانتی ہے۔ اب انہی کی وراثت کو کشمیر کی سرزمین پر ڈل جھیل کے کنارے منانا ایک روحانی تجربہ ہوگا۔ میں بے صبری سے آپ سب سے ملاقات کا منتظر ہوں۔
شام کی موسیقی میں مقامی فنکار بھی شامل ہوں گے۔ سرینگر کے گلوکار قاضی توقیر، جنہوں نے 2005 میں موسیقی کے ریئلٹی شو فیم گروکل جیت کر شہرت حاصل کی، افتتاحی پرفارمنس پیش کریں گے۔ ان کے ساتھ کشمیری گلوکار، پروڈیوسر اور موسیقار روحان ملک بھی شریک ہوں گے جو اس شام کو مزید رنگین بنائیں گے۔
