.webp "ندین ایوب ۔’مس یونیورس‘ میں فلسطین کی نمائندگی کریں گی")
معروف ماڈل ندین ایوب نے اعلان کیا ہے کہ وہ رواں سال کے معروف مقابلہ حسن ’مس یونیورس‘ میں فلسطین کی نمائندگی کریں گی۔ یہ مقابلہ حسن کا 74 واں ایڈیشن ہے جو نومبر میں تھائی لینڈ کے شہر پاک کریٹ میں منعقد ہوگا۔ یہ تاریخ میں پہلا موقع ہوگا جب فلسطین سے کوئی ماڈل اس عالمی مقابلے میں شرکت کرے گی۔
ندین ایوب نے اپنے سوشل میڈیا اکاؤنٹ انسٹاگرام پر ایک پوسٹ میں لکھا کہ آج میں مس یونیورس کے اسٹیج پر صرف ایک اعزاز کے ساتھ نہیں بلکہ ایک سچائی کے ساتھ قدم رکھ رہی ہوں۔ جب فلسطین، خصوصاً غزہ، دکھ اور صدمے سے گزر رہا ہے، میں ایک ایسی قوم کی آواز بن کر سامنے آئی ہوں جو خاموش ہونے سے انکار کرتی ہے۔انہوں نے مزید کہا کہ میں ہر فلسطینی عورت اور ہر بچے کی نمائندگی کر رہی ہوں جن کی ہمت اور طاقت دنیا کے سامنے آنا ضروری ہے۔ ہمارا دکھ صرف ہمارا نہیں، ہم استقامت، امید اور اس وطن کی دھڑکن ہیں جو ہم میں زندہ ہے۔‘‘
دبئی میں مقیم ندین ایوب ایک ماڈل ہونے کے ساتھ ساتھ فٹنس کوچ اور غذائی ماہر بھی ہیں۔ انہوں نے 2022 میں فلپائن کے شہر منیلا میں ہونے والے ’مس ارتھ‘ مقابلے میں فلسطین کی نمائندگی کی اور ’مس ارتھ واٹر‘ کا اعزاز حاصل کیا۔ یہ بھی پہلا موقع تھا جب کوئی فلسطینی خاتون اس مقابلے میں شریک ہوئی۔خیال رہے کہ مس ارتھ دنیا کے چار بڑے بین الاقوامی مقابلہ حسن میں شمار کیا جاتا ہے، جن میں مس ورلڈ، مس یونیورس اور مس انٹرنیشنل بھی شامل ہیں۔ندین ایوب کو 2022 میں ’مس فلسطین‘ کا تاج پہنایا گیا تھا۔ وہ ’اولیو گرین اکیڈمی‘ کی بانی بھی ہیں، جو ایک ایسا تعلیمی ادارہ ہے جو پائیداری کو مصنوعی ذہانت کے ساتھ جوڑ کر تخلیقی مواد تیار کرنے کی تربیت فراہم کرتا ہے۔
