ممبئی/ آواز دی وائس
مسٹر پرفیکشنسٹ عامر خان کافی عرصے سے اپنے ڈریم پروجیکٹ "مہابھارت" کے بارے میں بات کرتے آئے ہیں، جسے وہ بنانا چاہتے ہیں۔ تاہم، اس منصوبے میں مسلسل تاخیر ہو رہی ہے۔ عامر جانتے ہیں کہ اس پروجیکٹ کے ساتھ بہت سی ذمہ داریاں جڑی ہوں گی، اس لیے وہ بہت محتاط ہیں کیونکہ وہ کسی کی امیدوں کو ٹوٹنے نہیں دینا چاہتے۔
حال ہی میں ایک انٹرویو کے دوران عامر خان نے تصدیق کی کہ وہ اس سال اپنے اس ڈریم پروجیکٹ پر کام شروع کرنے کے بارے میں سنجیدگی سے سوچ رہے ہیں۔ عامر خان نے انکشاف کیا کہ وہ مہابھارت میں کس کردار کو نبھانا چاہتے ہیں۔ انہوں نے کہا، کہ درحقیقت مجھے شری کرشن کا کردار بہت متاثر کرتا ہے۔ میں ان سے بہت متاثر ہوں، اس لیے یہ کردار مجھے بہت پسند ہے۔ انہوں نے مزید کہا کہ چونکہ یہ ایک بہت بڑا پروجیکٹ ہے، اس لیے میں ابھی کچھ بڑے دعوے کرنا نہیں چاہتا۔
پروجیکٹ پر مزید بات کرتے ہوئے عامر خان نے کہا کہ یہ میرا خواب ہے کہ میں مہابھارت بنا پاؤں، لیکن یہ ایک بہت مشکل خواب ہے۔ دیکھیں، مہابھارت کبھی آپ کو مایوس نہیں کرے گی، لیکن آپ مہابھارت کو مایوس کر سکتے ہیں۔ چاہے میں بناؤں یا کوئی اور... ہم چاہیں گے کہ یہ فلم ہندوستان میں بنے اور ہم دنیا کو دکھائیں کہ ہمارے پاس کیا ہے۔
قابل ذکر ہے کہ عامر خان جلد ہی اپنی نئی فلم "ستارے زمین پر" میں نظر آئیں گے، جس کا پہلا پوسٹر حال ہی میں ریلیز کیا گیا ہے۔
