نیو دہلی : جامعہ ملیہ اسلامیہ کے وائس چانسلر پروفیسر مظہر آصف اور رجسٹرار پروفیسر محمد مہتاب عالم رضوی نے کنٹرولر امتحانات کے قائم مقام پروفیسر احتشام الحق اور پراسپیکٹس ڈرافٹ کمیٹی کے اراکین کی موجودگی میں جامعہ کے اسکولوں کے داخلہ پراسپیکٹس کا اجرا کیا۔ نرسری پریپریٹری جماعت اول ششم نہم اور گیارھویں جماعت میں داخلے کے لیے آن لائن درخواستیں اب جامعہ ملیہ اسلامیہ کی ویب سائٹ پر دستیاب ہیں اور فارم بھرنے کا عمل شروع ہوچکا ہے۔

درخواست دہندگان جن میں غیر ملکی شہری اور این آر آئی امیدواروں کے بچے بھی شامل ہیں اب آن لائن درخواست دے سکتے ہیں۔ بھارتی امیدواروں کے لیے درخواست فیس پانچ سو روپے جبکہ غیر ملکی اور این آر آئی امیدواروں کے بچوں کے لیے پندرہ سو روپے مقرر کی گئی ہے۔ یہ داخلے جامعہ کے مشیر فاطمہ نرسری اسکول جامعہ مڈل اسکول جامعہ سینئر سیکنڈری اسکول سید عابد حسین سینئر سیکنڈری اسکول اور جامعہ گرلز سینئر سیکنڈری اسکول میں ہوں گے۔

ہر اسکول کے لیے تفصیلی داخلہ شیڈول جامعہ اسکول پراسپیکٹس 2026-27 میں شامل کیا گیا ہے جس میں آن لائن درخواست جمع کرنے کی آخری تاریخ دستیاب نشستوں کی تعداد قرعہ اندازی اور تحریری امتحان کی تاریخیں منتخب امیدواروں کی فہرست کی اشاعت اور کلاسوں کے آغاز کی تاریخ شامل ہے۔ درخواست دہندگان کو مشورہ دیا گیا ہے کہ درخواست دینے سے پہلے ان تمام تفصیلات کا بغور مطالعہ کریں۔

تعلیمی سال 2026-27 کے لیے ایک اہم اعلان یہ ہے کہ بھارتی طلبہ کے لیے کسی بھی جماعت یا کسی بھی اسکول میں فیس میں کوئی اضافہ نہیں کیا گیا ہے۔

اس موقع پر وائس چانسلر پروفیسر مظہر آصف نے کہا کہ یہ ایک اہم سنگ میل ہے۔ انہوں نے کہا کہ جامعہ کے اسکول ہندوستان کے تعلیمی نظام کی بنیاد اور اساس ہیں اسی لیے ہم نے اس بات کا خاص خیال رکھا ہے کہ جامعہ کے اسکول جامع اور منصفانہ رہیں اور معاشرے کے تمام طبقات خصوصاً بچیوں اور خصوصی ضرورتوں والے بچوں کی تعلیم کا اہتمام کریں۔ انہوں نے مزید کہا کہ اس تعلیمی سال سے اسکولوں کے بنیادی ڈھانچے کو بہتر بنایا جا رہا ہے تاکہ طلبہ کو جدید سہولتیں فراہم کی جا سکیں۔ خصوصی ضرورتوں والے بچوں کے لیے خصوصی اساتذہ اور خصوصی تعلیم کے شعبے سے جے آر ایف اسکالرز کی تقرری کی جا رہی ہے تاکہ شمولیاتی تعلیم کو فروغ دیا جا سکے۔ اس کے ساتھ ساتھ اسکول کے سابق طلبہ سے بھی تعاون حاصل کیا جا رہا ہے تاکہ تعلیم کے معیار کو مزید بہتر بنایا جا سکے۔ نصاب کو قومی تعلیمی پالیسی 2020 کے مطابق جدید تقاضوں سے ہم آہنگ کرتے ہوئے قدروں پر مبنی اور مہارت پر مبنی تعلیم کو شامل کیا جا رہا ہے۔

رجسٹرار پروفیسر محمد مہتاب عالم رضوی نے کمیٹی کو بروقت پراسپیکٹس کے اجرا پر مبارکباد دیتے ہوئے کہا کہ ہمیں تعلیمی سال 2026-27 کے لیے جامعہ اسکولوں کے داخلوں کے آغاز کا اعلان کرتے ہوئے خوشی محسوس ہو رہی ہے۔ انہوں نے کہا کہ جامعہ کے اسکول محض تعلیمی ادارے نہیں بلکہ اس ایک سو پانچ سالہ قدیم ادارے کی تاریخ اور وراثت کے امین ہیں۔ مشیر فاطمہ اور گرڈا فلپس بورن جیسی ممتاز شخصیات کی زندگیاں اور خدمات ہمارے اساتذہ کے لیے باعث ترغیب ہیں اور ہماری تعلیمی اقدار کی رہنمائی کرتی ہیں۔ انہوں نے کہا کہ جامعہ کے اسکولوں میں اساتذہ اس بات کو یقینی بناتے ہیں کہ طلبہ نہ صرف تعلیمی علم حاصل کریں بلکہ اپنی ثقافتی اور تاریخی وراثت سے بھی واقف ہوں۔ ہمارا مقصد ہمہ جہت طلبہ اور مستقبل کے ذمہ دار شہری تیار کرنا ہے جو قوم اور سماج کی خدمت کریں۔

ان داخلوں کی ایک نمایاں خصوصیت جماعت ششم نہم اور گیارھویں کے لیے ملٹی سٹی انٹرنس ٹیسٹ کی سہولت ہے جو دہلی لکھنؤ پٹنہ کولکاتا اور سری نگر میں منعقد کیا جائے گا۔ یہ خیال گزشتہ سال وائس چانسلر اور رجسٹرار نے پیش کیا تھا تاکہ دور دراز علاقوں کے طلبہ کے لیے جامعہ میں درخواست دینا آسان ہو اور علاقائی تنوع کے ساتھ جامعہ کے تکثیری کردار کو مزید مضبوط کیا جا سکے۔

بالک ماتا مراکز کے لیے آف لائن درخواست فارم پانچ مارچ دو ہزار چھبیس سے دستیاب ہوں گے اور فارم جمع کرنے کی آخری تاریخ بیس اپریل دو ہزار چھبیس ہوگی۔ درخواست فیس پچاس روپے مقرر کی گئی ہے۔ ان مراکز کے لیے درخواست فارم متیا محل قصاب پورہ اور بیری والا باغ سے حاصل کیے جا سکتے ہیں اور متعلقہ مراکز میں جمع کرانا ہوگا۔

کنٹرولر امتحانات کے قائم مقام پروفیسر احتشام الحق نے کہا کہ وہ اس بات کے پابند ہیں کہ داخلہ اور امتحانی عمل منصفانہ اور مقررہ وقت کے اندر مکمل کیا جائے۔ انہوں نے کہا کہ تمام داخلہ کارروائیاں جامعہ ملیہ اسلامیہ کے قوانین ضوابط اور بورڈ آف مینجمنٹ آف اسکولز کے فیصلوں کے مطابق انجام دی جا رہی ہیں تاکہ شفافیت دیانت داری اور جواب دہی کے اعلیٰ معیار کو برقرار رکھا جا سکے۔

انہوں نے وائس چانسلر اور رجسٹرار کی مسلسل سرپرستی پر ان کا شکریہ ادا کیا اور کمیٹی کے اراکین ڈینز اسکولوں کے پرنسپلز اور ڈپٹی رجسٹرار اسکولز کی کوششوں کو سراہا جن کی بدولت پراسپیکٹس کا بروقت اجرا ممکن ہو سکا۔