نئی دہلی :امریکی سفارت خانے نے کہا ہے کہ امریکہ نے انڈین طلبہ کے لیے ریکارڈ 82 ہزار ویزے جاری کیے ہیں جو دنیا میں امریکی سٹوڈنٹ ویزے حاصل کرنے والے کسی بھی ملک سے زیادہ ہیں۔
ٹوئٹر پر جاری ایک بیان میں امریکی سفارت خانے نے کہا کہ اس سے پتہ چلتا ہے کہ امریکہ انڈیا کے طلبہ کے لیے سب سے پرکشش مقام ہے۔ بیان میں مزید کہا گیا: ’اس سال انڈیا میں امریکی سفارتی مشن نے اب تک کی سب سے زیادہ تعداد میں سٹوڈنٹ ویزے جاری کیے ہیں۔ ہم دونوں ممالک میں انڈین طلبہ کی اہم شراکت کو سراہتے ہیں کیوں کہ وہ بین الاقوامی شراکت کو برقرار رکھنے اور بڑھانے کے لیے امریکی طلبہ کے ساتھ عمر بھر روابط استوار کرتے ہیں۔‘
نئی دہلی میں امریکی سفارتخانے اور چنئی، حیدرآباد، کولکتہ اور ممبئی میں چار قونصل خانوں نے مئی سے اگست تک طلبہ کے ویزا کی درخواستوں پر کارروائی کو ترجیح دی تاکہ اس بات کو یقینی بنایا جا سکے کہ زیادہ سے زیادہ اہل طلبہ اپنے مطالعے کے پروگراموں میں شامل ہو سکیں۔ امریکی سفارت خانے میں چارج ڈی افیئرز (سی ڈی اے) پیٹریشیا لاکینا نے انڈیا کی کامیابی میں امریکی مشن کو سراہتے ہوئے ٹویٹ کیا: ’میں یہ دیکھ کر خوش ہوئی کہ پچھلے سالوں میں کرونا کی وبا کی وجہ سے ہونے والی تاخیر کے بعد اتنے زیادہ طلبہ ویزے حاصل کرنے اور امریکی یونیورسٹیوں تک پہنچنے میں کامیاب ہوئے
The U.S. Mission in India has issued a record-breaking 82,000 #studentvisas in 2022 to date, higher than any other country. This shows that the U.S. remains the most sought-after country for higher education. pic.twitter.com/BBv8LZT7oo
— U.S. Embassy India (@USAndIndia) September 8, 2022
ہم نے صرف اس موسم گرما میں 82 ہزار سے زیادہ سٹوڈنٹ ویزے جاری کیے جو کہ پچھلے کسی بھی سال کے مقابلے سب سے زیادہ تعداد ہے۔‘ انڈین طلبہ امریکہ میں تعلیم حاصل کرنے والی سب سے بڑی کمیونٹی کا حصہ ہیں جو تمام بین الاقوامی طلبہ کی مجموعی تعداد کا تقریباً 20 فیصد ہیں۔ امریکی ادارے ’اوپن ڈور‘ رپورٹ کے مطابق 2020-2021 تعلیمی سال میں انڈیا سے 167,582 طلبہ امریکہ میں زیر تعلیم تھے۔