فلم کی ریلیز سے قبل ڈائریکٹر مہران امروہی  پر جوش اور پر امید ہیں ،بہرحال وہ فلمی دنیا میں کسی بھی کامیابی کے لیے اپنے اصولوں کو قربان کرنے کے حق میں  نہیں ہیں ۔ان کا کہنا ہے کہ پنی آنے والی فلم 'چڑیا' کی ریلیز کے منتظر ہیں کہا ہے کہ وہ کبھی فلم کو مارکیٹ کی مانگ کے مطابق "ریورس انجینئر" کر کے نہیں بنا سکتے۔مرحوم فلمساز کمال امروہی کے دور کے رشتہ دار، مہران امروہی نے فلم کی ریلیز سے قبل  یہ رائے ظاہر کی کہ فلمیں دل سے لکھی جانی چاہئیں، اور کہانی کو ہمیشہ مرکز میں رکھنا چاہیے۔

انہوں نے کہا کہ میں اس طرح کی فلم کبھی نہیں بنا سکتا کیونکہ میں ایک فلم کو لکھنے میں ایک سال لگاتا ہوں، مارکیٹ ایک سال میں بدل چکی ہوتی ہے، تب تک میری فلم پرانی ہو جاتی ہے۔ اس لیے میں اس طریقے سے کبھی کام نہیں کر سکتا۔ میرا پختہ یقین ہے کہ اگر مجھے فلم بنانی ہے، اگر مجھے اس کی کہانی سنانی ہے، تو میں وہی کہانی لکھوں گا، اور جیسی کہانی ہوگی، مارکیٹ کو اسی بنیاد پر طے ہونا چاہیے۔

انہوں نے مزید کہا کہ بدقسمتی سے آج صورتحال یہ ہے کہ پہلے مارکیٹ طے ہوتی ہے، پھر کہانی لکھی جاتی ہے، اور اسی وجہ سے فلمیں ایک جیسی لگتی ہیں، ایک جیسی سنائی دیتی ہیں، یا موسیقی ایک جیسا محسوس ہوتا ہے۔ اگر میں فلم بناؤں گا، تو دل سے بناؤں گا، اور اس کے بعد سوچوں گا کہ اسے مارکیٹ کیسے کرنا ہے۔ صرف تب ہی میں فلم کے ساتھ انصاف کر سکوں گا۔"

ڈائریکٹر مہران امروہی نے یہ بھی کہا کہ موجودہ وقت میں صرف چند فلمیں ہی ایسی ہوتی ہیں جو ناظرین کے دل کو چھوتی ہیں اور اپنی چھاپ چھوڑتی ہیں۔

انہوں نے کہا کہ ہماری انڈسٹری اتنی بڑی ہے، ہم سال میں 200 سے 300 فلمیں بناتے ہیں، لیکن ان میں سے صرف 5 فلمیں ہی آپ کو یاد رہتی ہیں، کیونکہ وہ ایک الگ آواز میں بنائی گئی ہوتی ہیں۔ ورنہ مارکیٹ یہ طے کرتا ہے کہ کون سا گانا ہونا چاہیے، کون سا ڈانس، یا ایکشن ہونا چاہیے۔ اگر ہم چاہتے ہیں کہ ہماری انڈسٹری پھلے پھولے، تو ہمیں اپنا کام کرنے کا طریقہ بدلنا ہوگا۔