نئی دہلی:جامعہ ملیہ اسلامیہ کا شعبۂ دندان سازی، جو جامعہ کا ایک نہایت باوقار اور معروف ذیلی شعبہ ہے، یہ اعلان کرتے ہوئے خوشی محسوس کر رہا ہے کہ اب این آر آئی/غیر ملکی طلبہ اس عظیم درسگاہ میں بیچلر آف ڈینٹل سرجری(BDS) کورس میں داخلہ حاصل کر سکتے ہیں۔ تعلیمی سال 2025-26 سے جنرل کیٹیگری میں دو نشستیں این آر آئی/غیر ملکی طلبہ کے لیے مختص کی گئی ہیں۔

جامعہ ملیہ اسلامیہ ایک تاریخی مرکزی جامعہ ہے جسے NAAC کی طرف سےA++ گریڈ دیا گیا ہے اور یہ گزشتہ تین برسوں سے نیشنل انسٹی ٹیوشنل رینکنگ فریم ورک(NIRF) کے مطابق ملک کی تیسری بہترین جامعہ کے طور پر تسلیم کی جاتی ہے۔ ملک کے بہترین اداروں میں شامل، شعبۂ دندان سازی کو NIRF 2024 میں ہندوستان کے تمام ڈینٹل کالجوں میں آٹھواں مقام حاصل ہے۔

بی ڈی ایس پروگرام اپنی سخت علمی نصاب، جدید کلینیکل تربیت، اور نہایت تجربہ کار اساتذہ کے باعث جانا جاتا ہے، اور یہاں کے تعلیمی نتائج شاندار ہیں۔ کئی طلبہ اعلیٰ تعلیم کے لیے ہندوستان اور بیرونِ ملک کے ممتاز اداروں میں گئے ہیں۔ طلبہ نے دفاعی افواج، ریاستی پبلک سروس کمیشنز میں شمولیت اختیار کی ہے، اور خود اپنی ڈینٹل کلینک بھی قائم کی ہیں۔ یہ بات بھی قابلِ ذکر ہے کہ کئی طلبہ نے بین الاقوامی لائسنسنگ امتحانات کامیابی سے پاس کیے ہیں اور مشرق وسطیٰ، آسٹریلیا، کینیڈا، برطانیہ اور امریکہ میں کلینیکل ڈینٹسٹری کے شعبے میں خدمات انجام دے رہے ہیں۔

بی ڈی ایس پروگرام پانچ سالہ کورس ہے جس میں ایک سال کی لازمی، تنخواہ یافتہ روٹری انٹرن شپ شامل ہے۔ جامعہ میں بی ڈی ایس پروگرام میں داخلہ نیشنل انٹرنس اینڈ ایلیجبیلیٹی ٹیسٹ(NEET-UG) اور میڈیکل کاؤنسلنگ کمیٹی(MCC) کی طرف سے کی جانے والی کونسلنگ کے ذریعے ہوتا ہے۔

این آر آئی کوٹے کے تحت جامعہ کے شعبۂ دندان سازی میں بی ڈی ایس پروگرام میں داخلہ لینے کے لیے امیدوار کو لازماً NEET-UG امتحان میں کامیاب ہونا ہوگا۔ این آر آئی، او سی آئی، پی آئی اوز اور غیر ملکی شہری نیٹ-یو جی کے لیے درخواست دینے کے اہل ہیں۔ امیدوار کی کم از کم عمر 17 سال ہونی چاہیے اور اس نے فزکس، کیمسٹری، بایولوجی/بایو ٹیکنالوجی اور انگریزی کے مضامین کے ساتھ 10+2 یا مساوی امتحان کامیاب کیا ہو۔ جو طلبہ 2025 میں کوالیفائنگ امتحان دے رہے ہیں، وہ بھی NEET-UG 2025 کے لیے درخواست دے سکتے ہیں۔ داخلے کے لیے زیادہ سے زیادہ عمر کی کوئی حد نہیں ہے۔

داخلے کے عمل اور فیس کے تفصیلی معلومات جامعہ کے پروسپیکٹس 2025-26 میں دستیاب ہیں۔

یہ نیا موقع این آر آئی/غیر ملکی طلبہ کو ہندوستان کے ایک اعلیٰ درجہ یافتہ ادارے میں بین الاقوامی معیار کی ڈینٹل تعلیم حاصل کرنے کا دروازہ کھولتا ہے۔

درخواست دینے کے لیے:
https://admission.jmi.ac.in/

یا ای میل کریں:

دفتر مشیر برائے غیر ملکی طلبہ(Foreign Students' Advisor Office):
📧 [email protected]
📧 [email protected]
📧 [email protected]