نئی دہلی : علی گڑھ مسلم یونیورسٹی کے شعبہ سیاسیات کے دوسرے سمسٹر کے    37 طلبہ کے ایک گروپ نے ہندوستانی پارلیمنٹ کا جامع تعلیمی دورہ کیا۔ اس دورے کا اہتمام ایک طلبہ کمیٹی نے کیا جس کی قیادت فیاض کر رہے تھے جبکہ دیگر اراکین میں ابو بکر خان،عبدالقاوی حمزہ محمد وسیم، محمد ر ضی عالم اور عبداللہ ثاقب شامل تھے۔

دورے کے دوران طلبہ کی ملاقات رکن پارلیمنٹ عمران مسعود اور ان کی ٹیم سے ہوئی جنہوں نے اس تعلیمی سفر کو ممکن بنانے میں اہم تعاون فراہم کیا۔ اظہار تشکر کے طور پر طلبہ کے وفد نے عمران مسعود اور ان کے پرسنل سیکریٹری محفوظ حسین کو حیات جاوید کا انگریزی ایڈیشن اور ایک یادگاری تحفہ پیش کیا۔

طلبہ نے نئی پارلیمنٹ کی عمارت کے دونوں ایوانوں کا دورہ کیا اور پرانی پارلیمنٹ میں واقع آئین ساز اسمبلی ہال کو بھی دیکھا۔ اس دورے کی ایک اہم جھلک ہندوستان کے آئین کی اصل کاپی کو دیکھنے کا نادر موقع تھا جس نے طلبہ کو ملک کے جمہوری ورثے کے بارے میں عملی اور قیمتی معلومات فراہم کیں۔

اس کے علاوہ طلبہ کو پارلیمنٹ ہاؤس کے احاطے میں دوپہر کا کھانا کھانے کا بھی موقع ملا۔

دورے کی کامیابی پر اظہار خیال کرتے ہوئے منتظم فیاض نے کہا کہ یہ تجربہ ہمارے بیچ کے لیے ایک اہم اور تبدیلی لانے والا سنگ میل ثابت ہوا جس نے کلاس روم میں پڑھے جانے والے سیاسی نظریات اور ہماری جمہوریت کے عملی نظام کے درمیان خوبصورت ربط قائم کیا۔