عمر پورہ : پنجاب کے گاؤں عمرپورہ میں انسانیت کی ایک روشن مثال سامنے آئی ہے۔ مَدینہ مسجد کی تعمیر سکھ بھائیوں کی عطا کی ہوئی زمین پر مکمل ہو چکی ہے۔ اس خبر نے مقامی مسلمانوں کے دلوں میں بے حد خوشی پیدا کر دی ہے کیونکہ وہ کئی سال سے نماز کی جگہ کے انتظار میں تھے۔

کلیرئن انڈیا کی رپورٹ کے مطابق مسجد کا باقاعدہ افتتاح اتوار 7 دسمبر کو ہوا۔ اس موقع پر پنجاب کے شاہی امام مولانا محمد عثمان لدھیانوی نے نماز پڑھائی۔ زمین عطیہ کرنے والے اور سابق سرپنچ سکھ جندر سنگھ بھی سکھ خاندانوں اور مسلم علما کے ساتھ اس تقریب میں شریک ہوئے۔عمرپورہ کے مسلمان برسوں سے مشکلات کا سامنا کر رہے تھے۔ گاؤں میں مسجد نہ ہونے کے باعث انہیں ہر نماز کے لیے دوسرے گاؤں جانا پڑتا تھا۔ نئی مسجد نے ان کی یہ بڑی مشکل ختم کر دی ہے۔

ایک بزرگ دروازے کے قریب کھڑے مسکراتے ہوئے بولے کہ ہم نے بہت لمبا انتظار کیا۔ آج ہمارا خواب پورا ہو گیا ہے۔یہ کہانی تب شروع ہوئی جب سکھ برادری نے اپنے مسلم پڑوسیوں کی پریشانی دیکھی۔ نظرانداز کرنے کے بجائے وہ خود آگے بڑھے۔ انہوں نے مسجد کی تعمیر کے لیے 6 ایکڑ زمین اور 500000 روپے عطیہ کیے۔

شاہی امام لدھیانوی نے وہ لمحہ یاد کیا جب یہ خیال سامنے آیا تھا۔ انہوں نے کہا کہ یہاں کئی مسلمان گھر ہیں لیکن مسجد نہیں تھی۔ مسلمانوں کو ہر نماز کے لیے دوسرے گاؤں جانا پڑتا تھا۔ سکھ بھائیوں نے اس پریشانی کو سمجھا اور خود زمین دینے کی پیشکش کی۔

سنگ نیاد 12 جنوری کو رکھا گیا تھا۔ اتوار کے افتتاح میں گاؤں کے رہنما سکھ خاندان اور مقامی مسلم علما شریک ہوئے جن میں قاری فرقان حقانی قاری عرفان قاری راشد پٹھانپورہ قاری محمد سلمان قاری محمد یعقوب اور قاری محمد صادق یزدانی شامل تھے۔ تعمیر کی نگرانی کرنے والے اور مقامی جمیعۃ علمائے ہند کے نمائندے قاری فرقان احمد بھی موجود تھے۔یہ منظر دل کو چھو لینے والا تھا جب سکھ بھائی مسجد کے صحن میں مسلمانوں کے ساتھ کھڑے تھے۔ آج ملک کے کشیدہ ماحول میں ایسا منظر بہت کم دیکھنے کو ملتا ہے۔جب عصر کی پہلی نماز شروع ہوئی تو مسجد کا ماحول جذبات اور تشکر سے بھر گیا۔ں۔

سابق سرپنچ سکھ جندر سنگھ جنہوں نے اپنے خاندان کے حصے کی زمین عطیہ کی اپنی جذبات پر قابو نہ رکھ سکے۔ وہ بولے کہ میرا گھر مسجد کے پاس ہے۔ جب میں مسلمانوں کو یہاں پانچ وقت کی نماز پڑھتے دیکھوں گا تو مجھے سکون ملے گا۔انہوں نے مزید کہا کہ عمرپورہ کے مسلمان ہمیشہ عزت کے ساتھ رہے ہیں۔ انہیں اپنے گھر کے قریب نماز پڑھنے کی جگہ ملنی ہی چاہیے تھی۔

جوانوں نے کہا کہ مَدینہ مسجد کے کھلنے سے انہیں ایسے وقت میں امید ملی ہے جب پورے ہندوستان میں مسلمان بڑھتی ہوئی دشمنی کا سامنا کر رہے ہیں۔گاؤں کے ایک نوجوان نے کہا کہ ایسے وقت میں جب ہم اتنی نفرت دیکھتے ہیں یہ مسجد ہمیں یاد دلاتی ہے کہ اچھے لوگ اب بھی موجود ہیں۔ جب ہمیں ان کی سب سے زیادہ ضرورت تھی ہمارے سکھ بھائی ہماری مدد کے لیے آگے آئے۔ مالیرکوٹلہ کے لوگ کہتے ہیں کہ انہیں فخر ہے کہ پنجاب نے ایک بار پھر امن اور بھائی چارے کی راہ دکھائی ہے۔جب عمرپورہ میں پہلی بار اذان کی آواز گونجی تو کئی مسلمانوں نے کہا کہ ان کے دلوں سے ایک بڑا بوجھ ہلکا ہو گیا ہے۔مَدینہ مسجد اب صرف نماز کی جگہ نہیں بلکہ اتحاد انسانیت اور باہمی محبت کی علامت ہے۔ ایسی علامت جس کی آج پورے ملک کو سخت ضرورت ہے۔