عارف الاسلام : گوہاٹی 

قرآن اللہ کی طرف سے نازل ہونے والی ایک مقدس کتاب ہے۔ بعض لوگ اسے صرف اسلام کے ماننے والوں تک محدود کرنا چاہتے ہیں مگر حقیقت یہ ہے کہ اللہ نے قرآن پوری انسانیت کے لیے نازل کیا ہے۔ جو بھی شخص سیدھی راہ پر زندگی گزارنا چاہتا ہے اسے قرآن کا مطالعہ کرنا چاہیے۔

قرآن بنیادی طور پر عربی زبان میں ہے مگر وقت کے ساتھ اس کے مختلف زبانوں میں ترجمے کیے گئے ہیں۔ہندوستاننجیسے ملک میں زیادہ تر لوگ عربی نہیں سمجھتے۔ مسلمان بچپن میں قرآن پڑھنا سیکھتے ہیں مگر اکثر اس کا مفہوم نہیں جان پاتے۔ اسی لیے اب قرآن کو اپنی مادری زبان میں سمجھنا زیادہ آسان ہو گیا ہے تاکہ ہر شخص خود پڑھ اور سن سکے۔

اب یوٹیوب پر آسامیہ آڈیو قرآن دستیاب ہو گیا ہے۔ اسلامی اسکالر مولانا نورالامین قاسمی کی قیادت میں قرآن کے آسامیہ ترجمے کو آواز دی گئی ہے۔ مولانا قاسمی نے بتایا کہ یہ عظیم کام انہیں اپنے استاد کی رہنمائی سے شروع کرنے کا خیال آیا اور انہوں نے اس پر عمل کیا۔

چار برس کی مسلسل محنت کے بعد قرآن کا آسامیہ آڈیو مکمل ہوا۔ عربی تلاوت سعودی امام اور قاری عبداللہ نے کی جبکہ آسامیہ ترجمے کی آواز خود مولانا قاسمی نے دی۔

اس کام میں باہمی ہم آہنگی کی مثال بھی سامنے آئی۔ ایک غیر مسلم نوجوان انکور سیکیا کے اسٹوڈیو میں پورے قرآن کی ریکارڈنگ کی گئی۔ مولانا قاسمی کے مطابق انکور نے خوش دلی سے اپنا اسٹوڈیو فراہم کیا جس سے یہ کام مکمل ہو سکا۔

یہ آڈیو ورژن ان لوگوں کے لیے بہت مفید ہے جو قرآن پڑھ نہیں سکتے مگر اس کا پیغام جاننا چاہتے ہیں۔ مولانا قاسمی کہتے ہیں کہ قرآن صرف مسلمانوں کے لیے نہیں بلکہ پوری انسانیت کے لیے ہے اور جو بھی ہدایت چاہے وہ اس سے رہنمائی حاصل کر سکتا ہے۔

انہوں نے کہا کہ قرآن کے مفہوم کو سمجھنے کے لیے رہنمائی ضروری ہے کیونکہ عربی الفاظ کے معانی مختلف ہو سکتے ہیں اس لیے کسی عالم کی مدد سے پڑھنا بہتر ہوتا ہے۔

آسامیہ آڈیو ترجمہ کے بعد اب مولانا نورالامین قاسمی قرآن کی تفسیر بھی یوٹیوب پر شائع کرنے کا منصوبہ بنا رہے ہیں۔ انہوں نے کہا کہ اگر لوگ مالی تعاون کریں تو یہ کام جلد شروع کیا جا سکتا ہے۔

یہ آڈیو قرآن یوٹیوب پر Assamese Translation of Quran یا Nurul Amin Qasimi کے نام سے تلاش کیا جا سکتا ہے۔ Voice of Assamese Quran چینل پر یہ مکمل آڈیو دستیاب ہے۔