احسان فاضلی۔ سرینگر

خانقاہِ فیض پناہ، ترال، جو حضرت میر سید علی ہمدانی کے نام سے منسوب ہے، وادیٔ کشمیر کی ممتاز خانقاہوں میں شمار ہوتی ہے۔ یہ ان 51 خانقاہوں میں شامل ہے جو اس عظیم صوفی بزرگ نے اپنے صاحبزادے میر محمد ہمدانی کی معاونت سے کشمیر سے کاشغر تک قائم کیں۔ جنوبی کشمیر کے ضلع پلوامہ کے قصبہ ترال کے وسط میں، سرینگر سے تقریباً 45 کلومیٹر کے فاصلے پر واقع یہ خانقاہ، ان 16 خانقاہوں میں بھی شامل ہے جو میر محمد ہمدانی کی نگرانی میں وادیٔ کشمیر کے مختلف حصوں میں تعمیر کی گئیں، جن میں سے بعض حضرت شاہ ہمدان کے وصال کے بعد تعمیر ہوئیں۔

اگرچہ سلطان سکندر کے عہد حکومت میں تعمیر کی گئی یہ صدیوں پرانی عمارت 16 دسمبر 1997 کو پراسرار حالات میں آگ لگنے سے خاکستر ہو گئی تھی، تاہم تقریباً تین دہائیوں کے دوران مختلف رکاوٹوں کے بعد اس کی ازسرنو تعمیر اب آخری مرحلے میں پہنچ چکی ہے۔ جموں و کشمیر وقف بورڈ کی چیئرپرسن ڈاکٹر سید درخشاں اندرابی کے مطابق، وقف بورڈ نے 2025 میں اس کی تعمیر نو اور تزئین و آرائش کا کام سنبھالا اور توقع ہے کہ یہ منصوبہ اسی سال ستمبر تک مکمل ہو جائے گا۔ اس سے قبل اس منصوبے کا آغاز محکمہ سیاحت جموں و کشمیر نے کیا تھا جبکہ اس پر عمل درآمد جموں و کشمیر پروجیکٹس کنسٹرکشن کارپوریشن کر رہی تھی، لیکن تعمیر نو کے لیے مختص فنڈز کی کمی کے باعث اس منصوبے کو متعدد رکاوٹوں کا سامنا کرنا پڑا۔سال 1997 کی تباہ کن آتش زدگی بھی اس خانقاہ میں روزانہ سینکڑوں عقیدت مندوں کی حاضری اور سالانہ عرس سمیت دیگر مذہبی مواقع پر ہزاروں زائرین کی آمد کو نہ روک سکی، جو صوفی بزرگ کی برکتیں حاصل کرنے کے لیے یہاں آتے ہیں۔

ڈاکٹر نثار احمد بھٹ ترالی نے اپنی کتاب "آئینۂ ترال" میں، جو اس علاقے کی تاریخ، جغرافیہ، اہم شخصیات اور مقامات پر مشتمل ایک مفصل تصنیف ہے، لکھا ہے کہ اس خانقاہ کا سالانہ عرس ذوالحجہ کی 6 تاریخ کو منایا جاتا ہے اور یہ ذوالحجہ کے پہلے چھ دنوں پر مشتمل ہوتا ہے۔ سرینگر کی خانقاہِ معلیٰ میں بھی سالانہ عرس ذوالحجہ کے ابتدائی چھ دنوں تک جاری رہتا ہے۔ہعقیدہ بھی پایا جاتا ہے کہ خانقاہِ فیض پناہ، ترال، خانقاہِ معلیٰ سرینگر کے بعد واحد ایسی خانقاہ ہے جہاں حضرت شاہ ہمدان کا تبرک، یعنی عصائے شریف محفوظ ہے۔ یہ متبرک عصا بنیادی طور پر سالانہ عرس کے موقع پر عوام کی زیارت کے لیے پیش کیا جاتا ہے۔

ڈاکٹر نثار احمد بھٹ لکھتے ہیں۔"کشمیر کی بیشتر خانقاہیں مختلف ادوار میں آتش زدگی کے واقعات کا شکار ہوئیں یا وقت گزرنے اور قدرتی اثرات کے باعث ان کی عمارتیں کمزور ہوتی گئیں۔ خانقاہِ فیض پناہ، ترال بھی 16 دسمبر 1997 کو پراسرار حالات میں پیش آنے والے آتش زدگی کے ایک واقعے میں شدید متاثر ہوئی۔"وہ مزید لکھتے ہیں۔یہ خانقاہ، سرینگر کی خانقاہِ معلیٰ کی طرح، سلطان سکندر کے دور حکومت میں تعمیر کی گئی تھی۔ روایت ہے کہ حضرت شاہ ہمدان نے کشمیر کے اپنے تیسرے اور آخری سفر کے دوران، جو 1383 تا 1384 میں تقریباً چھ ماہ سے کم عرصے پر مشتمل تھا، کچھ وقت ترال کے کوثربل مقام پر قیام فرمایا۔ یہ مقام آج میر محمد ہمدانی کی زیارت کے نام سے معروف ہے۔

اس وقت اسلام قبول کرنے والے نئے مسلمانوں کی دینی تعلیم کے لیے وہاں جگہ ناکافی تھی۔ چنانچہ ایک وسیع مقام کی تلاش شروع کی گئی اور موجودہ خانقاہ کی جگہ کا انتخاب کیا گیا۔سلطان نے خانقاہ کی تعمیر میں بھرپور تعاون کیا۔ مزدوروں اور کاریگروں کے لیے ضروری سامان اور دیگر سہولتیں بھی فراہم کی گئیں۔ تعمیر کا تمام کام میر محمد ہمدانی کی نگرانی میں انجام پایا۔ یہ عمارت 880 ہجری میں مکمل ہوئی۔خانقاہ کو سرینگر کی خانقاہِ معلیٰ کے طرز پر تعمیر کیا گیا۔ اس کی بنیاد نہایت مضبوط تھی۔ عمارت زیادہ تر دیودار کی لکڑی اور عمدہ لکڑی کے کام سے تیار کی گئی تھی جبکہ مٹی اور اینٹوں کا استعمال بہت کم کیا گیا تھا۔ لکڑی کے بڑے شہتیروں کو اس انداز سے جوڑا گیا تھا کہ ان پر خوبصورت نقش و نگار بھی بنائے گئے جس سے عمارت کو ایک دلکش اور حسین شکل حاصل ہوئی۔خانقاہ کا رقبہ تقریباً 40 ضرب 60 فٹ تھا اور اس کے اندر درمیان میں چار بڑے ستون قائم تھے۔ اس میں 12 چھوٹی چھوٹی چلہ کوٹھڑیاں بھی تھیں جہاں رمضان المبارک کے دوران اعتکاف کیا جاتا تھا۔"اگلے حصے میں نئی عمارت، عصائے شریف، حجرۂ خاص اور خانقاہ کی موجودہ صورتِ حال کا ترجمہ پیش کیا جائے گا۔

اصل عمارت کی چھت، جس کے بارے میں خیال کیا جاتا ہے کہ وہ 200 برس سے زیادہ پرانی تھی، بھوج پتر سے ڈھکی ہوئی تھی جسے مقامی زبان میں برزا پوش یا چھت کہا جاتا تھا۔ اس پر مٹی بچھائی گئی تھی اور اس کے اوپر خوبصورت پھول اگائے جاتے تھے۔ بعد میں 1953 میں، جموں و کشمیر کے اُس وقت کے وزیر اعظم بخشی غلام محمد کے دور حکومت میں اس کی جگہ ٹین کی چھت لگا دی گئی، جس کے درمیان ایک گول شکل کا مینار بھی تعمیر کیا گیا۔نئی عمارت تین منزلہ ہے۔ اس کی نچلی منزل میں ایک وقت میں ایک ہزار سے زائد عقیدت مند نماز ادا کر سکتے ہیں۔ دوسری منزل پر تین اطراف برآمدے بنائے گئے ہیں جبکہ درمیان کا حصہ کھلا رکھا گیا ہے۔ اس کے اوپر مکمل بالائی منزل تعمیر کی گئی ہے۔زیارت گاہ کے ایک متولی نے بتایا کہ نئی عمارت میں رمضان المبارک کے دوران اعتکاف کے لیے الگ چلہ کوٹھڑیوں کا انتظام نہیں کیا گیا، جیسا کہ پرانی عمارت میں موجود تھا۔خانقاہ کے داخلی حصے کے وسط میں ایک خصوصی حجرہ موجود ہے جہاں مرد و خواتین عقیدت مند بزرگ کی برکتیں حاصل کرنے کے لیے دعا کرتے ہیں۔

یہ خصوصی حجرہ، جسے حجرۂ خاص کہا جاتا ہے، مکمل طور پر محفوظ بنایا گیا ہے۔ اسی حجرے میں کپڑے میں لپٹا ہوا متبرک تبرک محفوظ رکھا گیا ہے۔ حجرے کی سامنے والی دیوار پر حضرت شاہ ہمدان کی اورادِ فتحیہ بھی تحریر ہے۔اس خانقاہ میں محفوظ واحد تبرک حضرت میر سید علی ہمدانی کا عصائے شریف ہے، جو گزشتہ تقریباً پانچ دہائیوں سے یہاں موجود ہے۔اس سے پہلے یہ عصائے شریف کار خاندان کی تحویل میں تھا، جو کرشن کار کی نسل سے تعلق رکھتا ہے۔ ڈاکٹر نثار احمد بھٹ کے مطابق کرشن کار نے حضرت شاہ ہمدان کے قیام کے دوران اسلام قبول کیا تھا۔یہ خاندان کئی برسوں تک اس متبرک عصا کی زیارت کراتا رہا، تاہم تقریباً پانچ دہائیاں قبل اس نے اس تبرک کی تحویل باضابطہ طور پر خانقاہ کی انتظامیہ کے حوالے کر دی۔