احسان فاضلی۔ سرینگر

چودھویں صدی کے عظیم صوفی بزرگ میر سید علی ہمدانیؒ المعروف شاہ ہمدان کی شہرۂ آفاق تصنیف ’’زخیرۃ الملوک‘‘ کا کشمیری زبان میں ترجمہ گزشتہ ماہ یہاں ان کے سالانہ عرس کے موقع پر جاری کیا گیا۔ اس کتاب کی رونمائی 6 ذوالحج کو بمطابق 23 مئی 2026ء ایک تقریب میں کی گئی جس کا مشترکہ اہتمام اسلامک ریلیف اینڈ ریسرچ ٹرسٹ (آئی آر آر ٹی) اور جموں و کشمیر اردو کونسل نے کیا تھا۔ دونوں اداروں کے سربراہ مترجم ایڈووکیٹ عبدالرشید ہنجورہ ہیں۔ عیدالاضحیٰ سے قبل منعقد ہونے والی اس تقریب میں شاہ ہمدانؒ کی دینی روحانی سماجی اور ثقافتی خدمات کو اجاگر کیا گیا۔ شاہ ہمدانؒ کشمیر میں اسلام کے وسیع پیمانے پر فروغ کے حوالے سے خاص طور پر معروف ہیں۔

’’زخیرۃ الملوک‘‘ فارسی زبان کی ایک اہم تصنیف ہے جس کے معنی ہیں ’’بادشاہوں کا خزانہ‘‘۔ یہ چودھویں صدی کے صوفی بزرگ میر سید علی ہمدانیؒ کی متعدد تصانیف میں سے ایک ہے۔ کشمیر میں اسلام کی اشاعت کے باعث انہیں شاہ ہمدان کے نام سے عقیدت و احترام کے ساتھ یاد کیا جاتا ہے۔ یہ کتاب سیاسی اخلاقیات حکمرانی اور اسلامی روحانیت پر ایک جامع رسالہ ہے۔ اس میں اسلامی تعلیمات کی روشنی میں عادلانہ حکمرانی اخلاقی طرز عمل اور روحانی ذمہ داریوں کے اصول بیان کیے گئے ہیں۔ میر سید علی ہمدانیؒ (1314 تا 1384ء) ایک فارسی صوفی بزرگ عالم شاعر اور مبلغ تھے جنہیں کشمیر اور وسطی ایشیا میں اسلام کے فروغ کے لیے غیر معمولی احترام حاصل ہے۔ انہوں نے تین مرتبہ وادی کشمیر کا سفر کیا۔

ایڈووکیٹ عبدالرشید ہنجورہ نے ’’آواز دی وائس‘‘ سے گفتگو کرتے ہوئے کہا کہ ’’میں اس کتاب کے مضامین سے اس وقت سے متاثر ہوں جب میں نے اسے پہلی مرتبہ پڑھا تھا۔ میں نے محسوس کیا کہ یہ کتاب صرف بادشاہوں حکمرانوں اور منتظمین کے لیے ہی نہیں بلکہ عام لوگوں کے لیے بھی یکساں اہمیت رکھتی ہے۔ مجھے لگا کہ یہ بہترین کتابوں میں سے ایک ہے اور ہر شخص کو اسے ضرور پڑھنا چاہیے۔‘‘

انہوں نے بتایا کہ کشمیری زبان میں اس کا ترجمہ مکمل کرنے میں انہیں تین سے چار سال لگے جبکہ اس دوران وہ اپنی پیشہ ورانہ اور سماجی سرگرمیوں میں بھی مصروف رہے۔ ترجمے کا کام ابتدا میں براہ راست فارسی زبان سے شروع کیا گیا تھا۔ تاہم فارسی سے ترجمے میں بعض مشکلات پیش آئیں جس کے باعث انہوں نے اردو ترجمے کی مدد سے اس کام کو مکمل کیا۔

جب ان سے پوچھا گیا کہ انہوں نے اس کتاب کا ترجمہ کشمیری زبان میں کرنے کا فیصلہ کیوں کیا تو ہنجورہ نے کہا کہ اس سے کشمیر کے زیادہ سے زیادہ لوگوں تک اس کتاب کی رسائی ممکن ہوگی۔ انہوں نے کہا ’’میں کشمیری ہوں اور اپنی مادری زبان سے محبت کرتا ہوں۔ مجھے کشمیری ہونے پر فخر ہے اور میں نہ صرف اس زبان میں گفتگو کرنا بلکہ اس میں لکھنا بھی پسند کرتا ہوں۔‘‘

انہوں نے مزید کہا کہ اس ترجمے کے ذریعے وہ کشمیری زبان اور ادب کی خدمت میں اپنا حصہ ڈالنا چاہتے ہیں۔ ان کے مطابق ایک اور اہم وجہ یہ تھی کہ ’’آنے والی نسل اپنی ہی زبان کے ذریعے علم حاصل کرے اور کشمیری زبان کو مزید تعلیم اور فہم کے حصول کا ذریعہ بنائے۔‘‘

ہنجورہ نے بتایا کہ کتاب کا ترجمہ انہوں نے اپنے فارغ اوقات میں مکمل کیا جبکہ دیگر ذمہ داریوں کو بھی ساتھ ساتھ نبھاتے رہے۔ بعد ازاں اس ہاتھ سے لکھے گئے ترجمے کو کمپیوٹرائز کیا گیا اور شائع کیا گیا جس کی رونمائی حال ہی میں منعقدہ تقریب میں کی گئی۔

انہوں نے کہا ’’میری خواہش ہے کہ میر سید علی ہمدانیؒ المعروف شاہ ہمدان یا امیر کبیر کی سات سو سال پرانی اس تصنیف کا کشمیری ترجمہ ہر شخص تک پہنچے تاکہ لوگ اسے پڑھ سکیں۔‘‘

اسی مقصد کے تحت ہنجورہ اس کتاب کی نقول کشمیری زبان اور شاہ ہمدانؒ سے محبت رکھنے والوں میں مفت تقسیم کر رہے ہیں۔ شاہ ہمدانؒ کو کشمیر میں اسلام کے وسیع پیمانے پر فروغ کا علمبردار صوفی بزرگ مانا جاتا ہے۔

ہنجورہ کے مطابق یہ کتاب آج کے دور کے منتظمین اور حکام کے لیے بھی نہایت اہمیت رکھتی ہے۔ اب تک وہ ’’زخیرۃ الملوک‘‘ کے کشمیری ترجمے کی ایک سو سے زائد نقول کشمیری زبان کے شائقین اور شاہ ہمدانؒ کے عقیدت مندوں میں تقسیم کر چکے ہیں۔

ٹرسٹ کا تعارف

عبدالرشید ہنجورہ اسلامک ریلیف اینڈ ریسرچ ٹرسٹ (آئی آر آر ٹی) کے سربراہ ہیں اور جموں و کشمیر اردو کونسل کے صدر بھی ہیں۔ انہوں نے اردو اور کشمیری زبانوں میں متعدد کتابیں تصنیف کی ہیں۔1980ء میں وہ عبدالخالق ٹاک المعروف ٹاک زنگیری کی تحریک سے متاثر ہوئے اور اس سے وابستہ ہو گئے۔ ٹاک زنگیری جموں و کشمیر یتیم ٹرسٹ کے بانی تھے جو یتیموں اور معاشرے کے محروم طبقات کی فلاح و بہبود کے لیے قائم کیا گیا ایک اہم ادارہ ہے۔بعد ازاں ہنجورہ نے اس مشن کو وسعت دیتے ہوئے اسلامک ریلیف اینڈ ریسرچ ٹرسٹ (آئی آر آر ٹی) قائم کیا جو سماجی اصلاح اور فلاحی سرگرمیوں کے فروغ کے لیے کام کر رہا ہے۔

یہ ادارہ ضلع بڈگام کے کرالپورہ میں دارالاحسان کے نام سے ایک یتیم خانہ چلاتا ہے جبکہ ضلع بارہمولہ کے پٹن علاقے میں دارالمحسنات کے نام سے یتیم بچیوں کے لیے ایک الگ ادارہ بھی قائم ہے۔ایک سرگرم ثقافتی کارکن کی حیثیت سے عبدالرشید ہنجورہ کشمیری ثقافت اور ادب کے تحفظ اور فروغ کے لیے مختلف پروگراموں کا انعقاد بھی کرتے رہتے ہیں۔