دانش علی : سری نگر

کشمیر کی سرزمین صدیوں سے اپنی تہذیبی ہم آہنگی، صوفیانہ روایت اور موسیقی کی دلکش فضا کے لیے پہچانی جاتی رہی ہے۔ یہاں اذان، بھجن اور کیرتن کی آوازیں ایک ساتھ گونجتی تھیں، جو اس خطے کی گنگا جمنی تہذیب کی جیتی جاگتی مثال تھیں۔ اسی روایت کو زندہ رکھنے والے معروف گلوکار منیر احمد میر آج بھی اپنی سریلی آواز کے ذریعے محبت، بھائی چارے اور انسانیت کا پیغام عام کر رہے ہیں۔ منیر احمد میر کا شمار کشمیر کے ان ممتاز فنکاروں میں ہوتا ہے جنہوں نے موسیقی کو محض تفریح نہیں بلکہ سماجی ہم آہنگی اور ثقافتی یکجہتی کے ایک مضبوط وسیلے کے طور پر اپنایا ہے۔ وہ گزشتہ کئی دہائیوں سے کشمیری، ہندی اور فارسی زبانوں میں گاتے آ رہے ہیں اور اپنی منفرد پہچان قائم کر چکے ہیں۔

ابتدائی زندگی اور موسیقی کی تربیت

منیر احمد میر کو موسیقی کا شوق بچپن ہی سے اپنے والد شفی محمد میر سے ملا، جو نہ صرف ایک نیک سیرت انسان تھے بلکہ موسیقی سے بھی گہرا لگاؤ رکھتے تھے۔ بچپن میں ہی وہ اپنے والد کے ساتھ مختلف محفلوں میں شریک ہوتے رہے، جہاں سے انہوں نے موسیقی کی ابتدائی باریکیاں سیکھیں۔ ان کے خاندان میں موسیقی کا شوق نسل در نسل منتقل ہوتا رہا، ان کے دادا بھی موسیقی کے دلدادہ تھے اور ان کے پاس ایک قدیم ہارمونیم موجود تھا جو تقریباً 120 سال پرانا ہے اور آج بھی ان کے گھر میں محفوظ ہے۔

انہوں نے باقاعدہ موسیقی کی تعلیم انسٹی ٹیوٹ آف میوزک اینڈ فائن آرٹس سے حاصل کی، جہاں ان کے پہلے استاد پنڈت پرتھوی ناتھ رینا تھے۔ وہ اپنے استاد کو خراج تحسین پیش کرتے ہوئے کہتے ہیں کہ انہوں نے کبھی مذہب کو علم کے راستے میں رکاوٹ نہیں بننے دیا بلکہ ہمیشہ محبت اور خلوص کے ساتھ رہنمائی کی۔ ان کے مطابق یہی اصل گرو شاگرد روایت ہے جس میں ادب، عقیدت اور احترام کے ساتھ علم حاصل کیا جاتا ہے۔

فنی سفر اور کامیابیاں

اپنے طویل کیریئر میں منیر احمد میر نے کئی نامور فنکاروں کے ساتھ کام کیا، جن میں غلام حسن صوفی، راج بیگم، نسیما اختر، شمع دیوی اور دیگر شامل ہیں۔ انہوں نے ان فنکاروں کے ساتھ کورس میں گاتے ہوئے موسیقی کی باریکیوں کو سیکھا اور آہستہ آہستہ اپنی الگ شناخت بنائی۔ بعد میں انہیں پنڈت بھجن سوپوری جیسے عظیم استادوں سے بھی رہنمائی حاصل ہوئی، جنہوں نے انہیں کمپوزیشن اور موسیقی کی تکنیکی پہلوؤں سے روشناس کرایا۔

ان کی خدمات کے اعتراف میں انہیں کئی اعزازات سے نوازا جا چکا ہے۔ سال 2023 میں انہیں ہارمونی ایوارڈ سے نوازا گیا جبکہ 2024 میں بھی انہیں ریاستی سطح پر بڑا اعزاز حاصل ہوا۔ اس کے علاوہ سوپوری اکیڈمی آف میوزک اینڈ پرفارمنگ آرٹس کی جانب سے دہلی کے کمانی آڈیٹوریم میں بھی انہیں اعزاز سے نوازا گیا۔ تاہم وہ کہتے ہیں کہ ایوارڈز سے زیادہ اہم عوام کی محبت اور داد ہوتی ہے۔ ان کے مطابق ایک فنکار کے لیے سامعین کی موجودگی بہت ضروری ہے کیونکہ تالیاں ہی اس کے فن میں جان ڈالتی ہیں اور اسے مزید بہتر پیش کرنے کا حوصلہ دیتی ہیں۔

کشمیر کی بدلتی فضا اور موسیقی کا کردار

کشمیر کے موجودہ حالات پر بات کرتے ہوئے منیر احمد میر کہتے ہیں کہ ایک وقت تھا جب یہاں مذہبی ہم آہنگی اپنے عروج پر تھی اور ہر طرف محبت کا ماحول تھا، لیکن وقت کے ساتھ یہ فضا متاثر ہوئی۔ ان کے مطابق اب ضرورت اس بات کی ہے کہ اس قدیم روایت کو دوبارہ زندہ کیا جائے تاکہ لوگ ایک دوسرے کے قریب آ سکیں۔

انہوں نے خاص طور پر اس بات پر زور دیا کہ کشمیر میں موجود قدیم مندروں کو دوبارہ کھولا جائے اور ان کی مرمت کی جائے تاکہ مذہبی اور ثقافتی ہم آہنگی کو فروغ مل سکے۔ انہوں نے خوشی کا اظہار کیا کہ حالیہ دنوں میں اس سمت میں کچھ مثبت اقدامات کیے گئے ہیں اور مختلف مذاہب کے لوگ ایک ساتھ ثقافتی پروگراموں میں شرکت کر رہے ہیں، جو ایک خوش آئند تبدیلی ہے۔

نئی نسل کے لیے پیغام

موسیقی کے بدلتے رجحانات پر گفتگو کرتے ہوئے انہوں نے کہا کہ ماضی کی موسیقی زیادہ پائیدار اور روح کو سکون دینے والی تھی، جبکہ آج کی موسیقی عارضی ہو گئی ہے جو جلد بھلا دی جاتی ہے۔ انہوں نے نئی نسل کو مشورہ دیا کہ وہ اپنی روایتی موسیقی کو سیکھیں اور اس کی قدر کریں کیونکہ یہی ان کی اصل پہچان ہے۔

انہوں نے آکاش وانی اور دوردرشن جیسے اداروں کے کردار پر بھی روشنی ڈالی اور کہا کہ ماضی میں یہ ادارے نئے فنکاروں کو تلاش کر کے انہیں آگے بڑھنے کے مواقع فراہم کرتے تھے، جس کے نتیجے میں بڑے بڑے فنکار سامنے آئے۔ لیکن آج یہ نظام کمزور پڑ چکا ہے، جس کی وجہ سے نئے فنکاروں کو وہ مواقع نہیں مل پا رہے جو پہلے دستیاب تھے۔

آخر میں منیر احمد میر نے اپنے اساتذہ کو خراج عقیدت پیش کرتے ہوئے کہا کہ جو کچھ انہوں نے حاصل کیا ہے وہ اپنے گروؤں کی محنت اور رہنمائی کا نتیجہ ہے۔ ان کے مطابق موسیقی ایک ایسی طاقت ہے جو انسانوں کے درمیان نفرت کو ختم کر کے محبت کو فروغ دیتی ہے، اور یہی اس کا اصل مقصد ہونا چاہیے۔