نئی دہلی: نماز جمعہ سے قبل ملک کی کئی بڑی مساجد کے اماموں نے اپنے خطبہ میں ادے پور واقعہ کی سخت مذمت کی اور اسے اسلام کے اصولوں کے خلاف قرار دیا اور کہا کہ کسی بھی حالت میں کسی کو بھی قانون ہاتھ میں لینے کا حق نہیں ہے۔ سزا دینے کا کام حکومت کے بنائے ہوئے مختلف ادارے ہی کریں گے، اگر ہر کوئی اپنی مرضی کے مطابق سزا دینے کا کام کرے گا تو اس سے معاشرے اور قوم کا شیرازہ بکھر جائے گا۔

اماموں نے کہا کہ اسلام تشدد کی مذمت کرتا ہے اور عدم تشدد، رواداری اور ہم آہنگی اور ایک دوسرے کے احترام کو فروغ دیتا ہے۔ اسلام خاص طور پر کہتا ہے کہ اللہ حملہ آوروں سے نفرت کرتا ہے، لہٰذا ایسے نہ بنو۔ اسلام اپنے پیروکاروں کو عفو و درگزر اور رواداری کو فروغ دینے کی دعوت دیتا ہے۔

امن، باہمی احترام اور اعتماد مسلمانوں کے دوسروں کے ساتھ تعلقات کی بنیاد ہے۔ اماموں نے کہا کہ نبی کریم صلی اللہ علیہ وسلم نے فرمایا: "کیا تم جانتے ہو کہ صدقہ ، روزہ اور نماز سے بہتر کیا ہے؟ یہ امن اور لوگوں کے درمیان اچھے تعلقات کو برقرار رکھنا ہے، کیونکہ تنازعات اور برے جذبات انسان کو تباہ کر دیتے ہیں۔"

قرآن کے مطابق امن صرف پرامن طریقوں سے ہی حاصل کیا جا سکتا ہے۔ اسلام میں کسی بھی وجہ سے، مذہبی، سیاسی یا سماجی، بے گناہ لوگوں کا قتل ممنوع ہے اور احتجاج بھی غیر متشدد ہونا چاہیے۔ اسلام کے مطابق ’’تم کسی کو قتل نہ کرو، اللہ نے یہ مقدس زندگی دی ہے۔ اسلام کسی بھی بے گناہ کے قتل اور ایذا رسانی سے سختی سے منع کرتا ہے۔ تاہم بہت سی دہشت گرد تنظیمیں اور کئی انتہا پسند تنظیموں نے اپنے ایجنڈے کو آگے بڑھانے کے لیے اسلام کا نام استعمال کیا ہے۔

دہشت گردی کی کاروائیوں کے لیے کسی کو بھی مورد الزام ٹھہرایا جا سکتا ہے، چاہے وہ کسی بھی مذہب سے تعلق رکھتا ہو۔ دہشت گردی کو مختلف تنظیموں نے اپنے اپنے مقاصد، اسباب یا نظریات کو آگے بڑھانے کے لیے اپنایا ہے۔ ایسی تنظیمیں اسلام کو بدنام کر رہی ہیں۔ ایسی تنظیموں کی طرف سے پوری دنیا میں معصوم لوگوں پر حملوں کا کوئی مذہبی جواز نہیں ہے۔ یہ سب کچھ اسلام میں سختی سے ممنوع ہے۔

ائمہ کرام نے کہا کہ آج سوشل میڈیا تشدد کے مرتکب افراد کے لیے ایک نعمت ثابت ہوا ہے کیونکہ اس پلیٹ فارم کو جعلی خبریں اور غلط معلومات پھیلانے کے لیے استعمال کیا جا رہا ہے، جس سے تشدد میں شدت آئی ہے۔ سوشل میڈیا پر غلط معلومات دے کر لوگوں کے جذبات کو بھڑکانے کی کوشش کی جا رہی ہے۔

اماموں نے لوگوں بالخصوص نوجوانوں سے اپیل کی کہ وہ سوشل میڈیا پوسٹس اور ویڈیوز کو اندھا دھند فالو اور شیئر نہ کریں۔ کوئی بھی سنسنی خیز مواد شیئر نہ کریں، کیونکہ بنیاد پرست ملک اور امن کے دشمن ہیں، وہ کوئی بھی غلط اور گمراہ کن معلومات پھیلا سکتے ہیں۔ جو جنگل کی آگ کی طرح پھیل سکتی ہے۔

ائمہ کرام نے کہا کہ اسلام ایک خوبصورت مذہب ہے جو امن، تعاون اور محبت کو فروغ دیتا ہے۔ یہ نفرت، تشدد کو فروغ نہیں دیتا اور تشدد کی کارروائیوں کی وکالت نہیں کرتا۔ بدقسمتی سے اسلام کے پیغام کو مخالفین نے مسخ کیا ہے۔ اسلام مذہب کے نام پر تشدد کو کبھی جائز قرار نہیں دیتا۔

انہوں نے کہا کہ میں ہم وطنوں اور خاص طور پر راجستھان کے لوگوں سے اپیل کرتا ہوں کہ ایسے معاملات میں صبر اور امن کے ساتھ مل کر کام کریں۔ ملک اور امن کے دشمنوں کو ان کے مذموم عزائم میں کامیاب نہ ہونے دیں۔

قادری مسجد شاستری پارک دہلی کے مفتی اشفاق حسین قادری، سنی جامع مسجد رتلام کے مفتی بلال نظامی، مکرانہ کے مفتی شمس الدین برکاتی، مولانا شاہد مصباحی حمیر پور، مولانا بدرالدین مصباحی خطیب اور امام مسجد اعلیٰ حضرت نظامیہ،لکھنو، مولانا سید علی، مولانا فضل الرحمن اور دیگر نے خطاب کیا۔ مولانا انصر فیضی اجمیر، قاری حنیف مرادآباد، مولانا سخی جموں، مولانا مظہر امام (شمالی دیناج پور بنگال)، مولانا عبدالجلیل نظامی (پیلی بھیت)، مولانا سمیر احمد (رام پور)، مولانا قاری جمال، مولانا ابرار بھاگلپور، مولانا مصطفیٰ رضا ناگپوراور امان شہید جامع مسجد کے مولانا تنویر احمد اور مصطفی آباد،دہلی میں مولانا مشرف نے اسی مسئلہ پر خطبے دیئے۔