منصور الدین فریدی : نئی دہلی

دلی کے بار بار اجڑنے اور بسنے کی ایک تاریخ ہے،اب ہم جس دلی میں جی رہے ہیں وہ آٹھویں دلی ہے۔ یعنی نئی دہلی ۔۔۔ لیکن ساتویں دلی یعنی کہ ’شاہجاں آباد‘‘اب بھی اپنی ثقافت ،تہذیب اور تعمیرات  کے  نشانات اور آثار کے سبب اب بھی توجہ کا مرکز ہے ۔اس طویل عرصے میں کافی تبدیلیاں رو نما ہوئیں۔ صدیاں گزر جانے کے باوجود بھی شاہجہاں آباد کی یادیں آج بھی باقی ہیں۔کیونکہ  شاہجہاں آباد محض ایک شہر یا آبادی کا نام نہیں ہے، یہ ایک تہذیب، ایک تمدن اور شاندار تاریخ کا نام ہے۔پرانی دلی کی تنگ گلیوں میں بلند دروازوں کے پیچھے چھپی بڑی بڑی حویلیاں بھی اسی تاریخ کا حصہ ہیں۔ جن میں سے کچھ تو اب سیاحت کے سبب توجہ کا مرکز ہیں اور کچھ خستہ حالی کے سبب ۔۔۔ راجدھانی میں انجمن ترقی اردو کے زیر اہتمام  چار روزہ فیسٹول ۔۔۔  میر کی دلی۔شاہجہاں آباد ۔ ایک شہر ممکنات ۔۔ میں دلی کی حویلیوں پر ایک خصوصی اجلاس ہوا

اس اجلاس میں سابق سفارت کار اور مصنف پون کے ورما نے کہا کہ حویلیاں ثقافت کے مراکز ہیں، جنہیں پہلی بار 1857 میں شدید جھٹکا لگا، جب انگریزوں نے دہلی پر دوبارہ قبضہ کیا۔ یہ حویلیاں بعد میں بھی بے توجہی کا شکار ہوتی رہیں۔ دراصل  1857 کی بغاوت کے بعد انگریز ان لوگوں کی جائیدادوں کو ضبط اور نیلام کرتے تھے جن پربغاوت میں کردار ادا کرنے کا شبہ تھا۔اس دور میں دہلی کی حویلیاں کو بڑا دھچکا لگا اور بہت سے مالکان شہر چھوڑ گئے۔ 1860 میں، شاہجہان آباد (پرانی دلی) سے بھی ریلوے لائنیں کٹ گئیں۔ نوابوں نے دلی چھوڑ دیا اور شہر کو تجارتی بنا دیا گیا۔

آپ کو بتا دیں کہ ہیریٹیج ٹورازم نے پروان پایا تو لال قلعہ، ہمایوں کا مقبرہ، اور قطب مینار جیسے سیاحتی مقامات کے علاوہ  اب  چاندنی چوک کی مصروف اور بھول بھولیاں والی گلیوں بھی سیاحتی نقشہ میں آگئیں۔حیران کن بات یہ ہے یہ حویلیاں  800 کے قریب  ہیں جو ابھی تک بین الاقوامی سیاحوں کو اپنی طرف متوجہ کر چکی ہیں۔ دلچسپ تاریخ، حیرت انگیز فن تعمیر اور آثار قدیمہ کی اہمیت کے سبب خاص طور پر غیر ملکی سیاحوں کی دلچسپی کا مرکز ہیں ۔ چاندنی چوک کی گلیوں میں کھڑی یہ حویلیاں زندہ ورثے کی نمائش اور اپنے مالکان کے لیے باعث فخر ہیں خواہ وہ  بہتر حالت میں ہوں یا خستہ

راجدھانی میں منعقد پروگرام میں موضوع بحث بنیں پرانی دلی کی حویلیاں

اپنی کتاب، مینشنز ایٹ ڈسک: دی حویلیاں آف اولڈ دہلی کی تحقیق کے دوران ورما کو اس بات کا علم ہوا کہ بھاگیرتھ پیلس کا برقی بازار جوچاندنی چوک کے مشہور بازاروں میں سے ایک ہے۔ بیگم سمرو کے محل کے نام سے بھی جانا جاتا تھا، اسے انگریزوں نے 1857 کے بعد تباہ کر دیا تھا۔ وہ کہتے ہیں ورما نے محسوس کیا کہ جب تک لوگ اپنی ثقافت پر فخر نہیں کریں گے، حکومت حویلیاں بچانے کے لیے آگے نہیں بڑھے گی۔انہوں نے کہا کہ یہی وجہ ہے کہ مجھے دہلی کی سابق وزیر اعلیٰ شیلا دکشت سے غالب کی حویلی کو بچانے کی درخواست کرنی پڑی۔ جس کے بعد انہوں نے علیحدہ بجٹ مختص کیا اور حویلی سے تجاوزات کرنے والوں کو بے دخل کیا۔ تب ہی ہم پروقار ورثے کے ڈھانچے کو بچا سکے ہیں۔ اس وقت تک بہت سے لوگوں کو یہ معلوم نہیں تھا کہ غالب کی حویلی بلیماران میں واقع ہے۔غالب کے یوم پیدائش کو منانے کے لیے میں اور گلزار دہلوی ہر سال کینڈل لائٹ مارچ کیا کرتے تھے۔ ہم 18ویں صدی کے شاعر کی رہائش گاہ کی حفاظت کی فوری ضرورت کے بارے میں بیداری پیدا کرنا چاہتے تھے۔ انہوں حویلیاں کے تحفظ کے لیے قوانین بنائے جانے پر زور دیا

پرانی حویلیوں کے سیاحتی مرکز بنائے جانے سے ان کے تحفظ کی نئی راہ کھلی ہے

پرانی دلی میں اپنی بلند و بالا حویلی  ماتھر حویلی کے لیے جانے پہچانے اشوک ماتھر کی شکایت ہے کہ ہم  اپنے ورثہ کی حفاظت نہیں کرتے ،وہ پرانی دلی میں سیاحتی ٹور کراتے ہیں ساتھ  ہی  چاندنی چوک میں 120 سال پرانی حویلی میں قیام کرتے ہیں۔انہوں نے اس موقع پر کہا کہ ہم نے کبھی بھی اپنے ورثے کی حفاظت نہیں کی۔ شاہجہان آباد آج انتہائی افسوسناک حالت میں ہے، اب رہنے کے قابل نہیں رہا۔ میری جنت میں جہنم گھس گئی ہے۔ 1984 کے بعد، پرانی دہلی کا زوال شروع ہوا جب علاقوں کا تجارتی ہونا شروع ہوا۔ آپ کو بتا دیں کہ پرانی دہلی کی نئی سڑک کی تنگ گلیوں اور گلیوں میں اشوک ماتھر اپنی بیوی اور بیٹی کے ساتھ اپنی آبائی 120 سال پرانی حویلی میں رہتے ہیں۔ ماتھر کا خاندان اس حویلی میں رہنے والی پانچویں نسل ہے جو ان کے دادا کے چچا نے بنوائی تھی جو بعد میں مدھیہ پردیش منتقل ہو گئے جو آج تک پرانی دہلی کی روایات کو برقرار رکھے ہوئے ہے۔ پرانی دہلی کی نئی سڑک ہر قسم کی کتابوں، کھانے پینے، کپڑوں اور ہول سیل کی دیگر چیزوں کے لیے مشہور ہے

پرانی دلی کی بیشتر حویلیوں میں اب تجارتی سرگرمیاں ہیں۔وہ دکانوں کے جھنڈ میں چھپ گئی ہیں ،آس پاس کی غیر قانونی تعمیرات کے سبب بھی ان تاریخی حویلیوں کو نقصان ہوا ہے ۔  ورثے کے ڈھانچے کے خوبصورت بیرونی حصے اکثر ان کے سامنے دکانوں کے ہجوم کی وجہ سے خراب ہوتے ہیں، پھر بھی وقت کے ساتھ ساتھ ان کی تاریخی اہمیت میں اضافہ ہوتا گیا ہے۔ تجارتی استعمال اور ہیریٹیج مینشن کی دیکھ بھال کے بھاری اخراجات برداشت کرنے کے لیے فنڈز کی عدم دستیابی نے چاندنی چوک کی بہت سی اہم حویلیاں کو شدید نقصان پہنچایا ہے لیکن اب سے چند سالوں میں تصویر بہتر ہو سکتی ہے۔