ثانیہ انجم۔ بنگلورو

کبھی کبھی ایک انسان اپنی آواز، اپنے فن اور اپنے حوصلے سے وہ کام کر جاتا ہے جو ادارے اور حکومتیں برسوں میں نہیں کر سکتیں۔ ظفر محی الدین بھی ایسے ہی ایک نایاب فنکار ہیں۔ ایک ایسا شخص جس نے خاک آلود گلیوں سے اپنا سفر شروع کیا، لیکن اپنا نام اس بلندی پر لکھ دیا جہاں آوازیں تاریخ بنتی ہیں اور کہانیاں سماج کا چہرہ بدلتی ہیں۔ ان کی زندگی محض ایک فنکار کا سفر نہیں، بلکہ لگن،قربانی اور سماجی بیداری کے اُس فلسفے کی داستان ہے جو نسلوں کو راستہ دکھاتا ہے۔ ظفر محی الدین کے فن میں وہ گہرائی ہے جو صرف اُن لوگوں کو نصیب ہوتی ہے جو تکلیف کو تخلیق میں بدلنے کا ہنر جانتے ہیں۔

بچپن ہی سے ریڈیو کے جادو نے ان کی روح کو چھو لی تھی۔ بیناکا گیت مالا کی دھڑکنیں، امین سیانی کی مٹھاس بھری آواز، اور دلیپ کمار کے مکالموں کی بھرپور ٹھہراؤ بھری ادائیگی یہ سب ان کے اندر وہ چنگاری بن گئے جس نے مستقبل میں ایک پورا جہان روشن کیا۔ راچور کی گرم دھوپ، بازاروں کی رونق اور مقامی لوک کہانیوں کی مدھم خوشبو نے ظفر کے اندر فن کی بنیادیں رکھ دیں۔ 1979 میں جب وہ بنگلورو آئے اور یو وی سی ای میں آرکیٹیکچر کی تعلیم شروع کی تو شہر کے تھیٹر نے اُن کے اندر چھپی ہوئی شخصیت کو جگا دیاسمرتھا، سامودایا اور بنگلور لِٹل تھیئٹر جیسے گروپس نے انہیں وہ پلیٹ فارم دیا جہاں سے ان کی اصل آواز ابھرنی شروع ہوئی۔

اسی دوران اُن کی ملاقات شانکر ناگ سے ہوئی اور انہوں نے "مالگڑی ڈیز" کے 13 ایپی سوڈز کے ڈائیلاگ لکھے۔ یہ وہ تجربہ تھا جس نے انہیں لفظ اور آواز دونوں کی طاقت کا احساس دلایا۔ لیکن شاید زندگی نے اُن کے لیے ابھی ایک اور موڑسنبھال رکھا تھا، کیونکہ 1984 میں والد کی موت کی خبر کے درمیان اسٹیج پر ادا کیا گیا اُن کا وہ یادگار کردار نہ صرف اُن کی زندگی بدل گیا بلکہ فنکارانہ عزم کی نئی تعریف بھی قائم کر گیا۔

ایک دن بس کے سفر میں ان کے برابر بیٹھے کرناٹک ناٹک اکیڈمی کے بزرگ آر ناگیش نے کہا کہ تمہاری آواز امیتابھ بچن جیسی ہےلیکن اسے تراشنے کی ضرورت ہے۔ غربت کے دن تھے، لیکن اُس لمحے نے صرف حوصلہ نہیں دیا، بلکہ راستہ دکھا دیا۔ پھر پہلا اشتہار ملا صرف 50 روپے کا لیکن اس 50 روپے میں ظفر کے مستقبل کے ایک ہزار دروازے چھپے تھے۔اسی دوران ایک انگریز خاتون نے "وائس موڈولیشن" پر لکچر دیا، اور ظفر محی الدین اس علم میں یوں ڈوبے کہ خاموشی کا بھی وزن سمجھنے لگے۔ دلیپ کمار کے وقفوں، سناٹے اور مکالموں کے درمیان چھپی گہرائی ان کے فن کا حصہ بنتی گئی۔ کئی سال بعد  ایک ڈاکیومنٹری کے لیے  وہی ناگیش دوبارہ اُن کی زندگی میں لوٹے۔ ظفر نے فیس لینے سے انکار کیا، کیونکہ اس ایک جملے نے اس وقت ان کی دنیا بدل دی تھی لیکن ناگیش نے احترام کے طور پر انہیں باقاعدہ معاوضہ دیا۔

یو پی ایس سی میں انتخاب ہوا، دہلی میں پروقار عہدہ ملا، لیکن دل نے کہا نہیں۔۔۔ یہ راستہ نہیں۔ اور انہوں نے سب چھوڑ کر اپنی آواز کو اپنا مستقبل بنا لیا۔ 1992 سے 1997 تک ہندوستانی فضائیہ میں ڈیپٹی آرکیٹیکٹ رہے، پھر "ظفر ایسوسی ایٹس" قائم کیا، لیکن ان کی اصل پہچان وہ آواز بنی جو دس زبانوں میں گونجی، دستاویزی فلموں میں بسی، مذہبی مقامات کی رہنمائیوں میں سنائی دی، اور دوردرشن کے "سواراج نامہ" جیسے بڑے پروجیکٹس میں امر ہوگئی۔