جھومور دیب/ شیلانگ

میگھالیہ کی پہاڑیوں میں جو ایک عیسائی اکثریتی ریاست ہے اور جہاں کی قبائلی تہذیبیں اور مادری نظامِ وراثت اپنی پہچان رکھتے ہیں، سیداللہ نونگرم ایک نایاب اور قابلِ ذکر شخصیت کے طور پر نمایاں ہیں۔ وہ ایک کھاسی مسلمان رہنما ہیں جنہوں نے اپنی پوری زندگی فرقہ وارانہ ہم آہنگی کے فروغ، پسماندہ طبقات کی فلاح و بہبود اور دوہری شناخت کے تصور کی نئی تعریف کے لیے وقف کر دی۔

شیلاونگ مسلم یونین(SMU)کے جنرل سیکریٹری کی حیثیت سے، جس عہدے پر وہ 1982 سے فائز ہیں، نونگرم نے اس تنظیم کو زوال سے نکال کر سماجی فلاح، تعلیم اور بین المذاہب مکالمے کے  ایک اہم پلیٹ فارم میں تبدیل کر دیا۔ ان کی میراث صرف اُن اداروں میں نہیں جنہیں انہوں نے تعمیر کیا بلکہ اُن پلوں میں بھی ہے جو انہوں نے قبائل اور مذاہب، روایت اور جدیدیت کے درمیان قائم کیے۔

اقلیت کے اندر ایک برادری

اگرچہ میگھالیہ کو اکثر ایک یکساں قبائلی عیسائی ریاست کے طور پر دیکھا جاتا ہے،حقیقت اس سے کہیں زیادہ پیچیدہ ہے۔2011 کی مردم شماری کے مطابق ریاست کی 4.4 فیصد آبادی مسلمان ہے۔ ان میں زیادہ تر بنگالی مسلمان ہیں جو برطانوی دور یا تقسیم کے بعد یہاں آ بسے، لیکن اس کے ساتھ ایک کم معروف کمیونٹی بھی ہے۔ کھاسی مسلمان۔ یہ وہ قبائلی لوگ ہیں جنہوں نے کئی نسلیں پہلے اسلام قبول کیا تھا،آج بھی مادری نظام، کھاسی زبان اور مقامی سماجی رسومات پر عمل کرتے ہیں۔ سیداللہ نونگرم میگھالیہ کے قدیم ترین کھاسی مسلمان خاندانوں میں سے ایک سے تعلق رکھتے ہیں۔ ان کے والدین، مرحومہ سُبرتن بی بی نونگرم اور مرحوم ایس کےعبداللہ، نے انہیں ایسے گھرانے میں پرورش دی جہاں قبائلی روایات اور اسلامی عقائد میں مکمل ہم آہنگی تھی۔نونگرم پُرعزم انداز میں کہتے ہیں،کھاسی اور مسلمان دونوں ہونا کوئی تضاد نہیں۔ ہماری ثقافت اس زمین میں جڑی ہوئی ہے اور ہمارا دین ہمیں سب کا احترام سکھاتا ہے۔

سال1905 میں قائم ہونے والی شیلاونگ مسلم یونین آل انڈیا مسلم لیگ سے بھی قدیم ہے۔ اس کی بنیاد اس وقت پڑی جب شیلاونگ کے مسلمان تعداد میں کم لیکن تعلیمی و سماجی کاموں کے ذریعے اپنی موجودگی منوانے کے خواہاں تھے۔ اس کی تاریخی اہمیت اُس وقت ثابت ہوئی جب بھارت کے پانچویں صدر فخرالدین علی احمد نے 1964 میں اس کے پہلے صدر کی حیثیت سے خدمات انجام دیں۔ نونگرمSMU کے ابتدائی دنوں کو یاد کرتے ہیں کہ میں ابھی طالب علم تھا جب میں نے اس کی سرگرمیوں میں حصہ لینا شروع کیا۔ فخرالدین علی احمد نے مجھ سے کمیونٹی ویلفیئر پر طویل بات چیت کی۔ اس گفتگو نے میری زندگی کا رخ متعین کیا۔1982 میں جب انہوں نے جنرل سیکریٹری کا عہدہ سنبھالا توSMU بکھراؤ کا شکار تھی۔ اس کی جائیدادیں ناجائز قبضوں اور بدحالی کی نذر ہو چکی تھیں۔ گیسٹ ہاؤس اور یتیم خانہ خستہ حال تھے۔ عیدگاہ میدان، جو کبھی مذہبی اہمیت رکھتا تھا، ویرانی کی علامت بن چکا تھا۔

نونگرم نے خاموش عزم کے ساتھ قیادت سنبھالی۔ ان کی زیر قیادتSMU کی ایسی بحالی ہوئی جس کی شمال مشرقی بھارت میں مثال کم ملتی ہے۔ اس کی سب سے نمایاں علامت "مدینہ مسجد" ہے،شیلاونگ کے وسط میں واقع ایک شاندار مسجد،جو اب پورے شمال مشرق میں سب سے بڑی ہے۔ یہ صرف عبادت گاہ نہیں بلکہ دینی تعلیم کا مرکز، نادار بچوں کے لیے اسکول اور سائنس، آرٹس و ٹیکنالوجی کے مضامین پڑھانے والا جدید کالج بھی ہے۔ان کا نظریہ سادہ مگر انقلابی تھاکہ مذہبی ادارے صرف ایک گروہ نہیں، پوری سوسائٹی کی خدمت کے لیے ہونے چاہئیں۔

سیاسی میدان میں خدمت

نونگرم کا کامSMU کی حدود تک محدود نہ رہا۔ 1993 میں وہ میگھالیہ اسمبلی کے لیے منتخب ہونے والے پہلے اور واحد کھاسی مسلمان بنے، جہاں انہوں نے راجابالا حلقے کی نمائندگی کی،یہ علاقہ مسلم اکثریتی ہے۔ کابینہ کے وزیر کے طور پر انہوں نے اقلیتی حقوق، قبائلی بہبود اور تعلیم تک رسائی کی بھرپور وکالت کی۔ ان کی نمایاں کامیابیوں میں"اُمشرپی کالج" کا قیام بھی ہے، جہاں آج 3500 سے زائد طلبہ مختلف سماجی و معاشی پس منظر سے تعلیم حاصل کر رہے ہیں۔تعلیم کو رکاوٹیں توڑنی چاہئیں، ذات، مذہب یا قبیلے تک محدود نہیں ہونا چاہیے۔

فرقہ وارانہ ہم آہنگی کا فروغ

نونگرم "شیلاونگ آل فیتھ فورم" کے بانی رکن ہیں،جوایک بین المذاہب پلیٹ فارم ہے جس میں عیسائی، مسلم، ہندو، سکھ، بدھ اور مقامی عقائد کے رہنما شامل ہیں۔ یہ فورم ریاست میں کسی بھی قسم کے مذہبی تناؤ کے موقع پر پرامن ماحول بحال کرنے میں کامیاب رہا ہے۔ نونگرم کہتے ہیں"ہم اس زمین کے امن کے محافظ ہیں۔ مذہب کو کبھی تفریق کا ذریعہ نہیں بننا چاہیے۔" ان کے امن اور مکالمے کے پیغام نے انہیں ان کے مخالفین تک میں احترام دلایا ہے۔

کھاسی شناخت اور اسلامی اقدار کا امتزاج

نونگرم کی زندگی کا سب سے حیرت انگیز پہلواُن کی دوہری شناخت کا توازن ہے۔ وہ ایک عملی مسلمان ہیں لیکن کھاسی روایات، خصوصاً مادری نظامِ وراثت سے بھی گہری وابستگی رکھتے ہیں۔میں اپنی ماں کے قبیلے کا نام لیتا ہوں۔ میرے بچے بھی اپنی ماں کے قبیلے کا نام لیتے ہیں۔ ایسا ہمیشہ سے ہوتا آیا ہے۔ اسلام مجھے ماں کا احترام سکھاتا ہے،کھاسی ثقافت خواتین کی نسل کو عزت دیتی ہے۔ میں دونوں کا لحاظ رکھتا ہوں۔اپنی ذاتی و عوامی زندگی میں نونگرم نے وہ توازن پیدا کیا ہے جس کی مثال کم ملتی ہے۔ ان کے خطبات قرآن کی آیات سے شروع ہو کر اکثر ماحولیاتی تحفظ، لڑکیوں کی تعلیم یا ہمسائیگی میں امن کی اپیل پر ختم ہوتے ہیں۔

قیادت کی خاموش وراثت

ستر کی دہائی میں قدم رکھنے کے باوجود نونگرم آج بھیSMU کی میٹنگز میں شرکت کرتے، تعلیمی منصوبے چلاتے اور بین المذاہب فورمز میں گفتگو کرتے ہیں۔ مگروہ اپنی کامیابیوں کا کریڈٹ خود لینے کے بجائے کہتے ہیں ۔ یہ میرے بارے میں نہیں۔ یہ اس بارے میں ہے کہ کھاسی مسلمان، دراصل تمام کمیونٹیز،میگھالیہ کے مستقبل میں باعزت مقام حاصل کریں۔فرقہ واریت اور سخت ہوتی شناختوں کے اس دور میں، سیداللہ نونگرم کی زندگی ایک اور کہانی سناتی ہے۔ شمولیت، جڑت اور خاموش طاقت کی کہانی۔ وہ صرف کھاسی اور مسلم دنیا کے درمیان پل نہیں بلکہ وہاں راستے بنانے والے ہیں جہاں پہلے کوئی راستہ نہیں تھا۔