دانش علی: سری نگر 

برف سے ڈھکی وادیوں میں، ایک آواز کشمیری لوک موسیقی کی روایت کو زندہ رکھے ہوئے ہے،وہ آواز ہے سرور بلبل کی، جو ایک معروف نعت خواں، شاعر اور ثقافتی روایات کے امین ہیں۔"میں حضور پاکؐ کی مدح سرائی کو اپنے لیے ایک سعادت سمجھتا ہوں، یہ صرف موسیقی نہیں -یہ عبادت ہے۔

ان خیالات کا اظہار ممتاز نعت خواں سرور بلبل نے کیا ،وہ آواز-دی وائس" سے بات کررہے تھے ،نعت خواں کی حیثیت سے سرور بلبل نے روحانی گہرائی کو فن کے ساتھ جوڑ کر نہ صرف ایک نئی پہچان قائم کی ہے بلکہ وادی کے قدیم فنون کو بھی نئی زندگی دی ہے۔ 53 سالہ سرور بلبل آج ایک ایسا نام بن چکے ہیں جو عقیدت، فن، اور تہذیبی شعور کا سنگم ہے۔اس منفرد آواز کے پیچھے ایک بھرپور ثقافتی ورثہ ہے جو ان کے والد غلام نبی شاہ "بلبل" سے شروع ہوتا ہے۔ غلام نبی شاہ بھی ایک ممتاز لوک گلوکار تھے، جن کی مدھُر آواز نے ہندوستان کے مختلف حصوں میں جموں و کشمیر کی ثقافت کی نمائندگی کی۔

سن 1966 میں سرینگر میں ایک دل موہ لینے والی پرفارمنس کے بعد اس وقت کے وزیر اعلیٰ بخشی غلام محمد نے غلام نبی شاہ کو "بلبل" کا لقب دیا ۔ ان کی نائٹنگیل جیسی آواز کے اعتراف میں۔سرور بلبل نے صرف سات سال کی عمر میں اپنے والد کی رہنمائی میں موسیقی کی تربیت شروع کی۔ وقت کے ساتھ انہوں نے نہ صرف اپنے والد کا نام، بلکہ ان کا ورثہ اور ذمہ داری بھی سنبھالی۔اگرچہ ابتدا میں انہوں نے کلاسیکی اور لوک موسیقی کی تربیت حاصل کی، لیکن رفتہ رفتہ انہوں نے نعتیہ کلام کی طرف رخ کیا اور جلد ہی وادی بھر میں عقیدت مندوں کے دلوں میں گھر کر گئے۔

ان کے نعتیہ کلام "غم زداں دل پھلن، خدا بوزن" ۔ ایک دردناک مناجات ۔ اور "نبیہ برحق رسول انہ کھ" کو عقیدت و روحانیت کے حسین امتزاج کی بنا پر بہت پسند کیا جاتا ہے۔ان کی پُر اثر آواز نسلوں کے روحانی جذبات کو جوڑتی ہے اور نوجوانوں کو فن کے ذریعے ایمان سے قریب کرتی ہے۔سرور بلبل نے اپنے آبائی علاقے رفیع آباد میں "بلبل اکیڈمی آف پرفارمنگ آرٹس(BAPA)" کے قیام سے اپنے فن اور ورثے کو محفوظ رکھنے کی عملی کوشش کی ہے۔ یہاں 30 سے زائد طلبہ، جن میں سے اکثر دیہی اور کمزور طبقے سے تعلق رکھتے ہیں، کشمیری کلاسیکی، صوفی اور نعتیہ موسیقی کی تربیت حاصل کر رہے ہیں۔"ہر سر ہماری تاریخ کا امین ہے،" وہ کہتے ہیں۔ "بی اے پی اے میں ہم صرف راگ نہیں سکھاتے، بلکہ اپنی شناخت کو زندہ رکھتے ہیں۔"

یہ اکیڈمی نہ صرف موسیقی کی تعلیم دے رہی ہے بلکہ روایتی آلات موسیقی کو دوبارہ زندہ کرنے، قدیم دھنوں کو دریافت کرنے، اور زبانی ورثے کو محفوظ کرنے کا بھی بیڑا اٹھائے ہوئے ہے۔ سرور بلبل کی قیادت میں یہ ادارہ کشمیری ثقافت کے تحفظ کا قلعہ بن چکا ہے۔سرور بلبل ایک معروف شاعر بھی ہیں اور رفیع آباد ادبی مرکز سے وابستہ ہیں۔ ان کی شاعری میں محبت، روحانیت اور بھائی چارے جیسے موضوعات نمایاں ہوتے ہیں۔سن 1992 میں ان کی ایک جذباتی نظم "دمہ آک یتھی یمپری منی گوبرو" ۔ ماؤں کو خراج تحسین ۔ دور درشن پر نشر ہوئی، جو آج بھی لوگوں کی یادوں میں محفوظ ہے۔اگرچہ وہ مزاجاً نہایت عاجز اور خاموش طبع ہیں، لیکن ان کی صلاحیتوں کو کشمیر سے باہر بھی سراہا گیا ہے۔ سن 2006 میں انہیں گجرات میں اُس وقت کے وزیر اعلیٰ نریندر مودی نے ان کی روحانی اور ثقافتی خدمات کے اعتراف میں ایوارڈ سے نوازا۔انہیں سابق صدر جمہوریہ ڈاکٹر اے پی جے عبدالکلام کے سامنے پرفارم کرنے کا بھی اعزاز حاصل ہوا ۔ ایک تجربہ جسے وہ "ناقابلِ فراموش اور بے حد عاجزانہ" قرار دیتے ہیں۔

ایک ایسے دور میں جب ڈیجیٹل میڈیا اور عالمی اثرات مقامی ثقافتوں کو دبائے جا رہے ہیں، سرور بلبل کشمیر کے روحانی اور فنکارانہ سرمائے کے نگہبان ہیں۔ انہوں نے کبھی اپنی صلاحیتوں کو تجارتی بنانے کی کوشش نہیں کی اور آج بھی سادہ زندگی گزار رہے ہیں، اپنی کمیونٹی اور ثقافت سے جڑے ہوئے۔"میرا مقصد خدمت ہے ۔ اپنے معاشرے، اپنی ثقافت اور اپنے خالق کی خدمت،" وہ کہتے ہیں۔جیسا کہ ان کے ایک شاگرد نے کہاکہ"استاد سرور بلبل ہمیں صرف موسیقی نہیں سکھا رہے ۔ وہ ہمیں با مقصد زندگی جینا سکھا رہے ہیں۔"ہر نعت، ہر شاگرد کی تربیت، اور ہر شعر میں، سرور بلبل اس بات کو یقینی بنا رہے ہیں کہ کشمیر کی روحانی دھنیں اور تہذیبی حکمت کبھی خاموش نہ ہوں۔