دانش علی:سرینگر

 کرکٹ کے میدان میں کشمیر کی ایک خاتون کی کامیابی کا سفر آج معاشرے کے لیے ایک مثال بن گیا ہے یہ  کشمیر کی ایک ایسی کرکٹ کوچ کی ہمت اور حوصلہ کی کہانی ہے جس نے نہ صرف وادی کی سوچ  میں شگاف لگایا  بلکہ روایت پسندوں کو بھی اپنی محنت اور کامیابی سے قائل کرلیا کہ خواتین کے لیے ہر میدان اتنا ہی کھلا ہے جتنا کہ مردوں کے لیے ہوتا ہے ۔ جی ہاں ! ہم بات کررہے ہیں سکینہ اختر کی ۔ جو جموں و کشمیر سے تعلق رکھنے والی پہلی خاتون قومی کرکٹ کوچ تھیں۔اپنے کیریئر کے آغاز میں وہ کشمیر یونیورسٹی کے کرکٹ گراؤنڈز میں اکیلی نظر آتی تھیں ۔ علاقے کی واحد خاتون جو نوجوان کرکٹرز کو تربیت دیتی تھیں، اور اسی کے ساتھ ساتھ گہری جمی ہوئی سماجی روایات اور پابندیوں سے بھی لڑ رہی تھیں۔برسوںکی محنت، استقامت اور کھیل سے بے پناہ محبت کے باعث وہ آج ہندوستانکی بہترین قومی کوچز میں شمار ہوتی ہیں۔

سرینگر کی 42 سالہ رہائشی سکینہ کی کہانی بے مثال ہمت، خاموش بغاوت اور ایسی لگن کی داستان ہے جو ماند نہ پڑ سکی۔وہی سکینہ جو ایک زمانے میں سماجی دباؤ کے باعث لڑکوں کے ساتھ کرکٹ کھیلنے سے روک دی گئی تھیں، آج ہندوستانی خواتین کرکٹ کے مستقبل کو سنوار رہی ہیں۔

سکینہ کا سفر سرینگر کے منوار آباد کی تنگ گلیوں سے شروع ہوا، جہاں وہ لڑکوں کی کرکٹ ٹیم کی واحد لڑکی تھیں۔انہوں نے Awaz-The Voiceسے بات کرتے ہوئے کہاکہ وہیں میں نے بیٹ گھمانا، کیچ لینا اور باؤنسرز کا سامنا کرنا سیکھا ۔ اور زندگی نے بھی مجھے خوب باؤنسرز مارے۔انہیں پہلا بڑا موقع 1998 میں ملا، جب انہوں نے دہلی میں اپنا پہلا انڈر-19 قومی میچ کھیلا اور ’ویمن آف دی سیریز‘ قرار پائیں۔ مگر جب حالات سازگار دکھائی دینے لگے، تو خاندانی اور سماجی دباؤ کے باعث انہیں کھیل سے پیچھے ہٹنا پڑا۔ مگر کھیل کو چھوڑنے کے بجائے انہوں نے کوچنگ کا راستہ چن لیا۔اگرچہ شروع میں انہیں ادارہ جاتی معاونت کم ملی، مگر سکینہ نے باضابطہ کوچنگ کی تربیت حاصل کی اور نوجوان کھلاڑیوں کو کرکٹ کے اسرار و رموز سکھانے لگیں۔

رفتہ رفتہ ان کی محنت کو کشمیر یونیورسٹی نے بھی سراہا، جہاں 2017 میں انہیں کرکٹ کوچ کے طور پر مقرر کیا گیا۔ اگلے آٹھ برسوں تک انہوں نے لڑکوں اور لڑکیوں ۔ دونوں کو تربیت دی، اور سخت مگر مہربان استاد کے طور پر پہچانی جانے لگیں۔وہ کہتی ہیں کہ  بہت سی لڑکیاں جو میرے پاس آئیں، انہیں اپنے لیے کھیل کے میدان میں جگہ ہونے کا یقین نہیں تھا۔ میں انہیں کہتی ۔ مجھے دیکھو۔ اگر میں کر سکتی ہوں تو تم بھی کر سکتی ہو۔ان کی زیر نگرانی کئی انڈر-19 ریاستی کھلاڑی تیار ہوئیں، جن میں سے کچھ اب زونل ٹیموں میں شامل ہیں اور قومی سلیکشن کمیٹی کی توجہ حاصل کرنے کے قریب پہنچ چکی ہیں۔اس سال سکینہ کی کھیل کے لیے مسلسل خدمات کو قومی سطح پر بھی سراہا گیا۔

بی سی سی آئی(BCCI) نے انہیں انڈر-19 ویمن ٹیم کے اسسٹنٹ کوچ کے طور پر مقرر کیا، اور اب وہ سینئر خواتین قومی اسکواڈ کے کوچنگ پینل میں بھی شامل ہو چکی ہیں ۔ جموں و کشمیر کی کسی خاتون کے لیے یہ پہلا تاریخی موقع ہے۔

سکینہ کی کامیابی نے وادی میں ایک نئی امید جگا دی ہے۔ سرینگر میں اب نئی کرکٹ اکیڈمیاں کھولی جا رہی ہیں جہاں لڑکیوں کے لیے علیحدہ سیشن ہوتے ہیں۔ کبھی اکیلی لڑکی رہنے والی سکینہ کے پیچھے آج درجنوں لڑکیاں اس کے نقش قدم پر چل رہی ہیں۔وہ کہتی ہیںکہ جب میں نے آغاز کیا تو لوگ کہتے تھے کہ لڑکیوں کا کرکٹ گراؤنڈ پر کیا کام؟ آج وہی لوگ اپنی بیٹیوں کو میرے پاس تربیت کے لیے بھیجتے ہیں۔آنے والے دنوں میں سکینہ کشمیر میں لڑکیوں کے لیے ایک رہائشی کرکٹ اکیڈمی قائم کرنے کا خواب دیکھ رہی ہیں۔ وہ کہتی ہیں کہ ہمیں انفراسٹرکچر، مواقع اور سب سے بڑھ کر ۔ یقین کی ضرورت ہے۔ اگر میں چند لڑکیوں میں بھی یہ یقین جگا سکوں، تو میرا کام مکمل ہو جائے گا۔

وہ اپنی زندگی کے اس سفر کو اپنی کتاب "Beyond the Boundary"میں بھی رقم کرنا چاہتی ہیں، جس میں سرینگر کی گلیوں سے قومی کرکٹ اسٹیج تک کے سفر کی داستان ہو گی۔ سکینہ اختر صرف ایک کوچ نہیں ۔ وہ راستہ دکھانے والی، رہنما اور زندہ مثال ہیں کہ خواب خواہ کتنے ہی دور کیوں نہ ہوں، ایک دن حقیقت بن سکتے ہیں۔