تحریر: بھکتی چالک

 مہاراشٹر کے تھانے میں ممبرا کی تنگ اور گنجان گلیوں میں صبا خان ایک روایت شکن کے کردار میں ابھری ہیں ۔ایک سماجی کارکن اور این جی او ’پرچم‘ کی شریک بانی کے طور پر انہوں نے فٹبال جیسے کھیل کو، جو اکثر قدامت پسند برادریوں میں لڑکیوں سے منسوب نہیں کیا جاتا، نوجوان لڑکیوں کو بااختیار بنانے اور ان کے اعتماد کو بڑھانے کے لیے ایک ہتھیار بنایا۔یہ سفر بالکل بھی آسان نہیں تھا۔ والدین کو قائل کرنا، کھیلوں میں لڑکیوں کی شمولیت پر ہونے والی تنقید کا سامنا کرنا،ایک مخصوص پریکٹس گراؤنڈ کا بندوبست کرنا سب کچھ ایک سخت جدوجہد تھی۔صبا یاد کرتی ہیں،میں نے ممبرا کی عورتوں کے ساتھ اعتماد کا رشتہ قائم کیا تھا۔ یہی اعتماد آگے چل کر تبدیلی کی بنیاد بنا۔

پختہ ارادے کے ساتھ صبا نے گھروں کا دورہ کیا اور صبر سے والدین کو یہ سمجھانے کی کوشش کی کہ فٹبال ان کی بیٹیوں کے لیے نئے دروازے کھول سکتا ہے۔ ان کی محنت رنگ لائی،بالآخر لڑکیوں کی ایک فٹبال ٹیم تشکیل دی گئی۔ تاہم، اپنا کھیل کا میدان حاصل کرنا اب بھی ایک بڑا چیلنج تھا۔اب پچاس کے قریب عمر کی صبا خان کا اثر صرف کھیل تک محدود نہیں رہا۔ ان کا مشن صنفی برابری، تعلیم اور مذہبی ہم آہنگی کو بھی شامل کرتا ہے، اور وہ ممبئی کے نوجوانوں کو معاشرتی رکاوٹوں سے آگے خواب دیکھنے کی تحریک دیتی ہیں۔

صبا خان ایک ترقی پسند مسلم خاندان میں مدنپورہ میں پیدا ہوئیں اور ممبرا میں پلی بڑھیں، جو ایک اکثریتی مسلم علاقہ ہے۔ ان کی والدہ ایک استاد تھیں جبکہ والد ریلوے میں ملازم تھے۔ انہوں نے صبا اور ان کے تین بہن بھائیوں کی تعلیم کو ہمیشہ ترجیح دی۔تعلیم پر یہی ابتدائی زور ان کے سفر کی بنیاد بنا۔ صبا نے اکنامکس میں بیچلر ڈگری حاصل کی اور بعد میں ٹاٹا انسٹی ٹیوٹ آف سوشل سائنسز سے سماجی خدمات میں ماسٹرز کیا۔ یوں ان کی زندگی سماجی تحریکوں کے لیے وقف ہو گئی۔صبا کی خواتین کو بااختیار بنانے کی لگن ممبرا میں اور بھی گہری ہوئی، جہاں وہ قریبی سطح پر برادری کے ساتھ کام کرنے لگیں۔ ایک اہم موڑ 2012 میں آیا جب انہوں نے تنظیم ’میجک بس‘ کے ساتھ مل کر لڑکیوں کے لیے فٹبال تربیت کا آغاز کیا۔

لڑکیوں کے جوش سے متاثر ہو کر، صبا نے 2013 میں ’پرچم‘ کو باضابطہ طور پر این جی او کے طور پر رجسٹر کروایا۔ وہ بتاتی ہیں، ’’میجک بس کی ایک دوست نے فٹبال ٹریننگ شروع کرنے کی تجویز دی۔ جب میں نے لڑکیوں سے بات کی، تو وہ شامل ہونے کے لیے بے حد پرجوش تھیں۔‘کھلاڑیوں کو بھرتی کرنے کے لیے صبا نے مقامی اسکولوں اور کالجوں میں پمفلٹ تقسیم کیے۔ لیکن پریکٹس کے لیے جگہ حاصل کرنا ہمیشہ ایک جدوجہد رہا۔ اکثر لڑکیوں کو لڑکوں کے ساتھ جگہ بانٹنی پڑتی تھی، جس کے خلاف صبا نے دستخطی مہم کا آغاز کیا۔صبا کہتی ہیں  کہ یہ مہم غیر معمولی طور پر کامیاب رہی: تقریباً 1,000 خواتین نے اس پر دستخط کیے۔

ہم نے یہ درخواست ایم ایل اے جتیندر اوہاد کو پیش کی،وہ حیران ضرور ہوئے لیکن انہوں نے ہمارا ساتھ دیا اور کمشنر اسیم گپتا سے ملاقات کروائی، جنہوں نے بالآخر ایک میدان مختص کیا۔تاہم رکاوٹیں اب بھی باقی ہیں۔ایک دہائی گزرنے کے بعد بھی یہ میدان اکثر عوامی تقریبات کے لیے استعمال ہوتا ہے، جس سے ہماری پریکٹس متاثر ہوتی ہے،ہم نے دوبارہ ایم ایل اے سے رجوع کیا ہے، اور اگر ضرورت پڑی تو ہم احتجاج کے لیے بھی تیار ہیں۔صبا کا ماننا ہے کہ فٹبال مذہب اور ثقافت کی سرحدوں کو عبور کرنے کی طاقت رکھتا ہے۔ آج کے مذہبی تناؤ کے ماحول میں، ہم کھیل کے ذریعے ہم آہنگی پیدا کرنا چاہتے ہیں۔

پرچم‘ ہندو اور مسلم لڑکیوں کی مخلوط ٹیمیں بنا کر تعصبات کو ختم کرتا ہے اور باہمی سمجھ بوجھ کو فروغ دیتا ہے۔ فٹبال ایک ٹیم کا کھیل ہے،اکٹھے کھیلنے سے دوستی اور احترام جنم لیتا ہےابتدائی دنوں میں ٹیم میں 40 لڑکیاں تھیں،لیکن ان کے زیادہ تر خاندانوں کو یہ معلوم تک نہ تھا کہ وہ کھیل رہی ہیں۔کچھ لڑکیاں اتنی پرجوش تھیں کہ والدین سے جھوٹ بولتی تھیں کہ وہ پڑھنے جا رہی ہیں، صرف پریکٹس میں شامل ہونے کے لیے، صبا ہنستے ہوئے کہتی ہیں۔والدین کے خدشات کو دور کرنے کے لیے صبا نے فٹبال تربیت کے ساتھ انگریزی کلاسیں شروع کیں۔ یہ دانشمندانہ قدم والدین کے اعتماد کا باعث بنا، اور وہ اپنی بیٹیوں کی کھیلوں میں دلچسپی کی حمایت کرنے لگے۔ہندوستان جیسے مردانہ غلبے والے معاشرے میں، خاص طور پر قدامت پسند طبقوں میں، خواتین کو کھیلوں میں شرکت کے لیے سخت مزاحمت کا سامنا کرنا پڑتا ہے۔ صبا نے اس چیلنج کا ڈٹ کر مقابلہ کیا۔انہوں نے یہ جدوجہد اپنی کتاب فٹبالرز آف پرچم میں قلمبند کی ہے، جس میں 12 ہندو اور مسلم لڑکیوں کی کہانیاں شامل ہیں جنہوں نے سماجی توقعات کو چیلنج کر کے فٹبال کھیلنا شروع کیا۔ یہ کہانیاں عزم اور حوصلے کی زندہ مثالیں ہیں۔

صبا نے کہا  کہ ایک عام مسئلہ لباس کا بھی تھا۔ کئی والدین شارٹس پر اعتراض کرتے تھے،ہم نے کبھی لباس پر کوئی پابندی نہیں لگائی۔ چاہے کوئی لڑکی حجاب پہنے یا روایتی لباس، اصل بات ان کی شمولیت ہے۔ یہی شمولیت پسندی نے اتر پردیش اور بہار جیسی ریاستوں کی لڑکیوں کو بھی جذب کیا، جہاں وہ اپنے ثقافتی اقدار کے ساتھ آزادی سے کھیل سکتی تھیں۔صبا جانتی تھیں کہ صرف کھیل کافی نہیں، اس لیے انہوں نے زندگی کے بنیادی ہنر سکھانے والے پروگرامز بھی شروع کیے  جیسے کمپیوٹر لٹریسی، پبلک اسپیکنگ اور شہری تعلیم۔

وہ مزید کہا کہ ممبرا میں غربت اکثر معیاری تعلیم تک رسائی کو محدود کرتی ہے،پرچم وہ سب سکھاتا ہے جو اسکول اکثر چھوڑ دیتے ہیں،ہم خوداعتماد، اہل نوجوان تیار کر رہے ہیں جو قیادت کے قابل ہوں۔اُروج منصوبے کے ذریعے، جو چھ سال سے جاری ہے، طلبہ سیاسی و سماجی رہنماؤں سے ملاقات کرتے ہیں تاکہ جمہوریت، آئین اور اپنے حقوق کو بہتر طور پر سمجھ سکیں، یوں وہ باشعور شہری بن سکیں۔

صبا کی وابستگی سویتری-فاطمہ فاؤنڈیشن کے ذریعے خواتین کو بااختیار بنانے تک وسیع ہے۔ انہوں نے گفتگو نامی ایک پرسکون جگہ بنائی جہاں خواتین آ کر سکون سے وقت گزار سکتی ہیں، دوستیاں قائم کر سکتی ہیں، کتابیں، کھیل اور تفریح سے لطف اندوز ہو سکتی ہیں۔گفتگو ایک دوسرا گھر ہے،یہ وہ جگہ ہے جہاں عورتیں خود کو محفوظ، جڑی ہوئی اور بااختیار محسوس کرتی ہیں یہ فاؤنڈیشن معاشی خودمختاری کو بھی فروغ دیتی ہے۔ کئی مسلم خواتین، جنہیں باہر کام کرنے کی اجازت نہیں، یہاں مہندی، سلائی، اور بیگ بنانے جیسے ہنر سیکھتی ہیں۔ ان کے بنائے ہوئے مصنوعات ٹاٹا انسٹی ٹیوٹ کے اسٹال پر فروخت ہو چکے ہیں، صرف دو دن میں 22,000 کی آمدنی ہوئی۔

آج ممبرا کی لڑکیاں فٹبال کے میدان میں اعتماد سے کھیلتی ہیں، کچھ حجاب میں، کچھ روایتی لباس میں، اور یہ ثابت کر رہی ہیں کہ خواب اور ثقافت ساتھ ساتھ چل سکتے ہیں۔سب سے اہم بات یہ کہ نوجوان لڑکے اور لڑکیاں اب پرچم کی تحریک میں شامل ہو رہے ہیں، صبا کے شانہ بشانہ ایک زیادہ برابری اور شمولیت پر مبنی معاشرہ بنانے کے لیے کام کر رہے ہیں۔کھیل، تعلیم اور معاشی مواقع کے ذریعے، صبا خان نہ صرف زندگیاں بدل رہی ہیں بلکہ ممکنات کی نئی تعریف کر رہی ہیں۔