اونیکا مہیشوری | نئی دہلی

رانی خانم ایک قدامت پسند خاندان میں پیدا ہوئیں جہاں رقص اور گانے کو ناقابلِ قبول سمجھا جاتا تھا۔ مگر کتھک فنکاراؤں میں سے ایک بننے میں کامیاب رہیں۔ان کا خاموش مزاحمت سے لے کر عالمی سطح پر پہچان تک کا سفر ہمت، فن اور خود اعتمادی کی ایک حیرت انگیز داستان ہے۔رانی نہ صرف کتھک پر اپنی مہارت کے لیے مشہور ہیں بلکہ اس کلاسیکی فن کو بے آوازوں کی آواز بنانے کے لیے بھی سراہی جاتی ہیں۔
اپنی پیشکشوں کے ذریعے انہوں نے خواتین کے بااختیار بنانے اور اہم سماجی مسائل کو اجاگر کیا ہے۔وہ واحد ہندوستانی مسلمان کلاسیکی رقاصہ ہیں جنہوں نے اسلامی آیات اور صوفی بزرگوں کے کلام پر مبنی رقص تخلیق کیے ہیں۔اپنے رقص گروپ کے ساتھ وہ برطانیہ، اسپین، فرانس، جنوبی کوریا، ملائیشیا اور الجزائر جیسے ممالک میں پرفارم کر چکی ہیں۔

انہوں نے 1996 میں "آمد پرفارمنگ آرٹس سینٹر" کی بنیاد رکھی جو آج ہندوستان کے اہم ترین فنون لطیفہ کے اداروں میں شمار ہوتا ہے۔ان کی قیادت میں "آمد" نے ایسی بے شمار پیشکشیں کی ہیں جن کے موضوعات خواتین کے حقوق، صنفی مساوات، ایچ آئی وی/ایڈز سے متعلق آگاہی اور معذور افراد کی شمولیت جیسے اہم مسائل تھے۔یہ ادارہ وزارت ثقافت، سنگیت ناٹک اکیڈمی سے تسلیم شدہ ہے اور انڈین کونسل فار کلچرل ریلیشنز سے بھی وابستہ ہے۔ اس کا تعاون کٹھک کی قومی درسگاہ "کٹھک کیندر" کے ساتھ ہے تاکہ فنونِ لطیفہ کی تعلیم کو سب کے لیے قابلِ رسائی اور شمولیتی بنایا جا سکے۔

رانی کی کہانی بہار کے ضلع گوپال گنج سے شروع ہوئی جہاں بچپن میں ہی انہیں کتھک سے محبت ہو گئی۔انہوں نے برسوں تک خفیہ طور پر مشق کی، اپنے گھنگرو، ہارمونیم اور طبلہ چھپا کر اپنے شوق کو گھر والوں سے پوشیدہ رکھا۔جب گھر میں شادی کی بات چلی تو رانی نے روایت کے آگے جھکنے کے بجائے اپنے خواب کا تعاقب کرنے کا فیصلہ کیا۔اگرچہ ان کے خاندان نے براہ راست روک ٹوک نہیں کی مگر معاشرتی توقعات اور اندرونی کشمکش ہمیشہ ان پر اثرانداز رہیں۔

ابتدائی تعلیم مظفرپور میں مکمل کرنے کے بعد وہ تیسری جماعت میں دہلی منتقل ہوئیں۔بچپن ہی سے ان کی فطری صلاحیت اور موسیقی و حرکت سے گہرا تعلق نمایاں ہونے لگا۔انہوں نے 1978 میں وطن خان صاحب سے کتھک کی باضابطہ تربیت شروع کی اور بعد میں ریوہ ودیارتھی اور لیجنڈ پنڈت برجموہن مہاراج سے تعلیم حاصل کی۔گرو-ششیہ روایت کے لیے ان کا احترام آج بھی ان کے فن کا بنیادی ستون ہے۔

رانی خانم نے برسوں میں اپنی الگ شناخت قائم کی۔بطور کوریوگرافر اور پرفارمر انہوں نے ہندوستانی کلاسیکی رقص میں نئی راہیں کھولی ہیں۔"آمد" کے ذریعے ان کا کام دو ملین سے زیادہ افراد تک پہنچ چکا ہے ،پرفارمنس، ورکشاپس، فیسٹیولز اور تربیتی پروگراموں کے ذریعے۔یہ ادارہ نوجوان فنکاروں کو پیشہ ورانہ تربیت فراہم کرتا ہے، جن میں سے اکثر معاشی طور پر کمزور طبقات سے آتے ہیں اور اسکالرشپس کی مدد سے اپنے خواب پورے کرتے ہیں۔
یہ ادارہ معذور فنکاروں، خواتین اور محروم طبقات کے لیے روزگار کے مواقع بھی فراہم کرتا ہے۔

رانی کی سب سے زیادہ اثر انگیز تخلیقات میں صوفی موضوعات پر مبنی رقص، وہیل چیئر پر معذور فنکاروں کی پیشکشیں اور مسلم خواتین کے حقوق کے حق میں بنائے گئے کوریوگرافی شامل ہیں۔ان پیشکشوں کو دنیا بھر کے معزز مقامات اور فیسٹیولز میں پیش کیا گیا ہے۔ان کے گروپ کی سب سے بڑی بین الاقوامی پیشکش کوالالمپور میں ہوئی جس میں ملائیشیا کے بادشاہ، ملکہ اور وزیر اعظم نے شرکت کی۔لندن میں ان کے گروپ نے "سلام" انٹرنیشنل اسلامک آرٹس فیسٹیول میں عالمی شہرت یافتہ صوفی موسیقاروں اور فنکاروں کے ساتھ حصہ لیا۔دیگر معروف فیسٹیولز میں "نماستے فرانس"، "ایشیا ٹریڈیشنل سانگ اینڈ ڈانس فیسٹیول" (جنوبی کوریا)، "ٹراپیکل ڈانس فیسٹیول" (نیدرلینڈز) اور "ایریسنگ بارڈرز" (نیویارک) شامل ہیں۔یہ گروپ کینیڈا، آسٹریلیا، جاپان، سنگاپور، مشرق وسطیٰ، وسطی ایشیا اور شمالی افریقہ میں بھی ہندوستان کی نمائندگی کر چکا ہے۔

رانی نے ترکی، قاہرہ، بوسنیا اور مراکش کے صوفی موسیقاروں کے ساتھ اشتراک کیا ہے۔صوفی ازم کے حوالے سے ان کی روحانی سمجھ بوجھ بہت ذاتی نوعیت کی ہے۔ان کے مطابق صوفی ازم ایک مقدس باطنی راستہ ہے ، بالکل سناتن دھرم کی طرح ، یہ ایک طرزِ زندگی ہے نہ کہ کوئی مذہب یا رقص کی طرز۔اگرچہ وہ اسلامی فلسفہ کو کتھک میں شامل کرتی ہیں، مگر وہ "صوفی کتھک" کی اصطلاح کو نہیں مانتیں۔ان کا ماننا ہے کہ صوفی ازم کوئی رقص نہیں بلکہ ایک روحانی اظہار ہے۔ان کی یہی خصوصیت ہے جس کی بدولت انہوں نے کتھک کی ایک نئی لغت تخلیق کی جو اس کی اظہار کی صلاحیت کو وسعت دیتی ہے اور کلاسیکی روایت کا احترام بھی برقرار رکھتی ہے۔

رانی کا خاندان چشتی صوفی سلسلے سے وابستہ ہے۔ان کے صوفی اجتماعات، قوالی اور سماع کی محفلوں میں شرکت نے ان کی فنکارانہ بصیرت کو گہرائی بخشی ہے۔ان کی کوریوگرافی مراقبہ سے لبریز ہوتی ہے اور روح کے اپنے رب سے ملاپ کی جستجو کو حرکت اور لے کے ذریعے بیان کرتی ہے۔ان کے کام کو عام لوگوں سے لے کر قومی رہنماؤں تک سب نے سراہا ہے۔ان کی کوریوگرافی کو صدر، نائب صدر، وزیر اعظم، وزرائے اعلیٰ، گورنرز اور دیگر معززین نے سراہا ہے۔
انہوں نے 200 سے زیادہ رقص تخلیق کیے ہیں جو روایتی، جدید اور مسئلہ پر مبنی موضوعات پر مبنی ہیں۔ہندوستان اور دنیا کے آرٹ نقاد انہیں اپنے عہد کی سب سے اختراعی اور تاثراتی کتھک فنکار مانتے ہیں۔انہیں انڈین کونسل فار کلچرل ریلیشنز کے "آؤٹ اسٹینڈنگ کیٹیگری" میں شامل کیا گیا ہے اور دہلی دوردرشن کی طرف سے "ٹاپ کیٹیگری" آرٹسٹ تسلیم کیا گیا ہے۔

رانی خانم کو ان کی انقلابی خدمات کے صلے میں کئی باوقار ایوارڈز مل چکے ہیں، جن میں ویمن اچیومنٹ ایوارڈ (2022)، نیشنل یونٹی ایوارڈ (2017)، لوریل فیمنا ویمن ایوارڈ (2014) اور نیشنل ویمن ایکسیلینس ایوارڈ (2012) شامل ہیں۔انہیں نیویارک میں ایشین کلچرل کونسل کی طرف سے 2006 میں "ورلڈ ڈانس اینڈ اسلام فیلوشپ" اور وزارت ثقافت سے سینیئر فیلوشپ بھی مل چکی ہے۔1991 میں انہیں انڈیا فاؤنڈیشن کا "آؤٹ اسٹینڈنگ کتھک ڈانسر ایوارڈ" بھی دیا گیا۔

رانی کے لیے کتھک صرف فن نہیں بلکہ ایک روحانی سفر ہے۔ان کا کام اندرونی عقیدت کی مجسم شکل ہے، جو روح اور رب کے درمیان دائمی رقص کا اظہار کرتا ہے۔اپنے فن کے ذریعے انہوں نے کلاسیکی روایت اور عصری معنویت، روحانی گہرائی اور فنکارانہ جدت، اور ہندوستان کی مذہبی و ثقافتی شناختوں کے درمیان پُل باندھے ہیں۔رانی خانم کا ورثہ صرف ان کی دلکش حرکات میں نہیں بلکہ ان کے مضبوط پیغام میں ہے،کہ فن سرحدوں سے ماورا، روایات کو چیلنج کرنے والا اور شمولیت، آگاہی اور اتحاد کے لیے ایک طاقتور ذریعہ بن سکتا ہے۔