دولت رحمان/گوہاٹی

عرشل اختر نے سائیکل چلانا خود سیکھا تھا، جب ان کے والد نے آٹھویں جماعت میں انہیں ایک سائیکل تحفے میں دی۔ وہ ویک اینڈ پر اپنے دوستوں کے ساتھ قریبی علاقوں کی سیر پر نکلتے تھے۔ یہ سلسلہ کبھی کبھار جاری رہا، یہاں تک کہ انہوں نے 2001 میں گریجویشن مکمل کر لیا۔ نوکری شروع کرنے کے بعد انہوں نے سائیکل چلانا چھوڑ دیا، اپنی پہلی تحفے میں ملی سائیکل بیچ دی اور بالآخر ایک کار خرید لی۔ لیکن کار اور کارپوریٹ ملازمت کا تجربہ ان کے لیے زیادہ دلچسپ یا یادگار ثابت نہ ہوا۔ چنانچہ انہوں نے نوکری چھوڑ کر کاروبار کا آغاز کیا اور 2016 میں دوبارہ سائیکلنگ کی دنیا میں قدم رکھا۔

آج عرشل اختر صرف سائیکل سواروں میں ہی نہیں بلکہ پورے آسام کے عام لوگوں میں بھی ایک معروف چہرہ بن چکے ہیں۔ وہ اب ریاست بھر میں سائیکل چلا کر معاشرے میں مثبت پیغام عام کرتے ہیں اور تیزی سے ترقی کرتے شہر گوہاٹی میں سائیکل کو ایک معتبر ذریعہ نقل و حمل بنانے کے لیے رائے عامہ ہموار کرتے ہیں۔

2016 سے عرشل نے سائیکل کے ذریعے گوہاٹی کے اردگرد کے علاقوں کی کھوج شروع کی اور ویک اینڈ کی سیر کے دوران ہم خیال افراد سے رابطہ بڑھایا۔ انہوں نے سائیکلنگ کے واٹس ایپ گروپوں میں شمولیت اختیار کی اور مزید شوقین افراد سے ملاقات کی۔ 2017 کے وسط میں عرشل کو احساس ہوا کہ وہ سائیکلنگ کے ذریعے کچھ زیادہ کرنا چاہتے ہیں۔ ابتدا میں انہوں نے ویک اینڈ رائیڈز، خاص مواقع پر ریلیاں، ریسز اور بعد میں مہمات، مباحثے اور ماہرین کے ساتھ مذاکرے منعقد کرنے شروع کیے۔

2018 میں عرشل کو "بائیسکل میئر پروگرام" کے بارے میں پتہ چلا اور انہوں نے گوہاٹی اور سائیکلنگ کے لیے اپنے جذبے اور وژن پر مبنی تین صفحات پر مشتمل مضمون جمع کروایا۔ ایمسٹرڈیم میں قائم عالمی این جی او BYCS، جو شہروں میں سائیکلنگ کے ذریعے تبدیلی پر کام کرتی ہے، نے ان کے تین آن لائن انٹرویوز لیے اور انہیں اس منصب کے لیے موزوں پایا۔ این جی او نے ان سے مقامی سرگرم شہریوں کی سات سفارشات لانے کو کہا۔ عرشل نے 40 سے زیادہ لوگوں سے رابطہ کیا اور 20 کے قریب سفارشات حاصل کیں۔ 22 اپریل 2018 کو یومِ ارض کے موقع پر عرشل گوہاٹی کے پہلے بائیسکل میئر مقرر کیے گئے۔

عرشل نے ’آواز-دی وائس‘ کو خصوصی انٹرویو میں بتایا کہ اس نئی تقرری نے مجھے نہ صرف مقامی حکومت اور آسام بھر کے سائیکلنگ حلقوں سے جڑنے کا موقع دیا بلکہ یہ بھی سمجھنے کا موقع ملا کہ زیادہ تر لوگ سائیکلنگ کو صرف کھیل یا تفریح سمجھتے ہیں، نقل و حمل کا ذریعہ نہیں۔ اس ادراک نے مجھے پائیدار نقل و حمل، سرکاری اسکیموں اور پالیسیوں پر تحقیق کرنے پر مجبور کیا اور یہ سمجھنے میں مدد دی کہ یہ منصوبے کیوں ناکام رہے یا نافذ نہیں ہو پائے۔عرشل کے کام نے تیزی سے پیش رفت کی۔ 2019 میں انہوں نے کچھ دوستوں کے ساتھ مل کر "پیڈل فار اے چینج" نامی تنظیم کی بنیاد رکھی جو سائیکلنگ کے تمام پہلوؤں پر کام کرتی ہے۔

عرشل کے مطابق کہ 2019 سے میں نے سائیکلنگ کو شہری نقل و حمل کے ایک قابلِ عمل متبادل کے طور پر دیکھنا شروع کیا، جو آلودگی اور ٹریفک جام جیسے بڑے شہری مسائل کا حل بن سکتا ہے۔ میری معلومات کا دائرہ دیگر شہروں کے بائیسکل میئرز، شہری نقل و حمل کے ماہرین، مضامین، کتابوں اور آن لائن مواد کے ذریعے وسیع ہوا۔ 2020 تک میں نے پائیدار شہری نقل و حمل کی گہری سمجھ حاصل کر لی تھی اور میری مہمات میں سائیکلنگ کے ساتھ ساتھ پبلک ٹرانسپورٹ اور پیدل چلنے کے موضوعات بھی شامل ہو گئے تھے۔"

عرشل اختر کے لیے سائیکلنگ ایک جنون ہے 

 ریاست بھر کی سائیکلنگ کمیونٹیز سے جڑنے کے لیے عرشل نے جون-جولائی 2023 میں ایک تنہا سائیکل سفر کیا جس میں انہوں نے 27 اضلاع میں 2,000 کلومیٹر کا فاصلہ 28 دنوں میں طے کیا۔ اس سفر کا مقصد ماحولیاتی تحفظ، متحرک نقل و حمل اور روڈ سیفٹی کا پیغام عام کرنا تھا۔گوہاٹی میں "پیڈل فار اے چینج" کےرضاکاروں سے متاثر ہو کر عرشل نے 2024 میں "پوروکا فاؤنڈیشن" کی بنیاد رکھی، جو اب ماحولیاتی تبدیلی، پبلک ٹرانسپورٹ، ایکٹو موبلٹی (پیدل چلنا اور سائیکلنگ) اور روڈ سیفٹی پر کام کرتی ہے۔

عرشل کے مطابق ہم اب مختلف تنظیموں کے لیے سائیکل ریلیاں اور ریسز منعقد کرتے ہیں، جو کہ کمیونٹی انگیجمنٹ کی سرگرمیاں بھی ہیں۔ ہم 'اوپن اسٹریٹس گوہاٹی' کا انعقاد بھی کرتے ہیں۔ ہم نے 'آئی ایم کار-فری ٹوڈے' جیسی مہمات چلائی ہیں تاکہ لوگ ہر مہینے کچھ دن کار استعمال نہ کریں، اور 'وی ٹو' مہم کے ذریعے سائیکل سواروں اور پیدل چلنے والوں کی حفاظت کا شعور بیدار کیا۔

عرشل اور ان کی تنظیم نے "پیڈل ٹاکس" (آن لائن مباحثے)، "موبلٹی ٹاکس" (آف لائن مکالمے) اور "لیٹس گیٹ انوالوڈ" (شرکت پر مبنی پروگرامز) کے ذریعے مسائل کے اجتماعی حل تلاش کرنے کی کوشش کی۔ انہوں نے عوامی نقل و حمل اور سائیکلنگ سے متعلق عوامی رائے جاننے کے لیے سروے اور مطالعات بھی کیے۔ 2023 میں انہوں نے "نارتھ ایسٹ سائیکلنگ ایوارڈز" کا آغاز کیا تاکہ سائیکلنگ میں نمایاں خدمات انجام دینے والے افراد اور اداروں کو اعزاز دیا جا سکے۔انہوں نے کہا کہ ہم نے گوہاٹی کے کچھ اسکولوں میں سائیکل ریلیاں کیں، حالانکہ طلباء زیادہ تر بڑی ریلیوں میں حصہ لیتے ہیں۔ 'اسپوکہب سائیکلنگ' کے ساتھ مل کر منعقد کی جانے والی ریسز 12 سے 18 سال کے نوجوانوں میں خاصی مقبول ہیں۔

 عرشل اختر سائیکلنگ کے دوران

 "پوروکا فاؤنڈیشن" کے ذریعے عرشل کا منصوبہ ہے کہ مزید مطالعات کے ذریعے پائیدار شہری نقل و حمل کی حمایت میں شواہد جمع کیے جائیں۔ وہ اپنے ساتھیوں کے ساتھ ایسے منصوبوں پر کام کر رہے ہیں جن سے محلوں میں پیدل چلنے اور سائیکلنگ کے ذریعے بڑی ٹرانسپورٹ سہولتوں تک رسائی بہتر بنائی جا سکے۔ بعدمیں یہ منصوبے گوہاٹی کے دیگر علاقوں اور آسام کے دوسرے شہروں تک پھیلائے جائیں گے۔

عرشل کے مطابق ہم روزگار کے لیے سائیکل چلانے والوں کی مدد کے لیے خصوصی پروگرام شروع کرنے کا ارادہ رکھتے ہیں۔ اس کے علاوہ اسکول کے بچوں کے لیے بھی سائیکلنگ کے منصوبے زیر غور ہیں۔ اس سال ہم 'نارتھ ایسٹ سائیکلنگ ایوارڈز' کا دوسرا ایڈیشن بھی منعقد کریں گے تاکہ ان افراد کو حوصلہ افزائی ملے جو سائیکلنگ کے فروغ کے لیے کوشاں ہیں۔"