فضل پٹھان  ۔ پونے 

پیغمبر شیخ نے اپنی منفرد سوچ اور ثابت قدمی سے معاشرتی روایات کو چیلنج کرنے والے ایک سماجی مصلح کے طور پر اپنی الگ پہچان قائم کی ہے۔ انہوں نے قربانی کے مفہوم کو نہ صرف نئی گہرائی عطا کی بلکہ سماجی خدمت کو اتحاد کی تحریک بنا دیا۔پیغمبر کہتے ہیں کہ میرے والد مزدور تھے اور والدہ چوڑیاں بیچ کر گزر بسر کرتی تھیں۔ ان کی جدوجہد صرف پیٹ پالنے تک محدود تھی۔ ان کی زندگی میں ‘سماجی خدمت’ جیسے الفاظ کی کوئی گنجائش نہیں تھی۔اپنی ابتدائی مشکلات پر نظر ڈالتے ہوئے وہ بتاتے ہیں کہ انہی چیلنجوں نے ان کے اندر مقصد پیدا کیا۔آج وہ مذہبی تعلیمات اور فرقہ وارانہ ہم آہنگی کی بنیاد پر کئی اہم مسائل کا حل تلاش کر رہے ہیں ۔ اہم بات یہ ہے کہ ان کی اہلیہ عائشہ اس سفر میں برابر کی شریک ہیں، جس کی بدولت ان کی سرگرمیاں گھر اور ایمان کی جڑوں سے منسلک رہتی ہیں۔

اگرچہ مسلم برادری میں کئی نوجوان کارکن سرگرم ہیں، پیغمبر شیخ کا طریقہ منفرد اور موثر ہے۔ ان کی سب سے متاثر کن پہل بقرعید کے موقع پر قربانی کے تصور کو نیا مفہوم عطا کرتی ہے۔ وہ روایت کی نفی نہیں کرتے، بلکہ اس کی روح کو اور گہرا کرتے ہیں۔پیغمبر شیخ کے لیے قرآن کو مراٹھی میں پڑھنا ایک انقلابی تجربہ تھا۔اس سے کئی تصورات صاف ہوئے، جن میں قربانی کی اصل روح بھی شامل تھی۔ قرآن کی ایک آیت میں آیا: ‘اللہ تک نہ جانور کا خون پہنچتا ہے، نہ اس کا گوشت، بلکہ تمہاری نیت پہنچتی ہے۔’ یہ پڑھ کر میں بہت متاثر ہوا،" وہ بتاتے ہیں۔

آرتھک قربانی کی مہم 

ان کے ذہن میں سوال پیدا ہوا کہ آج کے دور میں جب پیسہ سب سے قیمتی وسیلہ ہے، تو کیوں نہ تعلیم کے لیے کچھ دیا جائے؟
اسی سوچ نے 2014 میں ان کی ایک چھوٹی سی مہم کی بنیاد رکھی۔ اس کے بعد یہ مہم پورے پیمانے پر ایک تحریک میں تبدیل ہوگئی۔ پیغمبر نے بقرعید کے موقع پر لوگوں کو دعوت دینا شروع کی کہ وہ روایتی قربانی کے ساتھ یا اس کی جگہ مالی عطیہ دیں تاکہ قبائلی اور دیہی علاقوں کے بچوں کی تعلیم ممکن ہو سکے۔2018 میں جب انہوں نے کیرالہ کے سیلاب زدگان کے لیے چندہ اکٹھا کیا تو ان کی یہ تحریک پورے ملک میں مشہور ہوگئی۔ اس مہم میں ہندو برادری سمیت تمام مذاہب کے لوگوں نے بڑھ چڑھ کر حصہ لیا، جو انسانیت اور ہمدردی کا عظیم نمونہ تھا۔

پیغمبر شیخ کہتے ہیں کہ ہر سال میں لوگوں سے کہتا ہوں کہ جانور قربان کرنے کے ساتھ یا اس کی جگہ مالی امداد دیں۔ اس رقم سے ہم غریب بچوں کی تعلیم میں مدد کرتے ہیں۔ اب تک ہم نے 25 سے 30 لاکھ روپے اکٹھے کیے ہیں اور مہاراشٹر بھر کے 1500 سے 2000 بچوں کی مدد کی ہے۔ان کی کوششوں نے کئی دیگر گروپوں کو بھی اس ماڈل کو اپنانے کی تحریک دی، جس سے ریاست میں تبدیلی کی لہر دوڑ گئی۔

سماجی اصلاح کبھی آسان نہیں ہوتی، خاص طور پر وہاں جہاں روایت کا غلبہ ہو۔ لیکن پیغمبر پر یقین ہے کہ تبدیلی ضروری بھی ہے اور ممکن بھی۔حضور نبی کریم ﷺ نے 1400 سال پہلے ایک سماجی انقلاب کی بنیاد رکھی۔ ان کی تعلیمات انصاف اور ترقی پر مبنی تھیں۔ یہ روایت آج بھی جاری ہے اور جاری رہنی چاہیے۔وہ اس حقیقت کا اعتراف کرتے ہیں کہ اگرچہ ہندو معاشرے میں سماجی مصلحین کی تاریخ زیادہ لمبی اور نمایاں ہے، اب مسلم برادری بھی آگے بڑھ رہی ہے۔مثالیں کم ہیں، لیکن حالات بدل رہے ہیں۔ ہماری مہم کو ملنے والی حمایت اس بات کا ثبوت ہے کہ مسلمان بھی اصلاح کے لیے تیار ہیں۔"

شیواجی کے بھکت

اس دور میں جب تاریخی شخصیات کو فرقہ واریت پھیلانے کے لیے استعمال کیا جا رہا ہے، پیغمبر شیخ نے چھترپتی شیواجی مہاراج پر دوٹوک موقف اپنایا ہے۔کچھ انتہاپسند عناصر شیواجی کو مسلمانوں کا دشمن بتاتے ہیں، لیکن پیغمبر شیخ اس غلط فہمی کو فوری دور کرتے ہیں۔شیواجی مہاراج نے مسلمانوں کے خلاف نہیں بلکہ ظلم اور سامراج کے خلاف جنگ کی تھی۔ ان کے قریبی ساتھیوں میں صدی ابراہیم اور ابراہیم خان جیسے مسلمان شامل تھے جو ان کے بحری بیڑے کے کمانڈر تھے۔ شیواجی نے مذہب کے لیے نہیں، عوام کے لیے حکومت کی۔"

اس جامع پیغام کو مضبوط کرنے کے لیے پیغمبر شیخ ہر سال شیواجی جینتی "جئے جِجاؤ، جئے شیورائے!" کے نعروں کے ساتھ مناتے ہیں۔ ان کی اس کوشش نے کئی مسلمانوں کو شیواجی کی وراثت کو انصاف اور اتحاد کی علامت کے طور پر اپنانے کی تحریک دی ہے، جس سے تاریخی نفرت کی دیواریں گرتی جا رہی ہیں۔تاریخی بیانیے ہی نہیں بلکہ پیغمبر موجودہ سماجی تقسیم کا بھی کھلے عام مقابلہ کرتے ہیں۔ وہ مسلم برادری کے مسائل کو بھی آئینی اقدار اور جمہوری مکالمے کی روشنی میں اجاگر کرتے ہیں۔ضرورت پڑنے پر وہ جلسے جلوس نکالتے ہیں، تقریریں کرتے ہیں اور مختلف ذاتوں و مذاہب کے لوگوں کو آپس میں جوڑتے ہیں۔

بات اتحاد کی

وہ کہتے ہیں کہ لوگ ایک دوسرے سے دور ہو رہے ہیں۔ کمیونٹیز کے درمیان دیواریں کھڑی ہو رہی ہیں۔ ہمیں ان دیواروں کو توڑنا ہوگا اور رشتے جوڑنے ہوں گے،ان کا منتر ہے کہ ہمیں لوگوں کو جوڑنا ہے۔خواہ تعلیم کے لیے چندہ جمع کرنا ہو یا مشترکہ وراثت کو اپنانا، پیغمبر کی ہر کوشش کا محور اتحاد، محبت اور عمل ہے۔بقرعید کے موقع پر تعلیم کے لیے عطیات کی حوصلہ افزائی ہو یا شیواجی مہاراج کے یومِ پیدائش کو سب کے ساتھ منانا، پیغمبر شیخ نہ صرف تصورات بدل رہے ہیں بلکہ حقیقتیں بھی تبدیل کر رہے ہیں۔ وہ صرف آواز بلند نہیں کرتے بلکہ عمل سے مثال قائم کرتے ہیں کہ چھوٹے چھوٹے اصلاحی اقدامات بھی پورے صوبے میں تبدیلی لا سکتے ہیں۔ان کی ہمت اور عزم آج مہاراشٹر بھر کے نوجوانوں کو اپنے معاشروں میں تبدیلی لانے کی تحریک دے رہے ہیں۔ایک بٹی ہوئی دنیا میں پیغمبر شیخ ہمیں یاد دلاتے ہیں کہ اصل عقیدت صرف رسومات سے نہیں، بلکہ دوسروں کی خدمت سے ظاہر ہوتی ہے۔ ان کی کہانی ہر ہندوستانی کے ضمیر کو جھنجھوڑتی ہے کہ ایک قدم ہم سب کو بھی محبت، انصاف اور مشترکہ مستقبل کی طرف بڑھانا چاہیے۔