محمد فرحان اسرائیلی / جے پور

نِشاط حسین کو راجستھان کی پہلی مسلم خاتون قاضی ہونے کا اعزاز حاصل ہے اور وہ مسلم خواتین کے حقوق کی ایک بے تھکان علمبردار ہیں۔ ان کی زندگی کا سفر حوصلے، استقامت اور معاشرتی اصلاح کی ضرورت پر غیر متزلزل یقین کی کہانی ہے۔ اپنی جدوجہد کے ذریعے انہوں نے نہ صرف ہزاروں خواتین کو اپنے حقوق کے بارے میں بیدار کیا بلکہ انہیں اپنی زندگیوں کا کنٹرول اپنے ہاتھ میں لینے کی تحریک بھی دی۔

ان کے ابتدائی دن فرقہ وارانہ ہم آہنگی کی عکاسی کرتے ہیں۔ وہ یاد کرتی ہیں کہ  ہمیں یہ نہیں معلوم تھا کہ کون ہندو ہے اور کون مسلمان , ہم سب ایک ہی تھے،کرولی میں پروان چڑھتے ہوئے , جو ایک پسماندہ اور دور دراز علاقہ تھا جہاں لڑکیوں کی تعلیم کو نظرانداز کیا جاتا تھا , نِشاط نے تاریخ رقم کی۔ وہ ضلع کی پہلی مسلم لڑکی بنیں جس نے دسویں جماعت کامیاب کی , اور 1200 طالبات میں وہ اکلوتی مسلم طالبہ تھیں۔

نِشاط کی پیدائش کرولی کے سیتابری محلہ میں ہوئی جہاں ان کا خاندان واحد مسلم گھرانہ تھا، جو تین مندروں کے قریب آباد تھا۔ ان کے والد کرولی کی شاہی فیملی کے استاد درزی تھے۔ صرف 17 برس کی عمر میں ان کی شادی جے پور کے محمد حسین سے ہوئی، جو ایک گزیٹڈ افسر اور خواتین کے حقوق کے پرجوش حامی تھے۔ ان کی سوچ نے نِشاط کو اپنی راہ تلاش کرنے کی سمت اور حوصلہ فراہم کیا۔

جے پور میں انہوں نے “نِشاط اکیڈمی” قائم کی، جو 350 غریب بچوں کو تعلیم دیتی تھی، جن میں صرف پانچ فیصد مسلمان تھے۔مگر 1989 میں جے پور کے فسادات نے ایک موڑ پیدا کیا۔ یہ تشدد انہیں گہرائی تک جھنجھوڑ گیا لیکن اس نے ان میں سماجی دقیانوسی تصورات اور ناانصافی کے خلاف لڑنے کا عزم بھی پیدا کیا۔ ان کا اسکول فسادات کے دوران خطرے میں تھا لیکن بچوں اور والدین نے اسے بچایا اور کہا: “یہ تعلیم کا مندر ہے۔ ہمیں نہیں معلوم یہ ہندو ہے یا مسلمان، مگر یہ ہمارے بچوں کو پڑھاتا ہے۔ یہی لمحہ ان کے لیے روحانی احیاء ثابت ہوا , اور ایک سماجی مصلح کے طور پر ان کی زندگی کی نئی شروعات ہوئی۔

اسی سال انہوں نے نیشنل مسلم ویمن ویلفیئر سوسائٹی قائم کی، جو 1992 میں باضابطہ رجسٹر ہوئی۔ “مسلم” لفظ کا شامل ہونا ایک شعوری فیصلہ تھا , تاکہ یہ واضح کیا جا سکے کہ مسلم خواتین محبِ وطن شہری ہیں جو ترقی اور شمولیت چاہتی ہیں۔یہ تنظیم اجمیر اور سرانا جیسے حساس علاقوں میں فرقہ وارانہ ہم آہنگی کے فروغ کے لیے کام کرتی رہی، مختلف طبقات کو مکالمے اور تعاون کے لیے ایک ساتھ لاتی رہی۔

انہوں نے ان افراد کے حق میں آواز بلند کی جو TADA قانون کے تحت غلط طور پر گرفتار ہوئے تھے، اور اس مقصد کے لیے اس وقت کے وزیر اعلیٰ بھیرون سنگھ شیخاوت سے ذاتی ملاقات کی تاکہ جیل اصلاحات کا مطالبہ کیا جا سکے۔ شیخاوت انہیں پیار سے “بہن” کہتے تھے اور نِشاط نے انہیں راکھی بھی باندھی۔ جب انہیں کمیشن چیئرپرسن کا عہدہ پیش کیا گیا تو انہوں نے کہ کہ مجھے صرف دعائیں چاہئیں، کوئی عہدہ نہیں۔فسادات کے بعد جب کئی لڑکیاں اسکول چھوڑنے پر مجبور ہوئیں تو نِشاط نے 20 بالغان کی تعلیم کے مراکز قائم کیے تاکہ خواتین دسویں جماعت تک کی تعلیم مکمل کرسکیں۔

انہوں نے جے پور کا پہلا کاؤنسلنگ سینٹر بھی قائم کیا، جہاں تمام مذاہب کی خواتین مشورہ لے سکتی تھیں۔ وہ کہتی ہیں کہ کم از کم ایک گھرانہ روز بچ جاتا ہے۔ مردوں کے لیے بھی ورکشاپس کرائیں تاکہ انہیں خواتین کے حقوق اور عزت کے حوالے سے حساس بنایا جا سکے۔

ایک اور سماجی روایت کو چیلنج کرتے ہوئے نِشاط نے خواتین کے قاضی بننے کے خیال کو اپنایا۔ انہوں نے ممبئی میں پانچ سالہ کورس مکمل کیا، جس میں اسلامی فقہ اور ہندوستانی آئین کا مطالعہ کیا۔ جہاں آرا اور افروز کے ساتھ وہ راجستھان کی پہلی خاتون قاضیوں میں شامل ہوئیں۔ سخت مزاحمت کے باوجود ان کے موقف کی توثیق ایک معروف اسلامی عالم نے کی، جس نے تاریخ اسلام میں 250 خواتین قاضیوں کی مثالیں پیش کیں۔

انہوں نے تین طلاق کے خلاف ملک گیر مہم میں بھی نمایاں کردار ادا کیا۔ بھارتیہ مسلم مہیلا اندولن کی راجستھان کنوینر کی حیثیت سے انہوں نے سپریم کورٹ میں رِٹ پٹیشن دائر کی۔ ہزاروں خواتین کی شہادتوں اور حمایت کے ساتھ یہ تحریک مضبوط ہوئی اور 2017 میں سپریم کورٹ نے تین طلاق کو غیر آئینی قرار دیا۔ نِشاط کے مطابق اس فیصلے کے بعد مسلمانوں میں طلاق کے کیسز میں 95 فیصد کمی آئی ہے۔

گزشتہ 32 برسوں میں ان کی تنظیم نے ہزاروں خواتین کو انصاف دلایا , حتیٰ کہ تین بین الاقوامی کیسز بھی سنبھالے۔ ان کی خدمات پر انہیں کئی اعزازات ملے، جن میں نیشنل یونٹی ایوارڈ اور شانتی دوت سمان شامل ہیں۔ تاہم وہ عاجزی سے کہتی ہیں: میری اصل خوشی ایوارڈز سے نہیں بلکہ عوام کے اعتماد سے ہے۔ان کی خاندانی زندگی بھی متاثرکن ہے۔ ان کے دو بیٹے اور بیٹی دبئی میں خواتین کی فلاحی تنظیم چلا رہے ہیں۔ ان کے نواسے عبدالمقیط کو صرف نو برس کی عمر میں ابو ظہبی میں ماحولیاتی کام پر وزیر اعظم نریندر مودی نے اعزاز دیا۔

پردے کے بارے میں ان کی رائے متوازن اور جدید سوچ کی عکاسی کرتی ہے۔ وہ کہتی ہیں کہ قرآن حیاء کی بات کرتا ہے، چہرہ چھپانے کی نہیں۔ عزت و وقار لباس کے ضابطے سے زیادہ اہم ہے۔” ان کے دفتر میں برقع پہننے والی خواتین بھی کام کرتی ہیں اور بغیر برقع والی بھی , بغیر کسی دباؤ یا فیصلے کے۔

نِشاط کا ماننا ہے کہ مسلم خواتین کی حالت رفتہ رفتہ بہتر ہو رہی ہے۔ زیادہ خواتین اپنی آواز بلند کر رہی ہیں اور خاندان لڑکیوں کی تعلیم پر زیادہ توجہ دے رہے ہیں۔ تاہم وہ نوجوانوں میں منشیات، جوا اور دیگر تباہ کن عادتوں کے بڑھتے رجحان پر تشویش کا اظہار بھی کرتی ہیں۔ وہ کہتی ہیں کہ اگر مرد تعاون کریں تو معاشرہ واقعی بہتر ہو سکتا ہے۔

ان کی تنظیم مسلم، دلت اور آدی واسی برادریوں کے درمیان اتحاد قائم کرنے کے لیے بھی کام کر رہی ہے۔ حالیہ “چاول تقسیم” مہم میں انہوں نے ذات پات اور مذہب سے بالاتر ہو کر لوگوں میں راشن بانٹا اور یہ پیغام دیا کہ بھائی چارہ قائم رکھو اور آئین کی حفاظت کرو۔

جے پور کے جوہری بازار کے اسی سادہ دفتر سے، جہاں سے ان کا سفر شروع ہوا تھا، نِشاط حسین آج بھی سماجی تبدیلی کی قیادت کر رہی ہیں۔ عمر کے باوجود ان کا جذبہ، توانائی اور غیر متزلزل عزم آج کے نوجوانوں کے لیے مشعلِ راہ ہے۔ ان کی زندگی اس یقین کی گواہ ہے کہ اصل تبدیلی طاقت یا عہدے سے نہیں بلکہ نیت کی پاکیزگی سے جنم لیتی ہے۔