دانش علی / ڈوڈہ

حسین وادی چناب کی پرسکون پہاڑیوں میں واقع جموں کے ضلع ڈوڈہ میں  ایک چھوٹا سا گاؤں گھاٹ  ہے ، جہاں کی زندگی امید، علم اور ہم آہنگی   کی روشن مثال بن چکی ہے ۔ جس کا سہرا محمد حفیظ فرقان آبادی کے سر جاتا ہے، 2 دسمبر 1962 کو ڈوڈہ قصبہ سے صرف پانچ کلومیٹر دور واقع گاؤں گھاٹ میں پیدا ہونے والے حفیظ فرقان آبادی نے چار دہائیوں سے زائد عرصہ تک نوجوان ذہنوں کو تعلیم اور محبت کے ذریعے سنوارا اور مختلف برادریوں کو جوڑنے کا کام کیا۔

1989 میں عربی میں ماسٹرز کی ڈگری حاصل کرنے کے بعد حفیظ نے بارہویں جماعت مکمل کرتے ہی اپنی تعلیمی زندگی کا آغاز کر دیا۔ انہوں نے ڈوڈہ کے ایک نجی اسکول "رائل اکیڈمی" میں تدریس سے اپنے پیشے کا آغاز کیا، جس کے بعد عربی، اردو اور انگریزی کے استاد کے طور پر علاقے کے دیگر نجی اداروں میں بھی خدمات انجام دیں۔
ان کی چاہت واضح تھی ۔ تعلیم ان کے لیے محض پیشہ نہیں بلکہ مشن تھی۔ان کی زندگی کا ایک اہم موڑ 15 جون 1995 کو آیا، جب انہیں سرکاری استاد مقرر کیا گیا۔ ان کی پہلی تعیناتی ہنچ ہائی اسکول ڈوڈہ میں ہوئی جہاں وہ عربی، اردو اور انگریزی پڑھاتے تھے۔ مگر ان کے کلاس روم اکثر آدھے خالی ہوتے ۔ خاص طور پر لڑکیوں سے۔اس زمانے میں قدامت پسند سوچ بیٹیوں کو اسکول بھیجنے کی راہ میں رکاوٹ تھی، مگر حفیظ نے اسے رکاوٹ نہیں بلکہ اپنی ذمہ داری سمجھا۔

وہ خود گھروں میں جا جا کر والدین کو بیٹیوں کو تعلیم دلوانے پر آمادہ کرتے۔ وہ اکثر کہتے:"تعلیم محض حق نہیں ۔ یہ روشنی ہے۔"

رفتہ رفتہ ذہنوں میں تبدیلی آنے لگی۔ حفیظ محض استاد نہ رہے ۔ وہ ایک مصلح، ایک محرک اور تبدیلی کی علامت بن گئے۔ان کی لگن اسکول کی چار دیواری سے کہیں آگے تک پھیلی ہوئی تھی۔ قریبی دوستوں کے ساتھ مل کر انہوں نے ڈوڈہ میں ایک فلاحی ٹرسٹ قائم کیا جس کا مقصد غریب اور پسماندہ بچوں کو بلا امتیاز مذہب مفت تعلیم فراہم کرنا تھا۔یہ ٹرسٹ نہ صرف مفت تعلیم بلکہ یونیفارم، جوتے اور کتابیں بھی مہیا کرتا تھا۔ ان کا اپنا گھر بھی علم کا مرکز بن گیا، جہاں وہ معاشی طور پر کمزور طلبہ کو مفت ٹیوشن دیتے تھے۔

2011 میں حکومت جموں و کشمیر نے انہیں ریاست کے بہترین اساتذہ میں شامل کر کے اعزاز سے نوازا ۔ ایک ایسی پہچان جس کے وہ بجا طور پر حق دار تھے، کیونکہ ان کے اثرات روایتی تدریس سے کہیں بڑھ کر تھے۔شاید محمد حفیظ فرقان آبادی کی شخصیت کا سب سے نمایاں پہلو ان کی بین المذاہب ہم آہنگی کے لیے انتھک محنت ہے۔ ایسے علاقے میں جہاں مذہبی کشیدگی اکثر فضا کو مکدر کرتی ہے، حفیظ نے ہندو مسلم اتحاد کو فروغ دینے کے لیے مسلسل کام کیا۔

ان کی شمولیتی کاوشوں نے انہیں ہر طبقے میں عزت بخشی۔
ان کے ایک سابق طالب علم نے، جو آج سرکاری افسر ہیں،  'آواز-دی وائس'کو بتایا"وہ سب سے پہلے انسانیت کا درس دیتے ہیں، باقی سب بعد میں۔"تدریس کے علاوہ حفیظ فرقان آبادی نے بطور مصنف اور شاعر بھی اپنی پہچان بنائی ہے۔ ان کی تین کتابیں ۔  تنزیل، مومن کی نمازاور انتخاب ۔ جموں میں اپنے روحانی اور ادبی حسن کی بنا پر خاصی مقبول ہیں۔اس کے علاوہ ان کی کئی نظموں کو جموں و کشمیر کے اسکولوں کی صبح کی اسمبلیوں میں باقاعدگی سے پڑھا جاتا ہے