قطب احمد/ندیا

جہانگیر ملک ایک ایسے کاروباری ہیں جن کے دل میں انسانیت اور دماغ میں وژن ہے۔ انہوں نے ایک عام ساڑی بیچنے والے کی حیثیت سے شروعات کی اور رفتہ رفتہ بنگال کی مشہور تنت ریشمی ساڑیاں تیار کرنے لگے۔ مگر ان کی کہانی صرف ذاتی کامیابی تک محدود نہیں ہے۔ انہوں نے ایسا کاروباری ماڈل بنایا جس نے مغربی بنگال کے ضلع نادیہ کے قصبے شانتی نگر کی معیشت کو سہارا دیا۔یہ قصبہ جہاں ہندو اور مسلمان صدیوں سے پڑوسیوں کی طرح رہتے آئے ہیں، یہاں کی ثقافتی ہم آہنگی شانتپوری ساڑیوں کے باریک اور پائیدار دھاگوں کی طرح مضبوط ہے۔

شانتپوری ساڑی: بنگال کی ثقافتی شان

شانتپوری تنت ساڑی ہمیشہ سے بنگال کی تہذیبی پہچان رہی ہے۔ صدیوں سے یہ ساڑیاں بے شمار بُنکروں کی زندگیوں کو جوڑتی آئی ہیں۔ قصبے کے پر رونق بانگر ہاٹ اور گھوش مارکیٹ آج بھی اس وراثت کے مراکز ہیں۔ انہی میں سے ایک نام آج سب سے زیادہ نمایاں ہے: جے ایم بازار، جو نہ صرف بنگال بلکہ دور دور سے آنے والے خریداروں کا پسندیدہ مرکز ہے۔اس کامیاب کاروبار کے پیچھے ہیں 45 سالہ جہانگیر ملک، جن کے حوصلے اور سخاوت نے نہ صرف ان کی زندگی بدلی بلکہ ہزاروں مزدوروں کی قسمت بھی۔

خریداروں اور مزدوروں کے لیے سہارا

جہانگیر عام دکاندار کی طرح خوش اخلاق اور مسکراتے ہوئے گاہکوں سے پیش آتے ہیں، لیکن ان کی کاونٹر کے پیچھے چھپی کہانی کہیں زیادہ بڑی ہے۔ وہ پورے معاشی نظام کے لیے ریڑھ کی ہڈی بن گئے ہیں۔مارکیٹ کے دنوں میں تقریباً ایک ہزار ای-رکشہ ڈرائیور شانتپور ریلوے اسٹیشن سے گھوش مارکیٹ تک خریداروں کو لاتے لے جاتے ہیں۔ خاص بات یہ ہے کہ جہانگیر ان سفروں کا کرایہ خود ادا کرتے ہیں۔ خریداروں کو یہ سہولت مفت ملتی ہے جبکہ ڈرائیوروں کو روزگار کی ضمانت۔ ایک چھوٹے قصبے کی معیشت میں جہاں روزگار کے مواقع محدود ہیں، یہ قدم وژن اور ہمدردی کی بہترین مثال ہے۔

 آغاز اور سفر

 جہانگیر نے بیس کی دہائی میں گھوش مارکیٹ کے اندر ایک چھوٹا سا ساڑی کا اسٹال لگایا۔ ان کا تعلق بردوان ضلع کے بلبلیتلا گاؤں سے ہے۔ تعلیم انہوں نے سملاں ہائی اسکول سے حاصل کی اور بعد میں ہیٹ گوبنداپور کالج سے کامرس کی تعلیم مکمل کی۔ٹیکسٹائل سے دلچسپی نے انہیں راناگھاٹ کے ایک مختصر سرکاری کورس تک پہنچایا، جس نے ان کے لیے بنگال کی ساڑیوں کی صنعت کے امکانات کے دروازے کھول دیے۔ شانتپور کی صدیوں پرانی ہینڈلوم وراثت نے انہیں اپنی طرف کھینچا اور یہی ان کے سفر کا مرکز بنا۔ابتدا سادہ تھی مگر محنت اور مقصد کی صفائی نے جلد نتائج دکھائے۔ 2019 میں انہوں نے جے ایم بازار قائم کیا، جو گھوش مارکیٹ کی دوسری منزل پر دو بڑے کاؤنٹرز تک پھیل گیا۔

کامیابی کے ساتھ سماجی ذمہ داری

 جہانگیر نے صرف ایک کامیاب کاروبار ہی نہیں بنایا بلکہ روایت اور جدید کاروباری ذہنیت کو یکجا کیا۔ خوشحالی نے انہیں خود غرض نہیں بنایا، بلکہ دوسروں کو اوپر اٹھانے کا حوصلہ دیا۔ان کی دکان آج ٹیکسٹائل کا خزانہ ہے، جس میں ریشمی ساڑیاں سب سے قیمتی ہیں۔ مقامی اور بیرونِ بنگال پروڈکشن یونٹس رکھنے کی بدولت وہ معیار کو برقرار رکھتے ہوئے ساڑیاں سستے داموں فراہم کرتے ہیں۔ یہی توازن ان کی ساکھ کو حریفوں سے ممتاز بناتا ہے۔ 

ہینڈلوم کی وراثت کا احیا

جہانگیر کی خدمات ریشمی ساڑیوں تک محدود نہیں۔ ایک وقت تھا جب شانتپور کی ہینڈلوم کاٹن ساڑی تقریباً ختم ہو رہی تھی، مگر جہانگیر نے بُنکروں کو سہارا دے کر اس کی مانگ دوبارہ زندہ کی۔ ہزاروں خاندان جو مایوسی کا شکار تھے، دوبارہ روزگار اور وقار پا گئے۔ ان کے نزدیک یہ محض تجارت نہیں بلکہ مشن ہے۔ وہ اکثر کہتے ہیں ۔بنگالی تہذیب تنت ساڑی کے بغیر ادھوری ہے، چاہے درگا پوجا ہو، عید ہو یا کوئی بھی جشن

اتحاد اور بھائی چارے کی علامت

جہانگیر ہر سال گھوش مارکیٹ کے تمام ملازمین، مزدوروں اور رکشہ ڈرائیوروں کے لیے ایک بڑی دعوت کا اہتمام کرتے ہیں۔ اس موقع پر ہندو اور مسلمان سب ساتھ بیٹھ کر کھانا کھاتے ہیں۔ یہ شانتپور کی یکجہتی کی روح کا زندہ ثبوت ہے۔ان کے اپنے کاروبار میں بھی ہندو اور مسلمان ساتھ کام کرتے ہیں۔ ان کی ٹیم میں تقریباً 25 افراد ہیں جن میں مذہبی امتیاز نہیں۔جہانگیر کے چھوٹے بھائی بلبلیتلا میں ایک بڑی ٹیکسٹائل فیکٹری چلاتے ہیں، جو کاٹن فیبرک جیسے ٹی شرٹس اور لیگنگز تیار کرتی ہے، اور یوں خاندان کی شراکت داری بنگال کی معیشت کو مزید مضبوط کرتی ہے۔

وژن اور وراثت

جہانگیر ملک کی کہانی صرف کامیابی کی نہیں، بلکہ اس نایاب صلاحیت کی ہے کہ وہ اپنے خواب دوسروں تک پہنچا سکیں۔ ان کا وژن ہے کہ شانتپور کی ہینڈلوم ساڑیاں دنیا کے ہر کونے تک پہنچیں اور ساتھ ساتھ بنگال کے بُنکروں کی محنت اور روزگار کو بھی عزت ملے۔ان کی سادہ مزاجی اور خاموش خدمت نے ثابت کر دیا کہ عظمت دولت جمع کرنے سے نہیں بلکہ دوسروں کی زندگیاں سنوارنے سے ملتی ہے۔