اونیکا مہیشوری۔ نئی دہلی

 دہلی کی تنگ گلیوں میں بسے نظام الدین بستی سے اُبھرتی ایک ایسی کہانی سامنے آتی ہے جو ہمت، حوصلے اور خود اعتمادی کی نئی تعریف لکھتی ہے۔ یہ کہانی ہے 19 سالہ ادیبہ علی کی۔ ایک ایسی نوجوان پیرا ایتھلیٹ کی، جس نے وہ کیا جو عام انسان صرف خواب میں سوچتے ہیں۔ وہیل چیئر پر بیٹھ کر زندگی کا مقابلہ کرنا آسان نہیں، مگر ادیبہ نے دکھا دیا کہ حادثات انسان کو روک تو سکتے ہیں، ہرا نہیں سکتے۔ یہ کہانی محض میڈلز کی نہیں، بلکہ شکستِ حالات کی ہے۔ دسمبر 2023 میں بھوپال کے مدھیہ پردیش اسٹیٹ شوٹنگ اکیڈمی میں منعقدہ 26ویں نیشنل شوٹنگ چیمپئن شپ میں ادیبہ نے سب کو حیران کر دیا۔

انہوں نے دو طلائی تمغے جیت کر نئی تاریخ رقم کی 50 میٹر پسٹل  مکسڈ ایس ایچ 1 جونیئر میں 467پوائنٹس کے ساتھ گولڈ، 10 میٹر ایئر پسٹل  جونیئر خواتین  ایس ایچ 1 میں بھی گولڈ۔ ادیبہ کی کامیابی صرف دو تمغوں کی کہانی نہیں، یہ اُس حوصلے کی داستان ہے جس نے معذوری کو رکاوٹ نہیں بلکہ نئی پہچان بنایا۔

لیکن جہاں کامیابی چمکتی ہے، وہاں جدوجہد کے زخم بھی گہرے ہوتے ہیں۔ پانچ سال پہلے ایک المناک حادثے نے ان کی زندگی کا رخ ہمیشہ کے لیے بدل دیا تھا۔ چوتھی منزل کے اپنے گھر کی بالکونی سے نیچے جھانکتے ہوئے وہ اچانک پھسل گئیں اور سیدھا نیچے جاگریں۔ اس خوفناک حادثے نے ان کی ریڑھ کی ہڈی توڑ دی اور ٹانگوں کی حس مکمل ختم ہو گئی۔ اُن کی ماں، ریشمہ علی، آج بھی یہ لمحہ یاد کر کے آبدیدہ ہو جاتی ہیں۔ ادیبہ ڈیڑھ سال تک بستر سے اٹھ نہیں سکتی تھی۔ وہ ٹوٹ چکی تھی، جیسے زندگی کی تمام خوشی ختم ہو گئی ہو۔ جو لڑکی کھیلوں میں سرگرم تھی، وہ وہیل چیئر تک محدود ہو گئی ۔ یہ منظر خاندان کے ہر فرد کے لیے دل خراش تھا۔