دانش علی/ بارہ مولا

کبھی کشمیر کی سڑکوں پر ہونے والے پُرتشدد مظاہروں کی بھٹی میں جھلسنے والے واجد فاروق بھٹ آج تبدیلی کی ایک طاقتور علامت بن چکے ہیں۔ تنگ گلیوں میں پتھر پھینکنے سے لے کر وادی بھر میں نوجوانوں کو بااختیار بنانے کے پلیٹ فارمز تک، بھٹ کا یہ سفر غیر معمولی ہی نہیں بلکہ انقلابی بھی ہے۔

شمالی کشمیر کے ضلع بارہ مولا کے قصبے شیری کے ایک متوسط گھرانے میں پیدا ہونے والے واجد اُن نوجوانوں کی اُس نسل کا حصہ تھے جو بددل ہو کر تصادم اور انتشار کی طرف مائل ہو چکے تھے۔ آج وہ "سیو یوتھ سیو فیوچر" (Save Youth Save Future - SYSF) کے بانی ہیں، جو ایک گراس روٹ تحریک ہے جس نے وادی کے ہزاروں نوجوانوں کی زندگی کا رخ مکالمے، کھیلوں، تعلیم، انتہا پسندی سے بچاؤ اور بیداری کے پروگراموں کے ذریعے بدل دیا ہے۔ ان کا مشن ہے کہ کشمیر کے لیے ایک پائیدار اور پرامن مستقبل تعمیر کیا جائے۔

ایک بچپن جو تنازعے کے سائے میں گزرا

سیاسی ہلچل اور بار بار کی ہڑتالوں کے بیچ جوان ہونے والے واجد کو یاد ہے کہ ہر جمعہ کو پتھراؤ ایک طرح سے نو عمری کی رسم بن چکی تھی۔ جو غصے، بے بسی اور غلط فہمی پر مبنی بہادری کا علامتی لیکن افسوسناک اظہار کا طریقہ تھا۔مجھے سڑک اپنی طرف کھینچتی تھی، وہ بے تکلفی سے کہتے ہیں ۔ ہم اسامہ بن لادن جیسی شخصیات کو ہیرو سمجھتے تھے۔ ہمیں لگتا تھا کہ تشدد ہی ہمیں نمایاں کرے گا۔ میرے محلے میں جو لوگ فورسز کا سامنا کرتے تھے، ان کا نام عزت سے لیا جاتا تھا۔ میں بھی اُن میں سے ایک تھا۔لیکن اس غصے کے پیچھے ایک گہرا خلا تھا۔جو مواقع، معلومات اور امید کی کمی سے پیدا ہوا تھا۔ گورنمنٹ ڈگری کالج بارہ مولا سے بی اے کرتے ہوئے واجد نے نیشنل کیڈٹ کور(NCC) میں بھی مختصر شمولیت اختیار کی، جو ان کے نقطہ نظر میں تبدیلی کی پہلی جھلک ثابت ہوئی۔

تبدیلی کی چنگاری

نگروٹہ کے ایکNCC کیمپ کا دورہ ان کے لیے انقلابی ثابت ہوا۔میں نے دیگر ریاستوں کے لوگوں سے بحث کی۔ وہ مجھے صبر سے سنتے رہے۔ اس لمحے نے تبدیلی کا پہلا بیج بو دیا۔ میں نے سوچا شاید تشدد ہی واحد زبان نہیں ہے۔ایک اور اہم موڑ 2017 میں آیا جب انہوں نے بارہ مولا میں ایک کھیلوں کے ایونٹ کے دورانSSP امتیاز حسین میر سے ملاقات کی۔انہوں نے افسر بن کر اختیار نہیں جتلایا۔ بلکہ رہنما کی طرح بات کی۔ اس ملاقات نے مجھ پر گہرا اثر چھوڑا۔ان تجربات سے متاثر ہو کر واجد نے اپنے پرانے خواب کو حقیقت بنانے کا فیصلہ کیا۔ کشمیر کے نوجوانوں کے لیے ایک پرامن اور باوقار مستقبل بنانا۔

SYSF کی بنیاد: محروم طبقے کا مشن

2018 میں سیو یوتھ سیو فیوچر" (SYSF) کا آغاز ہوا۔ بغیر کسی مالی مدد، سیاسی تعلقات یا ادارہ جاتی پشت پناہی کے۔لوگ کہتے تھے میں پاگل ہوں۔ کہتے تھے مصیبت کو دعوت دے رہا ہوں ۔ مگر مجھے اجنبیوں اور دوستوں دونوں سے حوصلہ افزائی بھی ملی۔اس تنظیم کا پہلا بڑا ایونٹ "دی ینگ کشمیر: دی ڈائیلاگ وِدِن" تھا، جس میں 400 سے زائد افراد نے شرکت کی۔ یہ ایک نایاب موقع تھا جہاں شکایات اور حکمرانی کا آمنا سامنا ہوا، جس میں سول اور پولیس انتظامیہ دونوں کے مقررین شامل تھے۔ یہ وادی میں ایک نئے مکالمے کی شروعات تھی۔وقت کے ساتھ ساتھSYSF ایک متحرک پلیٹ فارم میں ڈھل گئی جس نے کھیلوں کے مقابلے، ذہنی صحت کے سیشن، ثقافتی تبادلے اور قیامِ امن کی پہل شروع کی۔ بہت سے لوگوں کے لیے واجد اب ایک مظاہرچی سے رہنما اور سرپرست بن چکے تھے۔

دھمکیوں سے حوصلے تک

ان کی بڑھتی ہوئی مقبولیت کے ساتھ خطرہ بھی بڑھا۔ 2018 میں واجد کو "کشمیر فائٹ" نامی ایک مشکوک بلاگ سے دھمکی ملی، جو اعتدال اور اصلاح کی آوازوں کو نشانہ بناتا ہے۔"مجھے اپنی جان کا خوف تھا،" وہ اعتراف کرتے ہیں۔ "مگرSSP امتیاز نے مجھے ایک ایسی بات کہی جو میں کبھی نہیں بھولوں گا: 'جب تک لکھا نہیں گیا، کوئی تمہیں مار نہیں سکتا۔' اس سے مجھے ہمت ملی۔

عالمی سطح تک رسائی: پلوامہ سے برسلز تک

2020 میںSYSF نے یورپی یونین کی توجہ حاصل کی، جس نے کشمیری نوجوانوں کو انتہا پسندی سے دور رکھنے کے لیے ایک قیام امن منصوبے کی حمایت کی۔ واجد اور ان کی ٹیم نے پلوامہ، شوپیاں، اننت ناگ اور کپواڑہ جیسے متاثرہ اضلاع میں 69 ورکشاپس کامیابی سے منعقد کیں۔جواہر لال نہرو یونیورسٹی(JNU) کے تعاون سےSYSF نے ایک بڑا ثقافتی تبادلہ بھی منعقد کیا، جس میں 120 سے زائد کشمیری طلبہ نے بھارت بھر کے ساتھیوں سے ملاقات کی۔انہوں نے ہمیں امن کے پیامبر کہا کہ واجد فخر سے یاد کرتے ہیں۔

خواتین، حکمت اور مستقبل کا راستہ

واجد نےSYSF کے دائرہ کار کو صنفی پہلو تک وسعت دی ۔ 2020 میں تنظیم نے کارکن انیکا نذیر کی قیادت میں خواتین کا ونگ قائم کیا۔ ان کی قیادت میں کشمیر کی پہلی ویمنزKPL (کشمیر پریمیئر لیگ) منعقد ہوئی۔ جو ایک قدامت پسند ماحول میں ایک جری اور علامتی قدم تھا۔SYSF نے خواتین کی کامیابیوں کو تسلیم کرنا، صنفی مساوات پر مباحثے منعقد کرنا اور خواتین کے حقوق پر مکالمے کے محفوظ پلیٹ فارم فراہم کرنا بھی شروع کیے۔2021 تک تنظیم نے ثقافتی اور روحانی احیاء میں بھی گہری دلچسپی لینا شروع کر دی۔ کشمیر یت، صوفی ازم، اور وادی کی کھوئی ہوئی روایاتِ امن و کثرتیت پر سیمینارز منعقد کیے۔ علما، امام اور صوفی سکالرز کو مشترکہ ثقافتی شناخت کی بحالی میں کردار ادا کرنے کے لیے مدعو کیا گیا۔

ایک تحریک جو امید سے جُڑی ہے

آجSYSF نے کشمیر کے ہر زون میں اپنی موجودگی قائم کر لی ہے۔ سینکڑوں رضاکاروں اور قومی و بین الاقوامی تھنک ٹینکس، تعلیمی اداروں اور سول سوسائٹی تنظیموں کے ساتھ تعاون کے ساتھ یہ پہل مسلسل ترقی کر رہی ہے۔واجد کا فون شاید ہی کبھی خاموش ہوتا ہو۔ چاہے وہ کوئی نوجوان مشورے کے لیے ہو، کوئی کالج تقریر کے لیے مدعو کر رہا ہو یا کوئی پالیسی ساز کمیونٹی کی بصیرت مانگ رہا ہو۔

درد سے مقصد تک

واجد فاروق بھٹ کی کہانی صرف توبہ کی داستان نہیں۔ یہ اس بات کی طاقتور یاد دہانی ہے کہ استقامت، ہمدردی اور وژن کیا کچھ حاصل کر سکتے ہیں۔ شیری کی تنازعات سے بھری سڑکوں سے لے کر قیامِ امن پرعالمی مکالموں تک، ان کی زندگی اس بات کا ثبوت ہے کہ تبدیلی نہ صرف ممکن ہے بلکہ ضروری ہے۔میں ہمیشہ کہتا ہوں، واجد غور سے کہتے ہیں، کشمیر کے نوجوانوں کو موت کی کہانیاں نہ سناؤ۔ انہیں زندگی کی کہانیاں سناؤ۔ وہ کہانیاں کہ وہ کیا بن سکتے ہیں۔ یہی امن جیتنے کا واحد راستہ ہے۔ایک ایسا خطہ جو دہائیوں کے انتشار سے ٹکڑے ٹکڑے ہو چکا ہے، وہاں واجد ایک پل بن چکے ہیں۔ نسلوں، نظریات اور امکانات کو جوڑنے والے۔ ایک سابق پتھراؤ کرنے والا جو اب ایک وقت میں ایک نوجوان کو امن سکھا رہا ہے۔2018 سے اب تک "سیو یوتھ سیو فیوچر" نے کشمیر بھر میں دو لاکھ سے زائد نوجوانوں تک رسائی حاصل کی ہے، اور مکالمے، بااختیاری، اور مسلسل کمیونٹی انگیجمنٹ کے ذریعے قیامِ امن کے اپنے غیر متزلزل مشن کو جاری رکھے ہوئے ہے۔