ودوشی گور / لکھنؤ

ہندوستان کی ابھرتی ہوئی ہاکی اسٹار ممتاز خان کی کہانی بالی ووڈ کی کسی بایوپک فلم کی اسکرپٹ جیسی محسوس ہوتی ہے۔لکھنؤ کی مصروف گلیوں سے بین الاقوامی ہاکی میدانوں تک کا اُن کا سفر ایک حقیقی ’چک دے!‘ لمحہ ہے، جو استقامت، قربانی اور خالص صلاحیت پر مبنی ہے۔ممتاز نے 2018 کے بیونس آئرس یوتھ اولمپکس میں 10 شاندار گول اسکور کیے، جن کی بدولت ہندوستان نے چاندی کا تمغہ حاصل کیا۔ وہیں سے وہ قومی سطح پر توجہ کا مرکز بنیں۔ ان کی پھرتی، درستگی، اور میدان پر قدرتی جبلت نے انہیں ہندوستانی خواتین ہاکی کی سب سے اُبھرتی ہوئی فارورڈز میں شامل کر دیا۔

آٹھ بہن بھائیوں پر مشتمل ایک خاندان میں پیدا ہونے والی ممتاز خان نے لکھنؤ کے کینٹ علاقے میں ایک تنگ و تاریک، ایک کمرے کے مکان میں پرورش پائی۔ ان کے والد، حفیظ خان، جو کبھی سائیکل رکشہ چلایا کرتے تھے، بعد میں  سبزی کا ٹھیلہ لگانے لگے تاکہ خاندان کا پیٹ پال سکیں۔ ممتاز بھی اپنے بہن بھائیوں کی طرح  اسٹال پر والدین کا ہاتھ بٹاتی رہیں، ساتھ ہی تعلیم اور گھریلو ذمہ داریوں کو بھی سنبھالتی رہیں۔ یہ ایک کٹھن زندگی تھی، لیکن امید سے خالی کبھی نہ تھی۔

سال 2011 میں اسکول کی ایک دوڑ کے دوران کوچ نیلم صدیقی نے ممتاز کی صلاحیت پہچانی۔ ممتاز یاد کرتی ہیں:"انہوں نے میرے والد سے آکر کہا کہ مجھے ہاکی کھیلنے کی اجازت دیں۔ اُس وقت مجھے کھیل کے بارے میں کچھ بھی معلوم نہیں تھا۔ لیکن ایک بار جب میں نے کھیلنا شروع کیا، تبھی سمجھ لیا کہ یہی میرا راستہ ہے۔"

ممتاز خان وزیر اعظم نریندر مودی سے ملاقات کرتے ہوئے

کامیابیوں کی فہرست قابلِ فخر 
سال2016 کے انڈر-18 ایشیا کپ میں کانسی کا تمغہ، 2018 کے سکس-نیشن انویٹیشنل ٹورنامنٹ میں چاندی کا تمغہ، کینٹر فٹزجیرالڈ انڈر-21 انٹرنیشنل فور نیشنز ٹورنامنٹ میں سونے کا تمغہ، اور 2022 میں ہاکی انڈیا کی جانب سے "اسنتا لکرا ایوارڈ فار اپ کمنگ پلیئر آف دی ایئر" سے نوازا جانا یادگار رہا

لیکن ان اعزازات کے پیچھے ایک ایسا خاندان ہے جو آج بھی زمین سے جُڑا ہوا ہے۔ان کی بڑی بہن فرح کہتی ہیں ۔ہم نے ہمیشہ جدوجہد کی، لیکن ممتاز کو ہندوستانی جرسی میں دیکھ کر لگتا ہے کہ ہماری تمام قربانیاں رنگ لائیں۔ایک اور بہن، روحی، کہتی ہیں۔بچپن سے ہی اس میں جذبہ تھا۔ لیکن اسے ملک کے لیے باہر جا کر کھیلتے دیکھنا، یہ آج بھی ایک خواب سا لگتا ہے۔ان کی والدہ، قیصر جہاں، جو اکثر سبزی کا ٹھیلہ سنبھالتی ہیں، خاموش فخر سے کہتی ہیں۔ہم نے کبھی یہ خواب نہیں دیکھا تھا۔ ہم تو بس محنت کرتے رہے اور بچوں کا ساتھ دیا۔

ممتاز خان اپنے والدین کے ساتھ 

آج ممتاز نہ صرف اپنے خاندان کی جدوجہد اور استقامت کی علامت ہیں بلکہ ایک بدلتے ہوئے ہندوستان کی نمائندہ بھی ہیں ۔ ایسا ہندوستان جہاں عام پس منظر سے آنے والی صلاحیتیں عالمی سطح پر پہنچ رہی ہیں۔اگرچہ اُن کی فوری توجہ جونیئر ورلڈ کپ پر مرکوز ہے، لیکن وہ مستقبل کی جانب بھی دیکھ رہی ہیں۔ایک قدم ایک وقت میں، وہ کہتی ہیں۔
میرا خواب ہے کہ میں سینئر سطح پر ہندوستانکے لیے میڈل جیتوں۔ یہ میرے والدین اور اُن تمام لوگوں کے لیے میرا سب سے بڑا خراج ہوگا جنہوں نے مجھ پر یقین کیا۔

جب ہندوستانی پرچم آسمان پر لہراتا ہے

ممتاز خان کا سفر۔ لکھنؤ کی تنگ گلیوں سے بین الاقوامی ہاکی میدانوں تک۔ اس بات کا جیتا جاگتا ثبوت ہے کہ خواب کبھی سرحدوں میں قید نہیں ہوتے، بشرطیکہ ان کے ساتھ جذبہ، نظم و ضبط اور صحیح تعاون شامل ہو۔