نوشاد اختر | گیا، بہار

صرف 18 برس کی عمر میں جب فیضان علی بزنس اسٹڈیز میں ڈگری حاصل کر رہے تھے، زندگی نے انہیں ایک نئے راستے پر ڈال دیا۔ایسا راستہ جو کتابوں یا کیریئر سے کہیں آگے تھا۔ ان کے دل میں انسانیت کی خدمت کی آگ روشن ہو چکی تھی۔

انہوں نے آواز - دی وائس سے بات کرتے ہوئے کہا کہ اگر آپ کسی کا درد سچ میں محسوس کرنا چاہتے ہیں تو عمر اور تعلیم کوئی معنی نہیں رکھتیں، اصل چیز جذبہ ہے۔ جس دن آپ خود کو سماج کے لیے جوابدہ سمجھنے لگیں، وہی دن آپ کی خدمت کا آغاز ہوتا ہے۔آج 23 سالہ فیضان علی، بہار کے شہر گیا سے تعلق رکھنے والے ایک عام گھرانے کے نوجوان، بے لوث خدمت کی زندہ مثال ہیں۔ وہ کبھی سوچ بھی نہیں سکتے تھے کہ ان کی زندگی کسی کارپوریٹ آفس کے بجائے سماج کی گلیوں میں خدمت کے کاموں میں گزرے گی۔

COVID-19 کے دوران جب پورا ملک بے یقینی میں مبتلا تھا، فیضان کی انسانیت سے جڑی سوچ نے "ہیومن ہُڈ آرگنائزیشن" (H2O) کو جنم دیا۔ حالانکہ اس تنظیم کا تصور 2017 میں ابھرا تھا، لیکن وبا کے دوران یہ ایک مضبوط تحریک کی شکل اختیار کر گئی۔

شروع میں صرف خون عطیہ کرنے پر توجہ دینے والی یہ تنظیم اب مختلف میدانوں میں سرگرم ہے

لاوارث لاشوں کی آخری رسومات

غریبوں میں کھانے کی تقسیم

ضرورت مندوں کو کپڑے اور کمبل فراہم کرنا

پلازما عطیہ مہم

ایمرجنسی میڈیکل امداد

حیض سے متعلق صفائی و آگہی

قدرتی آفات میں ریلیف ورک

لاک ڈاؤن کے دوران جب خون کی قلت عام تھی، فیضان اور ان کی ٹیم نے 24 زندگیوں کو بروقت خون فراہم کر کے بچایا۔ ان کی ٹیم میں کالج طلبہ، بزرگ شہری، ہندو، مسلمان اور خواتین شامل ہیں۔سب ایک مقصد کے لیے متحد تھے کہ  زندگیاں بچانی ہیں۔

H2O کے رضاکار صرف نام نہیں، اصل ہیرو ہیں:

سیفی خان نے کینسر کے مریض ابھیے شرما کی جان بچائی

نواب عالم نے الوکا سنہا کی مدد کی

حامد خان نے اوشا دیوی کو خون دیا

محمد عاقب نے نیرج کمار کی زندگی بچائی

یہ سب انسانیت کی ایسی کہانیاں ہیں جو ہندو-مسلم اتحاد کی علامت ہیں، جہاں مذہب نہیں، صرف انسان کی ضرورت دیکھی جاتی ہے۔

تنظیم کی سرگرمیاں صرف طبی ہنگامی حالات تک محدود نہیں۔ یہ ٹیم بے گھر افراد کو کھانا دیتی ہے، سردیوں میں کمبل اور گرم کپڑے فراہم کرتی ہے، لاوارث لاشوں کی آخری رسومات ادا کرتی ہے اور قدرتی آفات میں امدادی کاموں میں سب سے آگے ہوتی ہے۔چاہے وہ کیرالا میں سیلاب ہو یا بہار میں مقامی بحران۔

فیضان کی سب سے بڑی آزمائش 2021 کے رمضان میں آئی، جب وہ COVID-19 مریضوں کو آکسیجن سلنڈر پہنچا رہے تھے، اور اسی دوران انہیں اپنے والد عطاالرحمٰن کے انتقال کی اطلاع ملی۔ یہ لمحہ کسی کو بھی توڑ سکتا تھا، لیکن فیضان نے خدمت کا سلسلہ جاری رکھا۔ ان کے اسی حوصلے پر انہیں بہار شوریہ سمان اور مگدھ رتن ایوارڈ جیسے اعزازات سے نوازا گیا۔

فیضان کے لیے خون دینا محض جسمانی عمل نہیں بلکہ ایک علامتی پیغام ہے,ہمیں زندگی کے لیے اپنا خون دینا چاہیے تاکہ ہم صرف اپنے جسم میں نہیں بلکہ دوسروں کے دلوں میں بھی زندہ رہیں۔"

گیا میں قائم ہیومن ہُڈ کا دائرہ دہلی، وارانسی اور لکھنؤ تک وسیع ہو چکا ہے۔ ان کا مشن ہے کہ کوئی بھی انسان صرف وقت پر مدد نہ ملنے کی وجہ سے نہ مرے۔اور ہر شہری کے دل میں خدمت کا جذبہ پیدا ہو۔ اس مقصد کے لیے فیضان نے نوجوانوں کے لیے انٹرن شپ پروگرامز شروع کیے ہیں تاکہ انہیں عملی تربیت دی جا سکے۔

آج فیضان علی بہار میں نوجوان قیادت کی روشن علامت بن چکے ہیں۔ سوشل میڈیا اور قومی میڈیا میں ان کے کام کو سراہا جا رہا ہے۔ ان کی ٹیم دن رات ایک کر کے اپنے جذبے کے ساتھ میدانِ عمل میں سرگرم ہے۔

فیضان نے اپنے انٹرویو میں ایک جذباتی لمحے میں کہا:"چاہے میں سو سال جِیُوں یا نہ جِیُوں، میں چاہتا ہوں کہ سو بار خون عطیہ کروں اور ہزاروں دلوں میں ہمیشہ کے لیے زندہ رہوں۔فیضان کی کہانی یہ ثابت کرتی ہے کہ خدمت کے لیے عمر، دولت یا ڈگری نہیں، صرف دردِ دل اور جذبہ چاہیے۔ خودغرضی سے بھرے اس دور میں، فیضان جیسے لوگ امید کی کرن ہیں۔جو یہ دکھاتے ہیں کہ ایک فرد بھی دنیا بدل سکتا ہے، اگر اس کے پاس ارادہ ہو۔گیا کی گلیوں سے نکلا یہ سفر آج پورے ملک کے نوجوانوں کے دلوں میں گونج رہا ہے۔