سال 1993 میں نیشنل لٹریسی مشن سے جڑنے کے بعد انہوں نے اپنے محلے میں رات کا اسکول یعنیٰ نئٹ اسکول شروع کیا، جہاں دن بھر مزدوری کرنے والے لوگ شام میں تعلیم حاصل کرنے آتے تھے۔ چراغوں کی مدھم روشنی میں علم کی یہ شمع آہستہ آہستہ پورے علاقے میں بیداری کا پیغام بن گئی۔ 1982 میں مسجد کے قریب قائم ہونے والی قریش اکیڈمی جب زوال کا شکار ہوئی، تو ڈاکٹر قریشی نے سیکریٹری کی حیثیت سے اس کی ذمہ داری سنبھالی۔ ان کی کوششوں سے یہ مڈل اسکول سے ہائی اسکول بن گیا۔ انہوں نے والدین کو قائل کیا کہ بیٹیوں کی تعلیم ہی ان کا اصل سرمایہ ہے، اور جلد ہی لڑکیاں دوبارہ اسکول آنے لگیں۔ ان کے وژن کے نتیجے میں آج قریش اکیڈمی میں ایک ہزار سے زائد طلبہ زیر تعلیم ہیں، جن میں اکثریت لڑکیوں کی ہے۔ انہوں نے اسکول میں حوصلہ افزائی کے لیے ہفتہ وار نشستیں شروع کیں جن میں کرکٹر صبا کریم، مزاحیہ فنکار احسان قریشی، صحافی وجے پاتھک اور ماہر تعلیم ڈاکٹر جاوید احمد جیسے معزز شخصیات شامل ہوئیں۔ ان نشستوں نے طلبہ میں خواب دیکھنے اور محنت کرنے کا جذبہ پیدا کیا۔ اسکول نے میٹرک میں 100 فیصد کامیابی کا ریکارڈ قائم کیا۔ سوبودھ کانت سہائے کی مدد سے آڈیٹوریم بنا، ڈاکٹر جاوید قدوس کی کاوش سے سائنس لیب قائم ہوئی، جبکہ روٹری کلب رانچی ساؤتھ نے بیت الخلاء تعمیر کرائے۔