رپورٹ: دولت رحمان، گوہاٹی

ڈاکٹر انورالدین چودھری آسام حکومت میں کمشنر اور سیکریٹری کے عہدے سے ریٹائر ہو چکے ہیں، لیکن وہ صرف ایک عام سرکاری افسر نہیں تھے۔ اپنے آرام دہ سرکاری دفتر میں بیٹھنے کے بجائے انہوں نے ایک الگ راہ چُنی ۔ آسام کی جنگلی حیات کی بقا کے لیے جدوجہد کی۔ سرکاری فرائض کی تکمیل کے بعد جب دوسرے افسران گھر چلے جاتے تھے، تو ڈاکٹر چودھری جنگلوں، پرندوں اور دیگر حیاتِ وحش کی کھوج میں نکل پڑتے تھے۔ یہی وجہ ہے کہ انہیں "دی برڈ مین آف آسام" کے نام سے جانا جانے لگا۔

میڈیا سے دور اور شہرت سے بے نیاز ڈاکٹر چودھری شمال مشرقی ریاستوں کے پرندوں پر کتابیں لکھنے والے پہلے شخص ہیں۔ ان کے تحقیقی کاموں نے اس خطے میں مختلف پرندوں کی نسلوں کے تحفظ اور بیداری میں اہم کردار ادا کیا ہے۔ وہ 30 سے زائد کتابوں، 50 تکنیکی رپورٹس اور 900 سے زائد مضامین و سائنسی مقالوں کے مصنف ہیں۔اس وقت 67 سالہ ڈاکٹر چودھری نے آسام کا ریاستی پرندہ "سفید پروں والا لکڑی بطخ" (White-Winged Wood Duck) قرار دینے میں کلیدی کردار ادا کیا تھا۔ 2003 میں اس پرندے کو انٹرنیشنل یونین فار کنزرویشن آف نیچر(IUCN) کی فہرست میں خطرے سے دوچار نسل قرار دیا گیا تھا، لیکن آج ریاست میں اس پرندے کی تعداد 1300 سے زیادہ ہے۔

ریٹائرمنٹ کے بعد وہ آرام دہ زندگی گزار سکتے تھے، مگر انہوں نے اپنی فرصت کا وقت بھی فطرت کے تحفظ اور اس پر لکھنے کے لیے وقف کر دیا۔ حال ہی میں انہوں نے "امور فالکن" نامی مہاجر پرندے پر تحقیق مکمل کی ہے، جو آسام سے جنوبی افریقہ تک کا طویل سفر طے کرتا ہے اور اس کی افزائش نسل مشرقی سائبیریا میں ہوتی ہے۔

ڈاکٹر چودھری جنگلاتی زندگی کے محافظ 

امور فالکن(Falco amurensis) ایک طویل فاصلے تک ہجرت کرنے والا پرندہ ہے جو مشرقی سائبیریا، منگولیا اور ملحقہ علاقوں میں افزائش نسل کے بعد موسم سرما گزارنے کے لیے افریقہ کا سفر کرتا ہے۔ اس کے راستے میں یہ پرندے شمال مشرقی بھارت سے گزرتے ہیں اور ناگالینڈ، منی پور، آسام اور میگھالیہ کے مخصوص مقامات پر ہزاروں کی تعداد میں آرام کرتے ہیں۔ڈاکٹر چودھری کے مطابق "کربی آنگلانگ ضلع میں شکاری انہیں ہاتھوں سے پکڑ لیتے تھے یا ناگالینڈ میں جال، بندوقوں یا غلیل سے مارتے تھے۔ ان کا کہنا ہے کہ آسام میں کئی مقامات پر امور فالکن دیکھے جاتے ہیں مگر کچھ مخصوص جگہوں پر بڑی تعداد میں قیام کرتے ہیں، جیسے ویسٹ کر بی آنگلانگ اور ڈما ہاساؤ (نارتھ کاچر ہلز) کے علاقے۔

 1996 میں ڈاکٹر چودھری نے حبنگ میں ایک آگاہی مہم چلائی جس کے بعد شکاریوں کی سرگرمیاں کم ہوئیں۔ اسی طرح 2004 میں ناگالینڈ کے ضلع موکوک چونگ میں چلائی گئی ان کی مہم سے چینگ تونگیا علاقے میں شکاریوں کی کارروائیاں نمایاں حد تک کم ہو گئیں جہاں ہزاروں امور فالکن آرام کرتے تھے۔شمال مشرق کی جنگلی حیات پر ان کے تحقیقی کام مستند سمجھے جاتے ہیں۔ 1990 میں ان کی پرندوں کی جامع فہرست اور 2000 میں تفصیلی کتاب نےA.O. Hume اورStuart Baker کی صدی پرانی فہرستوں کا خلا پُر کیا۔ان کی دیگر اہم کتابوں میں "پرندے: اروناچل پردیش، ناگالینڈ، میزورم اور میگھالیہ"، "جنگلی بھینس پر پہلا مونوگراف" (2010)، "شمال مشرقی بھارت کے ممالیہ" (2013)، "mammals of India(2016)اور "Manas: India’s world heritage in danger(2019)" شامل ہیں۔

1996 میں ناگالینڈ کے کوہیما بازار کے دورے کے دوران انہوں نے شہر کے ہال کے باہر جنگلی جانوروں کی فروخت ہوتے دیکھی - مینڈک، چوہے، ہرن، پرندے، بانس کا تیتر، چینی پینگولن اور سؤر کی ایک نسل — جو شکاری مرد گھروں لاتے تھے اور خواتین بیچتی تھیں۔ اس سے بے چین ہو کر انہوں نے "پیپلز گروپ آف ناگالینڈ" نامی این جی او سے رابطہ کیا اور حکام کو افزائش نسل کے موسم میں جنگلی جانوروں کی خرید و فروخت پر پابندی لگوانے پر آمادہ کیا۔

ان کی شمال مشرقی ریاستوں میں طویل مسافتوں اور تجربات نے انہیں کئی دیگر طریقوں سے بھی نیک نام بنا دیا۔ 30 سال قبل انہوں نے کر بی قبیلے کے ایک 50 سالہ شکاری سرسنگ رونگفار کو شکار چھوڑ کر محکمہ جنگلات میں ملازمت پر آمادہ کیا۔ اسی طرح بکشا ضلع میں ڈپٹی کمشنر کی حیثیت سے ان کا تقرر تھا تو مانس نیشنل پارک کے کئی شکاریوں کو ہتھیار ڈالنے پر قائل کیا — جس کی تقلید بعد میں دوسرے مقامات پر بھی کی گئی۔

ڈاکٹر چودھری کے فطرت سے عشق نے آسام حکومت کو مجبور کر دیا کہ وہ انہیں این جی او میں شامل ہونے کی اجازت دے۔ "یہ آسام میں پہلی بار ہوا تھا کہ حکومت سے این جی او میں باقاعدہ ڈیپوٹیشن کی منظوری ملی۔ میں آج بھی مرحوم ہتیسور سیکیا (وزیر اعلیٰ آسام) اور جتن ہزاریکا (بیوروکریٹ و مشیر) کا شکر گزار ہوں۔"

اب بھی وہ آسام اور شمال مشرق کے دیگر غیر دریافت شدہ ماحولیاتی مقامات کی تلاش کے لیے سرگرم ہیں۔ ان کا کہنا ہے، "میرا ارادہ بھوٹان، مشرقی نیپال، جنوبی تبت، شمالی و مغربی میانمار اور مشرقی بنگلہ دیش جانے کا ہے۔" ان کے لہجے میں اب بھی ولولہ اور جذبہ نمایاں تھا۔