رپورٹ: دولت رحمان، گوہاٹی

آسام کے بیشتر مسلم نوجوان جو اترپردیش کے دارالعلوم دیوبند سے تعلیم حاصل کر کے نکلتے ہیں، بعد ازاں  مساجد، مدارس اور دیگر اداروں میں قرآن مجید اور اسلامی تعلیمات پڑھاتے نظر آتے ہیں۔ لیکن مولانا نورالامین قاسمی نے اس روایت سے ہٹ کر ایک منفرد راستہ اختیار کیا۔ انہوں نے معاشرے میں اسلام اور مسلمانوں کے بارے میں پائے جانے والے غلط فہمیوں کو دور کرنے کا مشن شروع کیا ہے۔ مولانا نے آسام کے مختلف علاقوں میں اسلام کی اصل روح کو جدید اور منفرد انداز میں پیش کرنے کا بیڑا اٹھایا ہے۔

مولانا نورالامین قاسمی کی کئی ویڈیوز سوشل میڈیا پر وائرل ہو چکی ہیں۔ ان ویڈیوز میں وہ مسلمانوں کو تعلیم کی اہمیت، اسلام کی اصل تعلیمات اور قرآن کی آیات کا مقامی آسامیہ زبان میں ترجمہ اور تشریح کرتے نظر آتے ہیں تاکہ عام لوگ اسے آسانی سے سمجھ سکیں۔ وہ مساجد، عیدگاہوں، مدارس، عوامی جلسوں اور دیگر بااثر پلیٹ فارمز پر اپنے متاثر کن خطابات پیش کرتے رہے ہیں۔

حال ہی میں مولانا نورالامین قاسمی نے آسام کے قارئین کے لیے قرآن پاک کا آسامیہ زبان میں ترجمہ اور تفسیر شائع کی ہے۔ ساتھ ہی انہوں نے قرآن مجید کا آڈیو ورژن بھی لانچ کیا ہے جس میں ان کی اپنی آواز شامل ہے، کیونکہ آج کل بہت سے لوگ وقت کی کمی کے باعث کتابیں پڑھنے کے عادی نہیں رہے۔

 مولانا نورالامین قاسمی  ایک روشن چہرہ اور بلند عزائم 

مولانا نے آسام کے مرکزی شہر تیزپور میں "اسلامک ریسرچ اینڈ اسٹڈی سینٹر" کی بنیاد بھی رکھی ہے، جس میں ان کے ساتھ ایسے نوجوان شامل ہیں جنہوں نے اسلامی تعلیم حاصل کرنے کے ساتھ ساتھ معاشرتی ترقی کا وژن بھی اپنایا ہے۔

مولانا نورالامین قاسمی نے اپنی ابتدائی تعلیم آسام کے ضلع سونتپور کے سوٹیا ہائر سیکنڈری اسکول سے حاصل کی۔ اس کے بعد ضلع لکھیم پور کے کھوتکٹیا دینی علیا مدرسہ میں اسلامی تعلیم کے لیے داخلہ لیا۔ وہاں چھ سال تعلیم حاصل کرنے کے بعد ہو جائی ضلع کے جلالیہ مدرسہ میں داخل ہوئے۔ جلالیہ مدرسہ میں تعلیم کے دوران ہی انہوں نے عام نصاب کے تحت ہائی اسکول لیونگ سرٹیفکیٹ (کلاس 10) کا امتحان کامیاب کیا۔ چار سالہ دینی تعلیم مکمل کرنے کے بعد وہ اترپردیش کے دارالعلوم دیوبند چلے گئے۔ وہاں سے اسلامی تعلیم مکمل کرنے کے بعد انہوں نے آسام کے ہو جائی ضلع کے مرکز المعارف میں تدریس کا آغاز کیا۔

درس و تدریس کے دوران مولانا قاسمی نے کامیابی کے ساتھ ہائر سیکنڈری (کلاس 12) کا امتحان بھی عام نصاب کے تحت پاس کیا۔ اس کے بعد انہوں نے روپہی کالج سے گریجویشن اور گوہاٹی یونیورسٹی سے پوسٹ گریجویشن کی ڈگری حاصل کی۔ اب وہ گوہاٹی یونیورسٹی سے پی ایچ ڈی کر رہے ہیں۔

"آواز-دی وائس" کو دیے گئے ایک انٹرویو میں مولانا قاسمی نے کہا  کہ ہم آسام کے مسلمان ہیں اور ہم بطور آسامیہ مسلمان ہی رہتے ہیں۔ کبھی کبھی اسلام کے بارے میں کنفیوژن ہو جاتا ہے اور اس کی وجہ کچھ مسلمان خود بھی ہوتے ہیں جن کی لاعلمی اسلام کے غلط تصور کو فروغ دیتی ہے۔ مجھے محسوس ہوا کہ لوگوں کو قرآن کی تعلیمات اور نبی اکرم صلی اللہ علیہ وسلم کے پیغامات کی اصل روح سے روشناس کرانا ضروری ہے۔ ہمیں اسلام کو اپنی مادری زبان میں پیش کرنا چاہیے۔ اسی لیے میں یہ کوشش کر رہا ہوں۔ قرآن عربی میں ہے، اس لیے ہماری ذمہ داری ہے کہ ہم اس کی وضاحت اپنی زبان میں کریں تاکہ ہر کوئی سمجھ سکے۔"

 مولانا نورالامین قاسمی  امدادی کاموں میں آگے آگے

جمعہ کے دن مسلمانوں کے اجتماع میں امام صاحب خطبہ دیتے ہیں جس میں اسلام کے اصول، سماج کے تئیں ذمہ داری، نیک اعمال کی تلقین، دیگر مذاہب کے احترام کی بات کی جاتی ہے۔ لیکن خطبہ عربی زبان میں ہونے کی وجہ سے عام لوگوں کے لیے اس کا مطلب سمجھنا مشکل ہو جاتا ہے۔مولانا نے کہا کہ میں نے سوچا کہ اگر خطبہ کے پیغامِ امن، انسانیت اور دیگر باتوں کو آسان مقامی زبان میں سمجھایا جائے تو لوگ فائدہ اٹھائیں گے اور اسلام کے متعلق پائی جانے والی غلط فہمیاں بھی دور ہوں گی۔ اس بارے میں نظریاتی اختلافات ضرور ہیں کہ خطبہ صرف عربی میں ہو یا مقامی زبان میں بھی بیان کیا جائے، مگر اسلامی قانون کے مطابق چونکہ نبی اکرم صلی اللہ علیہ وسلم کے زمانے سے خطبہ عربی میں دیا جا رہا ہے، اس لیے بہت سے مقامات پر یہ روایت اب تک قائم ہے۔

مولانا نورالامین قاسمی نے زور دیا کہ جدید عام تعلیم کے ساتھ اسلامی تعلیم بھی ضروری ہے۔ انہوں نے کہا: "مسلمان سماج تعلیم میں بہت پیچھے ہے۔ مسلمانوں میں مولانا اور علما کو بڑی عزت دی جاتی ہے، اس لیے اگر علما تعلیم کے بارے میں نصیحت کریں گے تو لوگ ضرور سنیں گے اور فائدہ اٹھائیں گے۔ ہمارے مذہبی رہنماؤں کو اس سلسلے میں مزید کام کرنا چاہیے۔ بدقسمتی سے مذہبی اجتماعات میں ان باتوں پر کم زور دیا جاتا ہے۔ بنیادی اسلامی تعلیم لینا فرض ہے مگر ہمیں اچھا شہری اور مستقبل کے لیے تیار انسان بننے کے لیے جدید تعلیم بھی حاصل کرنی چاہیے۔

مولانا نورالامین قاسمی تمام مذہبی اجتماعات میں مسلسل انہی خیالات کا اظہار کرتے رہتے ہیں۔ ان کا کہنا ہے کہ ہمارے نبی صلی اللہ علیہ وسلم نے علم کے لیے چین تک جانے کا حکم دیا۔ قرآن کا پہلا لفظ 'اقرا' (پڑھ) ہے۔ جب ہمارے نبی نے چین جانے کی اجازت دی، جہاں اسلامی تعلیم کا کوئی نظام نہ تھا، تو اس کا مطلب ہے کہ انہوں نے جدید علوم اور ٹیکنالوجی کی تعلیم پر بھی زور دیا۔ آج صرف 4 فیصد مسلم بچے مدارس میں تعلیم حاصل کرتے ہیں۔

 مولانا نورالامین قاسمی  کی زندگی ایک مشن 

تمام مسلم بچوں کا مدرسے میں پڑھنا ضروری نہیں۔ یہ 4 فیصد بچے مولانا یا حافظ بنیں گے تاکہ مستقبل میں دین کو سنبھال سکیں۔ باقی 96 فیصد بچوں کو جدید تعلیم دلا کر اچھے شہری بنانا اور سماج میں مثبت کردار ادا کرنے کے قابل بنانا ہماری ذمہ داری ہے۔ مدرسوں یا جدید تعلیمی اداروں میں زیر تعلیم بچوں کے علاوہ مولانا نے اسکول چھوڑنے والے بچوں کے بارے میں بھی فکر ظاہر کی۔ ان کا کہنا تھا کہ مسلم سماج کی موجودہ صورت حال سے نجات صرف تعلیم کے ذریعے ممکن ہے۔