تحریر: آشا کھوسا

2017 میں لائن آف کنٹرول پر ایک ہولناک حملے کی خبر نے پورے ملک کو ہلا کر رکھ دیا تھا۔ انڈین آرمی کے نائب صوبیدار پرمجیت سنگھ کو پاکستان کی بارڈر ایکشن ٹیم نے بے دردی سے شہید کر دیا تھا، ان کی لاش کی بے حرمتی کی گئی۔ یہ واقعہ پنجاب کے ضلع ترن تارن کے گاؤں وینپوئن میں اُن کے اہلِ خانہ کے لیے ایک ایسا صدمہ تھا جس نے پورے علاقے کو سوگوار کر دیا۔

ان گنے چنے لوگوں میں جو اس سانحے سے متاثر ہوئے، ہماچل پردیش کے دو اعلیٰ افسران تھے،کلو ضلع مجسٹریٹ یونس خان اور اُن کی اہلیہ انجم آرا، جو اُس وقت سولن میں سپرنٹنڈنٹ آف پولیس کے عہدے پر فائز تھیں۔ یہ جوڑا نہ صرف حب الوطنی کے جذبے سے، بلکہ ایک انسانی فرض کے احساس سے متاثر ہو کر، شہید کے گھر وینپوئن گاؤں پہنچا تاکہ اپنے جذبات اور احترام کا اظہار کر سکے۔۔یونس یاد کرتے ہیں  کہ ہم ایک ایسے خاندان کے سامنے کھڑے تھے جو اپنا ستون کھو چکا تھا۔ جب پرمجیت سنگھ کا جسدِ خاکی پہنچا، ان کی بیوی اور بچوں کی آنکھوں میں جو درد تھا، ہم اس سے نظریں نہیں چرا سکتے تھے۔

جب اُنہوں نے پرمجیت کی ننھی بیٹی خوشدیپ کو بانہوں میں لیا، تو وہ دونوں ایک بڑے فیصلہ لینے کے قریب تھے۔ انجم کہتی ہیں کہ یہ صرف ایک جذباتی لمحہ نہیں تھا، بلکہ ایک پختہ عہد تھا۔ ہمیں خود سے یہ سوال کرنا تھا: کیا ہم اس بچی کا صرف آج نہیں بلکہ برسوں تک ساتھ دے سکتے ہیں؟

یونس خان مالیر کوٹلہ کے ریلوے اسٹیشن پر

کچھ لمحوں کی خاموشی اور غور و فکر کے بعد، اُنہوں نے یہ فیصلہ کیا کہ وہ خوشدیپ کی تعلیم اور جذباتی کفالت کی پوری ذمہ داری لیں گے ۔ بغیر اس کے کہ اُسے اُس کے گھر یا گاؤں سے دور کیا جائے۔ خوشدیپ اپنی ماں اور بہن بھائیوں کے ساتھ پنجاب میں ہی رہے گی، جب کہ "شملہ والے انکل اور آنٹی" اُس کے لیے ہمہ وقت موجود رہیں گے۔

آج خوشدیپ بارہویں جماعت کی ایک ذہین طالبہ ہے، جس کے اپنے خواب ہیں۔ یونس کہتے ہیںکہ حال ہی میں اُس نے ایک لیپ ٹاپ مانگا۔ میں نے کہا کہ سستا مت لینا اور اُسے ایک بہترین ماڈل بھیجا۔ کئی بار مجھے اپنی ذات پر کمی کرنی پڑتی ہے تاکہ اُس کی مدد کر سکوں، لیکن جو خوشی ملتی ہے، وہ ان سب اخراجات سے کہیں بڑھ کر ہے۔وقت کے ساتھ یہ رشتہ مزید مضبوط ہوا ہے۔ دونوں خاندان رکشا بندھن، عید، اور دیوالی ایک ساتھ مناتے ہیں۔ انجم کہتی ہیں کہ میرا بیٹا ہر سال خوشدیپ اور اس کی بہن سمرندیپ کو راکھی باندھتا ہے۔ وہ واقعی اُس کی بہنیں بن چکی ہیں۔

یہ سارا انتظام پوری شفافیت اور عزتِ نفس کے ساتھ کیا گیا۔ یونس وضاحت کرتے ہیں کہہم نے ہر بات پرمحجیت کور، یعنی شہید کی بیوی، اور فوجی افسران سے بات کی۔ ہمارا مقصد بچی کو اُس کے گھر سے دور لے جانا نہیں تھا، بلکہ اپنے دل اور گھر کو اُس کے لیے کشادہ کرنا تھا۔یہ تعلق صرف مالی مدد تک محدود نہیں۔ یونس پرمجیت کور کو اپنی بہن سمجھتے ہیں اور ہر وہ ثقافتی اور جذباتی فریضہ نبھاتے ہیں جو ایک پنجابی خاندان میں بھائی انجام دیتا ہے۔ وہ کہتے ہیں’’ میں ایک بیوروکریٹ ضرور ہوں، مگر ساتھ ہی ایک بھائی، ایک باپ جیسا اور سب سے بڑھ کر ایک ہندوستانی بھی ہوں۔خان خاندان باقاعدگی سے خوشدیپ کے گھر آتا جاتا ہے اور انہیں شملہ بھی مدعو کرتا ہے۔ گزشتہ دیوالی انہوں نے ہندوستان-پاکستان سرحد کے قریب لونگوال سیکٹر میں فوجی جوانوں کے ساتھ منائی۔ انجم کہتی ہیں۔ اب ہمارا رشتہ فوج سے ذاتی بن چکا ہے۔ جب ہم دیا جلاتے ہیں، تو ان محافظوں کے نام پر بھی ہوتا ہے جو ہمارے ملک کی سرحدوں کی حفاظت کرتے ہیں۔"

یونس، جو 2010 بیچ کے آئی اے ایس افسر ہیں اور مالیرکوٹلہ کے رہنے والے ہیں، اس وقت ہماچل پردیش میں اسٹیٹ ٹیکس و ایکسائز کمشنر کے طور پر کام کر رہے ہیں۔ وہ ریت مافیا کے خلاف اپنی بے باک کارروائیوں کی وجہ سے جانے جاتے ہیں ۔ یہاں تک کہ ایک بار ان کی جان لینے کی کوشش بھی کی گئی تھی۔ انجم، 2011 بیچ کی آئی پی ایس افسر، اس وقت جنوبی شملہ کی ڈی آئی جی ہیں۔وہ اس سارے سفر میں اپنے خاندان کا شکریہ ادا کرتے ہیں۔ یونس کہتے ہیں"میری ماں نے کہا: عام لوگ اپنے لیے جیتے ہیں، عظمت اس میں ہے کہ تم دوسروں کے لیے جیو۔ ہم اسی اصول کو اپنا رہنما بنا کر زندگی گزاررہے ہیں۔"

انجم آرا اور یونس خان شہید کے خاندان کے ساتھ 

جہاں تک خوشدیپ کے مستقبل کا تعلق ہے، کچھ لوگ کہتے ہیں کہ وہ بھی یونس اور انجم کی طرح سول سروس میں جانا چاہتی ہے۔ مگر یونس محتاط انداز میں کہتے ہیں ہم چاہتے ہیں کہ وہ وہی کرے جو اُسے پسند ہے۔ ہمارا کام اُسے طاقت دینا ہے، راستہ طے کرنا نہیں۔ایک ایسے وقت میں جب اکثر جذبات صرف الفاظ کی حد تک محدود رہتے ہیں، یونس خان اور انجم آرا نے ایک سپاہی کی قربانی کو خراجِ عقیدت پیش کرنے کا حقیقی مطلب سمجھایا ہے ۔ الفاظ سے نہیں، بلکہ عملی اقدام اور ایک ایسے وعدے سے جو سیاست، پوسٹنگ یا خبروں سے کہیں آگے ہے۔انجم آخر میں کہتی ہیں"ہم نے کوئی غیرمعمولی کام نہیں کیا۔ ہم نے بس اپنے دل اور اپنی زندگی کو اُس خاندان کے لیے کھول دیا جو ہماری ہمدردی سے کہیں زیادہ کا حق دار تھا۔