ویدوشی گور / نئی دہلی

ساریہ عباسی کی پیدائش اور پرورش اتر پردیش کے شہر گورکھپور کے علاقے رام جانکی نگر محلہ میں ہوئی۔ ان کے والد، ڈاکٹر تحسین عباسی، آل انڈیا ریڈیو کے تجربہ کار نشریاتی ماہر ہیں، جبکہ والدہ، ریحانہ شمیم، ایک محنتی جونیئر ہائی اسکول ٹیچر ہیں۔ ان کا گھر حوصلہ افزائی اور اقدار سے بھرپور ایک ماحول فراہم کرتا رہا۔

ڈاکٹر تحسین عباسی نے متعدد انٹرویوز میں یاد کیا ہے کہ کس طرح بچپن سے ہی ساریہ کو مسلح افواج سے گہرا لگاؤ تھا۔ فوج میں موجود رشتہ دار، بچپن میں سنی گئی بہادری کی کہانیاں، اور وطن کے لیے سینہ تان کر کھڑے سپاہیوں کا منظر ان کے ذہن پر نقش ہوتا گیا۔ اسے ہمیشہ وردی سے محبت تھی،ان کے والد نے ایک یوٹیوب گفتگو میں کہا۔ فخر، مقصد، یہی سب کچھ اسے اپنی طرف کھینچتا تھا۔اگرچہ ان کی دلچسپی فوج میں تھی، تاہم انہوں نے ابتدا میں روایتی تعلیمی راستہ اختیار کیا۔

گورکھپور کے جی این نیشنل اکیڈمی سے اسکول کی تعلیم مکمل کی، اور بعد ازاں آئی ایم ایس غازی آباد سے جینیٹک انجینئرنگ میں بی ٹیک کی ڈگری حاصل کی۔ گریجویشن کے بعد معروف کمپنیوں سے، حتیٰ کہ بین الاقوامی سطح پر، آفرز آئیں۔ مگر کچھ کمی سی محسوس ہوتی رہی۔ساریہ کبھی بھی دفتر کی میز پر بیٹھنے والی زندگی کا خواب نہیں دیکھتی تھیں۔ ایک انٹرویو میں انہوں نے کہا، "میں خود کو صبح 9 سے شام 5 تک دفتر میں بیٹھا نہیں دیکھ سکتی تھی۔ میرا دل ہمیشہ قوم کی خدمت میں تھا۔"

چین کی سرحد پر تعینات ساریہ عباسی

 کیپٹن عباسی کی کہانی ہزاروں نوجوان لڑکیوں کے لیے مشعل راہ ہے جو قوم کی خدمت کا خواب رکھتی ہیں۔ ان کے چھوٹے بھائی، تمثیل احمد عباسی، اکثر فخر کے ساتھ خاندان کے جذبات کا اظہار کرتے ہیں۔ ایک انٹرویو میں ساریہ نے کہا، "لڑکیوں کے لیے چیلنجز ضرور ہوتے ہیں، مگر جو اس راہ پر چلنے کی ہمت رکھتی ہیں، ان کے لیے فوج ایک سنہری کیریئر ہے۔" کئی مواقع پر انہوں نے والدین کی حمایت کو اپنی کامیابی کا اہم ستون قرار دیا۔ "میری ماں صرف ایک ماں ہی نہیں بلکہ میری پہلی استاد بھی تھیں،" انہوں نے کہا۔ "اور میرے والد کا میرے خوابوں پر یقین ہی وہ پر تھے جو مجھے بلند اڑان کے قابل بنا گئے۔"کیپٹن عباسی کا سفر ہندوستان ی فوج میں خواتین کے بڑھتے کردار کی بھی نمائندگی کرتا ہے، جہاں اب وہ نہ صرف معاون کرداروں بلکہ فرنٹ لائن کمانڈ اور ایوی ایشن میں بھی جگہ بنا رہی ہیں۔

سرحد کی محافظ ساریہ عباسی 

ان کی کہانی جب نیوز رومز اور سوشل میڈیا پر گردش کرتی ہے، تو وہ نئی نسل کے لیے ایک طاقتور علامت کے طور پر ابھرتی ہیں — ایک ایسی ہندوستان کی، جہاں چھوٹے شہروں میں پروان چڑھے خواب بھی قومی سرحدوں پر جا کر پورے ہوتے ہیں۔ وہ یاد دلاتی ہیں کہ بہادری کا کوئی جنس نہیں ہوتا، اور حب الوطنی کے لیے کسی سے اجازت لینے کی ضرورت نہیں۔ آج کیپٹن عباسی صرف فضاؤں کی محافظ ہی نہیں، بلکہ امید کی سفیر بھی ہیں، ان نوجوانوں کے لیے جو رکاوٹوں سے بالاتر ہو کر بڑے مقصد کی خدمت کرنا چاہتے ہیں۔

کیپٹن ساریہ عباسی نے لائن آف ایکچوئل کنٹرول (LAC) پر تعیناتی کے دوران ایک خصوصی "ڈرون کلر" ٹیم کی قیادت بھی کی، جہاں انہوں نے فضائی خطرات سے نمٹنے کی مہارت کا مظاہرہ کیا۔ اس وقت وہ اروناچل پردیش کے اسٹریٹجک لحاظ سے حساس علاقے میں فرنٹ لائن پر تعینات ہیں، جہاں وہ L-70 اینٹی ایئر کرافٹ گن کے ذریعے ہندوستان کی سرحدوں کا دفاع کر رہی ہیں۔