دولت رحمان، گوہاٹی

جنوبی آسام کے ضلع سری بھومی (سابقہ کرم گنج) کے پاتھرکانڈی حلقے کے کھلوربند-مدھوربند گاؤں کے قریب رہنے والے احمد علی نے زندگی کا بیشتر حصہ سائیکل رکشہ چلا کر گزارا۔ 1970 کی دہائی کے آخر کی ایک شام وہ تھکے ہارے گھر واپس لوٹے اور نیند کی آغوش میں چلے گئے۔ مگر اچانک ایک بھیانک خواب سے جاگ اٹھے۔ خواب میں انہوں نے دیکھا کہ ان کا ہونے والا بچہ بھی ان کی طرح ناخواندہ رہے گا اور رکشہ کھینچنے پر مجبور ہوگا۔

یہ خواب احمد علی کے دل و دماغ پر ایسا چھا گیا کہ وہ رات بھر سو نہ سکے۔ اس کے بعد انہوں نے تہیہ کر لیا کہ اپنی آنے والی نسلوں کو ناخواندگی کے اندھیروں سے نکالنے کے لیے کچھ نہ کچھ ضرور کریں گے۔ وہ چاہتے تھے کہ ان کے بچے اور گاؤں کے دوسرے غریب بچے تعلیم کے نور سے منور ہوں اور رکشہ کھینچنے کی زندگی نہ گزاریں۔

قریب 90 سالہ احمد علی، جو آج سری بھومی ضلع کے ایک معروف اور معاشرتی تبدیلی کے علمبردار مانے جاتے ہیں، نے اپنی تمام جمع پونجی ۔ رکشہ کھینچ کر کمائی ہوئی رقم اور 32 بیگھہ آبائی زمین ۔ اپنے علاقے میں اسکول قائم کرنے پر خرچ کر دی۔ آج ان اسکولوں میں تقریباً 500 بچیاں اور 100 بچے تعلیم حاصل کر رہے ہیں۔ احمد علی کا ماننا ہے کہ اب کسی کو "ناخواندگی کے گناہ" کی زندگی گزارنی نہیں پڑے گی۔1978 میں انہوں نے اپنی زمین کا ایک ٹکڑا بیچ کر پہلا پرائمری اسکول قائم کیا۔ گاؤں والوں نے بھی تھوڑی بہت مالی مدد کی۔ اس کے بعد احمد علی نے کبھی پیچھے مڑ کر نہیں دیکھا۔

احمد علی کا خواب جو حقیقت بنا

ابتک 9اسکول کئے ہیں قائم 

کھلوربند-مدھوربند اور ملحقہ علاقوں میں احمد علی نے اب تک 9 اسکول قائم کیے ہیں۔ ان میں 3 لوئر پرائمری، 5 مڈل اسکول (انگلش میڈیم) اور 1 ہائی اسکول شامل ہے۔ ان میں سے 5 اسکولوں کو حکومت نے صوبائی حیثیت دے دی ہے اور ان کے اساتذہ اور عملے کو تنخواہیں ملتی ہیں، جبکہ بقیہ اسکولوں میں اساتذہ رضاکارانہ طور پر خدمات انجام دے رہے ہیں۔احمد علی کی عمر اب تقریباً 90 سال ہے مگر ان کے خواب اور جذبے جوان ہیں۔ اب وہ اپنے گاؤں کے آس پاس ایک جونیئر کالج کھولنے کے لیے کوشاں ہیں تاکہ ان کے اسکولوں سے میٹرک (دسویں جماعت) پاس کرنے والے بچے اپنی تعلیم آگے جاری رکھ سکیں۔ اس کے ساتھ ساتھ وہ مزید اسکول کھولنے کا بھی منصوبہ بنا رہے ہیں۔

احمد علی نے ’آواز-دی وائس‘ سے گفتگو کرتے ہوئے کہا کہ اللہ کی مدد اور اس کی نعمتوں کے ساتھ میں آنے والی نسلوں کی زندگی بدلنے کے مشن پر ہوں۔ خوشی ہے کہ اپنے بچوں کے ساتھ ساتھ گاؤں کے دیگر بچوں کو بھی تعلیم دلوا سکا۔ کئی طالبعلم آج اچھی نوکریوں میں ہیں، جس سے میرے دل کو اطمینان اور سکون ملتا ہے۔ میری اپیل ہے کہ میری برادری کے صاحب حیثیت اور بااثر لوگ آگے آئیں اور مالی مدد فراہم کریں تاکہ مزید اسکول قائم کیے جا سکیں۔"

احمد علی ایک مثالی شخصیت 

تعلیم ہر کسی کے لیے ایک زیور

احمد علی کے نزدیک تعلیم زندگی کی سب سے قیمتی چیز ہے اور ہر شخص کو زیورِ تعلیم سے آراستہ ہونے کا حق حاصل ہے۔انہوں نے کہا کہ تعلیم نہ پانا گناہ ہے۔ قرآن کی پہلی وحی کا پہلا لفظ 'اقْرَأْ' ہے جس کا مطلب ہے 'پڑھ' یا 'پڑھ کر سنا'۔ سورۃ العلق کی پہلی آیت میں یہ لفظ آیا ہے۔ اس وحی نے علم، سیکھنے اور تعلیم کی اہمیت کو اجاگر کیا ہے۔ جب تک زندگی ہے، میں اسکول قائم کرنے کی کوشش جاری رکھوں گا۔اس سال نئی دہلی میں یومِ جمہوریہ کی تقریبات میں احمد علی کی موجودگی سب کی توجہ کا مرکز بنی۔ حکومتِ ہند نے انہیں سماج کی غیرمعمولی خدمت کے اعتراف میں بطورِ خاص مدعو کیا تھا۔ اس سے پہلے وزیرِ اعظم نریندر مودی نے بھی اپنی ریڈیو تقریر ’من کی بات‘ میں احمد علی کا ذکر کیا تھا۔یقیناً احمد علی کی یہ بے لوث جدوجہد اور خدمت آنے والی نسلوں کے لیے مشعلِ راہ ہے۔