منی بیگم، گوہاٹی

آسام میں مانسون کی بارشیں جہاں بیشتر لوگوں کے لیے عذاب بنتی ہیں، وہیں کچھ کے لیے یہ مواقع کی نوید بھی ہوتی ہیں۔ ہر سال سیلاب میں لوگوں کے گھر اور مویشی تباہ ہو جاتے ہیں، لیکن جنوبی آسام کے ضلع شری بھومی (کریم گنج) میں واقع ایک بستی الیخڑگل کے نذرالحق نے انہی مشکل حالات میں مواقع تلاش کیے اور ایک خاموش انقلابی تبدیلی کی بنیاد رکھی۔یہ علاقہ زرعی معیشت پر انحصار کرتا ہے، لیکن یہاں کی زمین زیادہ تر سال بھر پانی میں ڈوبی رہتی ہے، جس کی وجہ سے کاشتکاری ممکن نہیں۔ مگر نذرالحق نے اسی زمینی حقیقت کو اپنی طاقت بنایا اور ماہی پروری (مچھلی پالنے) کے ذریعے نہ صرف خود کفالت حاصل کی بلکہ اپنے پورے گاؤں کو خود کفیل بنا دیا۔

نذرالحق بتاتے ہیں کہ یہاں روزگار کے زیادہ مواقع نہیں ہیں۔ لوگ عام طور پر کھیتی باڑی کرتے ہیں، میں بھی شروع میں یہی کرتا تھا، لیکن زمین سارا سال پانی میں ڈوبی رہتی ہے، اس لیے نتیجہ نہیں نکلتا تھا۔ پھر میں نے سوچا کہ ان پانی سے بھرے کھیتوں کو کسی اور مقصد کے لیے استعمال کیا جائے، تب ذہن میں ماہی پروری کا خیال آیا کیونکہ یہاں مچھلی کی مارکیٹ پہلے سے موجود تھی۔

نذر الحق کا انوکھا تجربہ 

نذرالحق کے والد کسان تھے اور ان کا گھرانہ مالی طور پر مستحکم نہیں تھا، لیکن ان میں کچھ بڑا کرنے کا جذبہ بچپن سے تھا۔ انہوں نے صرف ₹10,000 کا قرض لے کر ماہی پروری کا آغاز کیا، جسے ایمانداری سے چکا کر نئی راہیں ہموار کیں۔ 2000 میں اس پیشے سے وابستہ ہونے کے بعد 2003 میں آسام حکومت کےARIASP منصوبے کے تحت بینک سے قرض لیا۔ ایک ہیکٹر زمین پر 5 سے 7 کوئنٹل مچھلیاں پیدا کرنے والے نذرالحق اب تقریباً 100 ہیکٹر زمین (اپنی اور کرایہ پر لی ہوئی) پر سالانہ 6 سے 7 ٹن مچھلی پیدا کر رہے ہیں۔

انہوں نے سرکاری نوکری کا انتظار کرنے کے بجائے تعلیم مکمل کرتے ہی اپنا کام شروع کیا اور علاقے کے نوجوانوں کو بھی ترغیب دی۔ ان کی تحریک پر آج ان کے گاؤں کے تقریباً 300 گھرانے ماہی پروری سے جڑے ہوئے ہیں۔ اس انقلابی تبدیلی کے اعتراف میں اسٹیٹ بینک آف انڈیا(SBI) کی بڈھربور شاخ نے ان کے گاؤں کو"SBI فشری ولیج" کا اعزاز دیا۔

نذرالحق کہتے ہیں کہ آسام میں ماہی پروری کی بہت زیادہ گنجائش ہے۔ اگر محنت اور دیانت سے کیا جائے تو یہ بہت نفع بخش شعبہ ہے۔ ہمارے ہاں ایسی زمینیں بہت ہیں جو سارا سال پانی میں رہتی ہیں، اگر نوجوان ان زمینوں کو استعمال کریں تو نہ صرف وہ خود کفیل ہوں گے بلکہ ریاست بھی مچھلی پیداوار میں خودکفالت حاصل کر سکتی ہے۔

نذرالحق آج مکمل طور پر نامیاتی(organic) طریقے سے مچھلیاں پال رہے ہیں جن میں روہو، کٹلا، سنگھی، مَگر، کامن کارپ، کوئ، پبدا، چینی روپ چندا اور کچھوے شامل ہیں۔ ان کی پیداوار آسام سمیت میگھالیہ، تریپورہ اور میزورم تک سپلائی ہوتی ہے۔

نذر الحق مچھلیوں کے ساتھ

وہ مزید کہتے ہیں کہ کچھ سال پہلے یہاں لوگ مچھلی پالنے کو سنجیدگی سے نہیں لیتے تھے، لیکن اب تعلیم یافتہ نوجوان اس میں شامل ہو رہے ہیں۔ میں جدید سائنسی طریقے، ری سرکولیٹنگ آکوا کلچر سسٹم، آکسیجن ایریٹرز اور مچھلی کی بیماریوں کے لیے مخصوص دوائیں استعمال کرتا ہوں۔نذرالحق کو ان کی خدمات پر کئی اعزازات مل چکے ہیں۔ مارچ 2025 میں انہیں آسام کے تیسرے سب سے بڑے شہری اعزاز "آسام گورو ایوارڈ" سے نوازا گیا۔ اس کے علاوہ انہیں نیشنل فشریز ڈیولپمنٹ بورڈ(ICAR، حیدرآباد) کی جانب سے بھی اعزاز ملا۔ حال ہی میں احمد آباد کے سائنس سٹی میں عالمی یومِ ماہی پروری کے موقع پر مرکزی وزیر پرشوتم روپالا نے انہیں قومی سطح پر اعزاز سے نوازا۔

اب نذرالحق کا اگلا خواب ہے کہ وہ ایک فش سیڈ پروڈکشن فیکٹری قائم کریں تاکہ وہ اور دیگر مقامی نوجوان جدید ماہی پروری کے میدان میں مزید آگے بڑھ سکیں ۔ نذرالحق آج آسام کے ان ہزاروں نوجوانوں کے لیے ایک روشن مثال بن چکے ہیں جو مشکل حالات میں بھی خود کفالت اور ترقی کا راستہ اختیار کرنا چاہتے ہیں۔