راجیو نرائن

کبھی ہندوستان نقدی پر چلتا تھا۔ آج یہ کیو آر کوڈز، موبائل اسکرینوں اور ایک ایسے پیمنٹ نیٹ ورک پر چلتا ہے جو پیسے کو اتنی تیزی سے حرکت دیتا ہے جتنی تیزی سے اکثر ممالک اپنی پالیسیاں بھی نہیں بدل پاتے۔ یونائیفائیڈ پیمنٹس انٹرفیس (UPI) نے صرف لین دین کو ڈیجیٹل نہیں کیا، بلکہ مالیاتی نظام کے اصول ہی بدل ڈالے ہیں۔ اس نے پیسے کے بہاؤ کو اتنا آسان، تیز اور جامع بنا دیا کہ اس کے اندر چھپی انجینئرنگ کی پیچیدگی محسوس ہی نہیں ہوتی۔ یو پی آئی اب کسی وقتی انقلاب کا نہیں بلکہ ایک مستقل تبدیلی کا نام ہے۔

اعداد و شمار خود اپنی کہانی سناتے ہیں۔ اگست 2025 میں ہندوستان نے 24.85 لاکھ کروڑ روپے کی ڈیجیٹل ٹرانزیکشنز کیں، جن میں سے 85 فیصد سے زیادہ یو پی آئی کے ذریعے ہوئیں۔ دنیا کے لحاظ سے یہ ایک حیران کن حقیقت ہے کہ آج دنیا کی 50 فیصد سے زیادہ ریئل ٹائم ڈیجیٹل ادائیگیاں ہندوستان سے ہوتی ہیں۔ یو پی آئی روزانہ 640 ملین سے زائد ٹرانزیکشنز سنبھالتا ہے، جو ویزا (VISA) سے بھی زیادہ ہے اور ملک میں کریڈٹ و ڈیبٹ کارڈز کے مجموعی لین دین سے آگے نکل چکا ہے۔ یہ دنیا کا سب سے بڑا ریٹیل فاسٹ پیمنٹ سسٹم ہے، اور اس کی کامیابی محض تشہیر نہیں بلکہ عوامی اپنائیت سے بنی ہے۔

روزمرہ ہندوستان کی بنیاد

یو پی آئی کی اصل کامیابی اس کا پھیلاؤ ہے۔ یہ کسی امیر طبقے کی سہولت کے طور پر نہیں بلکہ عام آدمی کی ضرورت کے طور پر سامنے آیا۔ دہلی کے چائے والے کے لیے یہ چھوٹے سکوں کی جھنجھٹ سے نجات ہے، کوئمبتور کے درزی کے لیے یقین دہانی کہ پیسے فوراً پہنچ جائیں گے، پٹنہ کی گھریلو ملازمہ کے لیے یہ سہولت کہ تنخواہ سیکنڈوں میں گھر والوں تک پہنچ جائے، اور مدھیہ پردیش کے کسان کے لیے یہ اطمینان کہ اس کی کمائی براہ راست ملے، بیچ میں کوئی کٹوتی نہ ہو۔

یہ سب تب ممکن ہوا جب ملک میں تقریباً 89 فیصد بالغ افراد کے پاس بینک اکاؤنٹ آ گئے ، زیادہ تر آدھار اور جن دھن یوجنا کے ذریعے۔ چیلنج لوگوں کو بینک تک لانا نہیں تھا، بلکہ بینکنگ کو ان کی زندگی میں شامل کرنا تھا۔ یو پی آئی نے یہ کام خاموشی سے کر دکھایا۔

اس تبدیلی کو عالمی سطح پر بھی تسلیم کیا گیا۔ آئی ایم ایف کے ستمبر 2025 کے شمارے “India’s Frictionless Payments” میں لکھا گیا: "یو پی آئی دنیا کا سب سے بڑا ریئل ٹائم پیمنٹ سسٹم ہے جو ماہانہ 20 بلین ٹرانزیکشنز پراسیس کرتا ہے۔" رپورٹ میں کہا گیا کہ “انٹرآپریبلٹی” یعنی مختلف نظاموں کا ایک ساتھ چلنا ہی اصل جادو ہے جس نے مالی شمولیت کو عملی فائدے میں بدلا۔

چائے کی دکان سے 10 لاکھ روپے تک

ابتدائی دنوں میں یو پی آئی چھوٹے لین دین کے لیے مشہور تھا، مگر اب یہ بڑے کاروباروں کا حصہ بن چکا ہے۔ 15 ستمبر 2025 کو یو پی آئی نے 10 لاکھ روپے یومیہ تک مرچنٹ ٹرانزیکشنز کی اجازت دے دی۔ یہ صرف حد میں اضافہ نہیں بلکہ اعتماد کی علامت ہے ، اب چھوٹے کاروباروں کے لیے تیز تر سیٹلمنٹ، بہتر نقد بہاؤ اور باضابطہ معیشت میں شمولیت ممکن ہو گئی ہے۔

آج یو پی آئی صرف ہندوستانی نظام نہیں رہا، بلکہ سات ممالک ، سنگاپور، فرانس، یو اے ای، ماریشس، بھوٹان، نیپال اور سری لنکا ، میں فعال ہے۔ سنگاپور میں PayNow کے ساتھ جوڑ کر سرحد پار منتقلی ممکن ہوئی، یو اے ای اور ماریشس میں ہندوستانی سیاح QR کوڈ سے ادائیگی کرتے ہیں، اور فرانس میں ایفل ٹاور پر روپے میں ادائیگی کی سہولت ایک علامت بن چکی ہے۔آئی ایم ایف کے سابق عہدیدار انوپ سنگھ کے مطابق، ’’یہ پہلی بار ہوا ہے کہ کسی ترقی پذیر ملک نے عالمی مالیاتی نظام کی پیروی نہیں کی بلکہ نیا معیار خود قائم کیا۔‘‘

انقلاب بغیر اجارہ داری کے

یو پی آئی کی خوبی یہ ہے کہ یہ کسی ایک کمپنی کی ملکیت نہیں۔ یہ ایک ایسا نظام ہے جو حکومت نے بنایا، پرائیویٹ اداروں نے نکھارا، اور مارکیٹ نے اپنایا۔ اس ماڈل نے صحت مند مقابلہ بھی رکھا اور سب کے لیے ایک ہی بنیادی ڈھانچہ بھی۔ یعنی شمولیت کے ساتھ آزادی، اور عام دستیابی کے ساتھ برابری۔

یو پی آئی نے شفافیت کو آسانی میں بدل دیا۔ ہر ادائیگی کا ریکارڈ رہتا ہے، جس سے قرض کی رسائی، مالی احتساب اور معاشی وضاحت بہتر ہوئی ہے۔ نقدی پر انحصار ختم نہیں ہوا، بلکہ اس کی ضرورت کم ہو گئی ہے۔افریقہ، خلیجی ممالک اور یورپ کے کئی ملک اب یو پی آئی کے ماڈل کو اپنانے پر غور کر رہے ہیں تاکہ کم لاگت، ریئل ٹائم اور کھلے نظام پر مبنی ادائیگی ممکن ہو سکے۔

خاموش مگر زبردست انقلاب

یو پی آئی کی کامیابی کا راز ہندوستان کا سائز نہیں، بلکہ مسئلے سے بڑا حل پیش کرنا ہے۔ اس نے مالی رسائی کو طاقت، آسانی کو عادت، اور پیمانے کو عالمی اہمیت میں بدل دیا۔ اب اگلا مرحلہ صرف لین دین تک محدود نہیں ، بلکہ ایمبیڈیڈ کریڈٹ، پروگرام ایبل پیمنٹس، آرٹیفیشل انٹیلیجنس پر مبنی خطرہ مینجمنٹ اور عالمی سطح پر مزید توسیع کی جانب ہے۔

یو پی آئی کا مقصد کبھی نقدی کو ختم کرنا نہیں تھا، بلکہ تاخیر، لیکیج، دلالی اور غیر یقینی کو ختم کرنا تھا۔ اور اس نے یہ سب شور شرابے کے بغیر کر دکھایا۔ اسی خاموشی میں اس کی سب سے بڑی کامیابی چھپی ہے ، آج ہندوستان میں پیسہ اسی طرح چلتا ہے جیسے خواب چلتے ہیں: آزاد، تیز اور بغیر اجازت۔

 مصنف راجیو نرائن سینئر صحافی اور کمیونیکیشن اسپیشلسٹ ہیں۔
(ای میل: [email protected])
نوٹ: مضمون میں پیش کیے گئے خیالات مصنف کے ذاتی ہیں۔