نئی دہلی/ آواز دی وائس
ہندوستانی شیئر بازاروں نے جمعہ (25 جولائی 2025) کے سیشن کی شروعات محتاط انداز کے ساتھ کی، جس کے باعث پچھلے دن کی گراوٹ کا سلسلہ جاری رہا۔ دونوں اہم انڈیکس مارکیٹ کھلتے ہی نیچے آ گئے۔ بینچ مارک سینسیکس 0.41 فیصد کی کمی کے ساتھ 81,846.45 پر کھلا، جبکہ نفٹی نے 0.44 فیصد کی گراوٹ کے ساتھ 24,951.95 پر سیشن کا آغاز کیا۔ بینکنگ شعبے میں بھی دباؤ بڑھا، نِفٹی بینک انڈیکس 0.14 فیصد کی گراوٹ کے ساتھ 56,986 پر کھلا۔
جمعرات (24 جولائی) کی زبردست فروخت کے بعد، سرمایہ کاروں کو ایک اور دن گھبراہٹ کا سامنا کرنا پڑا۔
کچھ بڑی کمپنیاں اچھی حالت میں رہیں۔ ایشین پینٹس، این ٹی پی سی، کوٹک مہندرا بینک اور ماروتی نے سیشن کے آغاز میں فائدہ حاصل کیا۔
دوسری طرف، بجاج فنانس، ایکسس بینک، پاور گرڈ اور ایٹرنل جیسے حصص پر فروخت کا دباؤ برقرار رہا، جو ابتدائی کاروبار میں نمایاں طور پر نیچے رہے۔
سینسیکس میں شامل 30 کمپنیوں میں سے بجاج فنانس کے حصص میں تقریباً چھ فیصد کی گراوٹ دیکھی گئی۔ بجاج فِن سر و کا شیئر چار فیصد سے زائد نیچے آیا۔ ٹاٹا اسٹیل، ہندوستان یونی لیور، مہندرا اینڈ مہندرا، الٹرا ٹیک سیمنٹ، پاور گرڈ اور ماروتی کے حصص بھی نقصان میں رہے۔ وہیں ایٹرنل، آئی سی آئی سی آئی بینک، ایچ سی ایل ٹیک اور اسٹیٹ بینک آف انڈیا کے حصص فائدے میں رہے۔
دیگر ایشیائی بازاروں کا حال
ایشیائی بازاروں میں جاپان کا نِکّی 225، چین کا شنگھائی ایس ایس ای کمپوزٹ اور ہانگ کانگ کا ہینگ سینگ نقصان میں رہے، جبکہ جنوبی کوریا کا کوسپی فائدے میں رہا۔ امریکی بازار جمعرات کو ملی جلی سمت کے ساتھ بند ہوئے تھے۔ بین الاقوامی معیار کے مطابق برینٹ کروڈ میں 0.39 فیصد کی بڑھوتری دیکھی گئی اور اس کا دام 69.45 ڈالر فی بیرل رہا۔
شیئر بازار کے اعداد و شمار کے مطابق، غیر ملکی ادارہ جاتی سرمایہ کاروں (ایف آئی آئی) نے جمعرات کو فروخت کا رجحان اپنایا اور خالص طور پر 2,133.69 کروڑ روپے کے حصص فروخت کیے۔ جبکہ گھریلو ادارہ جاتی سرمایہ کاروں (ڈی آئی آئی) نے 2,617.14 کروڑ روپے کے حصص خریدے۔
