ممبئی

مغربی ایشیا میں جاری جنگ اور تیل کی قیمتوں میں اضافے کے درمیان پیر کو ابتدائی کاروبار میں شیئر بازار میں زبردست گراوٹ درج کی گئی۔غیر ملکی سرمایہ کاروں کی جانب سے بڑے پیمانے پر سرمایہ نکالنے کے باعث گھریلو شیئر بازار کمزور ہو گیا۔ابتدائی کاروبار میں 30 شیئرز پر مشتمل بی ایس ای سینسیکس 1,191.24 پوائنٹس گر کر 72,391.98 پر آ گیا۔ وہیں 50 شیئرز پر مشتمل این ایس ای نفٹی 349.45 پوائنٹس کی گراوٹ کے ساتھ 22,470.15 پر رہا۔

سینسیکس کی کمپنیوں میں ایکسس بینک، کوٹک مہندرا بینک، بجاج فنسرو، بجاج فائننس، بھارتی ایئرٹیل اور آئی سی آئی سی آئی بینک سب سے زیادہ نقصان میں رہیں۔وہیں بھارت الیکٹرانکس، ریلائنس انڈسٹریز، پاور گرڈ، ٹی سی ایس اور ہندوستان یونیلور منافع میں رہیں۔

بین الاقوامی تیل معیار برینٹ کروڈ کی قیمت 2.32 فیصد گر کر 115.3 امریکی ڈالر فی بیرل پر آ گئی۔

ایشیا کے دیگر بازاروں میں جنوبی کوریا کا کوسپی، جاپان کا نکّی 225، ہانگ کانگ کا ہینگ سینگ انڈیکس بھاری گراوٹ کے ساتھ کاروبار کر رہے تھے، جبکہ شنگھائی کا ایس ایس ای کمپوزٹ انڈیکس بڑھت کے ساتھ سبز نشان میں تھا۔

امریکی بازار جمعہ کو گراوٹ کے ساتھ بند ہوئے تھے۔نیسڈیک کمپوزٹ انڈیکس میں 2.15 فیصد کی کمی آئی، جبکہ ڈاؤ جونز انڈسٹریل ایوریج میں 1.73 فیصد اور ایس اینڈ پی 500 میں 1.67 فیصد کی گراوٹ درج کی گئی تھی۔

شیئر بازار کے اعداد و شمار کے مطابق، غیر ملکی ادارہ جاتی سرمایہ کاروں (ایف آئی آئی) نے جمعہ کو 4,367.30 کروڑ روپے کے شیئرز فروخت کیے، جبکہ گھریلو ادارہ جاتی سرمایہ کاروں (ڈی آئی آئی) نے 3,566.15 کروڑ روپے کے شیئرز خریدے۔مغربی ایشیا میں بڑھتے ہوئے تناؤ، کمزور ہوتے روپے اور ہندوستان کی اقتصادی ترقی پر خام تیل کی بلند قیمتوں کے اثرات سے متعلق خدشات کے باعث غیر ملکی سرمایہ کاروں نے مارچ میں گھریلو شیئرز سے 1.14 لاکھ کروڑ روپے (تقریباً 12.3 ارب امریکی ڈالر) نکال لیے، جو اب تک کا بدترین ماہانہ اخراج ہے۔

سینسیکس جمعہ کو 1,690.23 پوائنٹس گر کر 73,583.22 پر بند ہوا، جبکہ نفٹی 486.85 پوائنٹس کی گراوٹ کے ساتھ 22,819.60 پر بند ہوا تھا۔