یونس علوی | نوح (ہریانہ)

ہریانہ کے میوات علاقے کے تاریخی گاؤں "گاندھی گرام گھاسیڑہ" سے ایک انتہائی حوصلہ افزا اور متاثرکن کہانی سامنے آئی ہے جو نہ صرف مذہبی اور جدید تعلیم کے درمیان ایک شاندار توازن قائم کرتی ہے، بلکہ معاشرے میں موجود کئی تعصبات کو بھی توڑتی ہے۔ اس گاؤں کی دو حافظہ طالبات— سمرین خانماور سادیہ خاتون — نے ہریانہ بورڈ کے دسویں جماعت کے امتحان میں امتیازی کامیابی حاصل کر کے یہ ثابت کر دیا کہ قرآن کی روشنی اور جدید علم کی محنت ساتھ ساتھ چل سکتی ہے۔

قرآن بھی یاد، کتابیں بھی قائم

سمرین خانم نے 81 فیصد نمبرات حاصل کرتے ہوئے اپنے اسکول میں اول پوزیشن حاصل کی، جبکہ سادیہ خاتون نے 80 فیصد نمبروں کے ساتھ اسکول میں دوسری پوزیشن حاصل کی۔

یہ دونوں طالبات حافظہ قرآن ہیں، یعنی انہوں نے مکمل قرآن پاک حفظ کر رکھا ہے۔ ان کی محنت، ڈسپلن، اور دوہری تعلیمی نظام میں نمایاں کارکردگی نے پورے میوات علاقے کو فخر کا احساس دلایا ہے۔

خاندانی پس منظر: دینی اور سماجی خدمت

سمرین کے والد خالد میواتی ایک متحرک سماجی کارکن ہیں جو گاؤں کے نوجوانوں کو تعلیم کی راہ پر ڈالنے میں سرگرم رہتے ہیں۔

سادیہ کے والد مولانا محمد زاہد امینی گھاسیڑہ کی مشہور شاہی جامع مسجد کے امام اور خطیب ہیں۔ دونوں خاندانوں میں تعلیم، تہذیب اور خدمت کا ماحول ہے، جس نے ان بچیوں کو ترقی کی پختہ بنیاد مہیا کی۔

اسکول کا تعلیمی ماحول اور اساتذہ کا کردار

سرکاری کنیا سینئر سیکنڈری اسکول، گھاسیڑہسے اس سال 80 طالبات نے دسویں جماعت کا امتحان دیا، جن میں سے 78 کامیاب ہوئیں۔

سائنس کے استاد ونود کمار کے مطابق، 31 طالبات نے فرسٹ ڈویژن، 29 نے سیکنڈ ڈویژن اور 18 نے تھرڈ ڈویژن حاصل کی۔ سمرین اور سادیہ کی شاندار کامیابی نے نہ صرف اسکول کی شہرت میں اضافہ کیا، بلکہ دیگر طالبات کو بھی تحریک دی۔

اسکول کی پرنسپل سویتا کوشک سمیت اساتذہ ونود کمار، ماسٹر فاروق، آبیدہ میم، رشمی، لیلا دیوی، شہناز اور منجیت میم کی کوششوں کو خاص طور پر سراہا گیا، جنہوں نے طالبات کی خوداعتمادی کو مضبوط کیا اور ان کی صلاحیتوں کو نکھارنے میں کردار ادا کیا۔

سماجی سطح پر تحسین اور مبارکباد

اس کامیابی کو گاؤں کے معزز افراد نے نہ صرف سراہا بلکہ اسے گھاسیڑہ اور پورے میوات کے لیے ایک مثال قرار دیا۔

مولانا شیر محمد امینی، مفتی لقمان قاسمی، مولانا نورالدین قاسمی، سرپنچ عمران خان، سابق سرپنچ اشرف علی، سابق کونسلر ولی محمد، بی ایس ممبر زکرا بھائی، پنچ دادا خلیل، اوصاف نمبر داراور بھائی فخرالدین جیسے شخصیات نے طالبات اور ان کے والدین کو دل سے مبارکباد دی۔

ایک نئی سوچ کا آغاز

اس خبر نے یہ بات واضح کر دی کہ دینی تعلیم اور جدید تعلیم میں کوئی تضاد نہیں، بلکہ دونوں مل کر ایک متوازن، روشن اور کامیاب شخصیت کی تشکیل کرتی ہیں۔

گھاسیڑہ کی یہ دو حافظہ بہنیں اب نہ صرف میوات کی بیٹیوں کے لیے رول ماڈل بن چکی ہیں، بلکہ انہوں نے پورے ملک کو یہ دکھا دیا ہے کہ اگر نیت صاف ہو اور محنت خلوص سے کی جائے تو ہر راستہ آسان ہو جاتا ہے۔