تریپورہ کی سرزمین پر پیدا ہونے والے ایک عام نوجوان کی غیر معمولی کامیابی آج پوری ریاست کے لیے باعث فخر بن گئی ہے۔ محدود وسائل اور مختلف مشکلات کا سامنا کرتے ہوئے کیلاشہر کے رہنے والے تراب علی نے بین الاقوامی طبی خدمات کے میدان میں اپنی صلاحیتوں کا لوہا منوایا ہے۔
محنت لگن اور خود اعتمادی کو اپنا سرمایہ بنا کر آج وہ برطانیہ کے ایک معروف طبی ادارے میں اہم ذمہ داری انجام دے رہے ہیں۔ ان کی کامیابی تریپورہ کے نوجوانوں کے لیے ایک روشن مثال اور تحریک بن چکی ہے۔
تریپورہ انسٹی ٹیوٹ آف پیرا میڈیکل سائنس کے سابق طالب علم تراب علی نے برطانیہ پہنچ کر کامیابی کی نئی داستان رقم کی ہے۔ تریپورہ کے کیلاشہر سب ڈویژن کے ٹیلا بازار علاقے کے کالےرکانڈی گاؤں سے تعلق رکھنے والے تراب علی اس وقت انگلینڈ کے سیلس بری این ایچ ایس فاؤنڈیشن ٹرسٹ میں اینستھیٹک پریکٹشنر کے طور پر خدمات انجام دے رہے ہیں۔ وہ انتہائی مہارت اور ذمہ داری کے ساتھ اپنے فرائض نبھا رہے ہیں۔
تراب علی مرحوم استاد یزید علی کے فرزند ہیں۔ ہائر سیکنڈری تعلیم مکمل کرنے کے بعد انہوں نے تریپورہ انسٹی ٹیوٹ آف پیرا میڈیکل سائنس یعنی ٹپس میں داخلہ لیا۔ تعلیم مکمل کرنے کے بعد انہوں نے بنگلورو کے منی پال اسپتال اور مغربی بنگال کے مختلف طبی اداروں میں تجربہ حاصل کیا۔
بین الاقوامی سطح پر کام کرنے کے خواب کو پورا کرنے کے لیے انہوں نے برطانیہ کے صحت نظام میں داخلے کی ضروری اہلیت حاصل کی۔ سخت محنت اور تیاری کے ذریعے انہوں نے انگریزی زبان میں مہارت حاصل کی اور مسلسل کئی امتحانات اور انٹرویوز کامیابی سے پاس کیے۔ بعد ازاں وہ ایچ سی پی سی میں رجسٹر ہوئے اور پھر انگلینڈ کے سیلس بری این ایچ ایس فاؤنڈیشن ٹرسٹ میں اینستھیٹک پریکٹشنر کے طور پر تقرری حاصل کی۔ وہ گزشتہ تقریباً ایک سال سے وہاں نہایت قابلیت کے ساتھ خدمات انجام دے رہے ہیں۔
اپنی کامیابی کے بارے میں بات کرتے ہوئے تراب علی نے کہا کہ تریپورہ سے برطانیہ پہنچ کر کام کرنا ان کے لیے ایک خواب کی تعبیر ہے۔ اگر صحیح تیاری اور مسلسل محنت کی جائے تو تریپورہ کے طلبہ بھی عالمی سطح پر اپنی شناخت قائم کر سکتے ہیں۔
انہوں نے بتایا کہ وہ مریضوں کو انتہائی احتیاط اور ذمہ داری کے ساتھ اینستھیزیا دینے کا کام انجام دیتے ہیں۔ اس حساس اور اہم ذمہ داری میں ان کی پیشہ ورانہ صلاحیت اور احساس ذمہ داری کو ادارہ کافی اہمیت دے رہا ہے۔
بین الاقوامی سطح پر تریپورہ کے اس مسلم نوجوان کی کامیابی پر پوری ریاست خصوصاً مسلم سماج میں خوشی اور فخر کی لہر دوڑ گئی ہے اور لوگ انہیں مبارکباد پیش کر رہے ہیں۔
