اشہر عالم / نئی دہلی

ہر ماہ تمل ناڈو کے ضلع پڈوکوٹائی میں خواتین ایک ایسے اجتماع میں شرکت کے لیے آتی ہیں جو ایک نسل پہلے تک وجود ہی نہیں رکھتا تھا۔ وہ اپنے ساتھ ترک کیے جانے، گھریلو تشدد، من مانی طلاق، وراثت سے محرومی اور برسوں کی خاموشی کی داستانیں لے کر آتی ہیں۔ مگر یہاں انہیں مرد بزرگوں کی مجلس کا سامنا نہیں کرنا پڑتا، بلکہ ایسی خواتین ان کی بات سنتی ہیں جو ان کے دکھ درد کو سمجھتی ہیں، انہیں قانونی راستے بتاتی ہیں، مشاورت فراہم کرتی ہیں اور ان کی عزتِ نفس بحال کرنے میں مدد کرتی ہیں۔

یہ پلیٹ فارم ۔ تمل ناڈو مسلم ویمنز جماعت کمیٹی ۔ ایک ایسی خاتون کے عزم کا نتیجہ ہے جس نے مسلم خواتین کے لیے ایک ایسی جگہ قائم کرنے کا فیصلہ کیا جہاں وہ خود اپنی آواز بلند کر سکیں۔ وہ خاتون ہیں ڈی۔ شریفہ خانم، ایک سماجی کارکن، جنہوں نے گزشتہ چار دہائیوں کے دوران ہزاروں خواتین کی زندگیوں میں مثبت تبدیلی پیدا کی۔

شریفہ خانم کے لیے انصاف کی جدوجہد سماجی سرگرمیوں سے شروع نہیں ہوئی بلکہ مشاہدے سے ہوئی۔وہ تمل ناڈو کے ایک گاؤں میں ایک بڑے خاندان میں پیدا ہوئیں۔ وہ دس بہن بھائیوں میں سب سے چھوٹی تھیں۔ ان کی والدہ اردو اسکول میں معلمہ تھیں، جنہوں نے شریفہ خانم کے والد سے علیحدگی کے بعد زیادہ تر بچوں کی پرورش خود کی۔ قدامت پسند ماحول میں پرورش پانے والی بہت سی لڑکیوں کی طرح شریفہ خانم نے بھی مردانہ اختیار کو زندگی کی ایک ناقابلِ سوال حقیقت کے طور پر قبول کر لیا تھا۔ مردانہ بالادستی ان کے لیے کوئی ایسا نظام نہیں تھا جسے چیلنج کیا جائے، بلکہ وہ زندگی کا ایک معمول سمجھی جاتی تھی۔

تعلیم نے بدلی سوچ

تعلیم نے آہستہ آہستہ ان کی سوچ کو بدلنا شروع کیا۔ان کے ایک بڑے بھائی، جنہوں نے بعد میں آئی آئی ٹی کانپور سے تعلیم حاصل کی، نے ان کی تعلیمی خواہشات کی حوصلہ افزائی کی اور انہیں علی گڑھ مسلم یونیورسٹی میں داخلہ دلانے میں مدد کی۔ ایک چھوٹے سے گاؤں سے ہندوستان کی ممتاز یونیورسٹیوں میں سے ایک تک کا سفر انہیں ایسے خیالات، تجربات اور مباحث سے روشناس کرانے کا سبب بنا جو ان کے محدود سماجی ماحول سے کہیں زیادہ وسیع تھے۔

تاہم ان کی زندگی کا فیصلہ کن موڑ تعلیم مکمل کرنے کے بعد آیا۔1980 کی دہائی کے اواخر میں پٹنہ میں منعقد ہونے والی ایک خواتین کانفرنس کے دوران شریفہ خانم مترجم کے طور پر خدمات انجام دے رہی تھیں۔ وہ ملک بھر سے آئی ہوئی مندوب خواتین کے لیے ہندی اور انگریزی میں ہونے والی گفتگو کا تمل زبان میں ترجمہ کرتی تھیں۔ بے شمار خواتین کی داستانیں سنتے ہوئے انہیں احساس ہوا کہ خواتین کی تکالیف کسی ایک علاقے، مذہب یا سماجی طبقے تک محدود نہیں ہیں۔ مختلف زبانیں بولنے والی خواتین ایک ہی طرح کی کہانیاں بیان کر رہی تھیں۔گھریلو تشدد، غیر مساوی مواقع، معاشی انحصار اور بنیادی حقوق سے محرومی۔

اس تجربے نے خواتین کی زندگی کے بارے میں ان کی سوچ کو بنیادی طور پر بدل دیا۔بعد کے انٹرویوز میں شریفہ خانم نے بتایا کہ ایک وقت وہ خود کو سنڈریلا کی طرح سمجھتی تھیں، جو کسی پری جیسی مددگار کے آنے کا انتظار کرتی ہے تاکہ اس کی مشکلات ختم ہو جائیں۔ لیکن وقت کے ساتھ انہیں احساس ہوا کہ ایسا کوئی نجات دہندہ آنے والا نہیں۔ اگر تبدیلی لانی ہے تو خواتین کو خود اپنی محافظ بننا ہوگا اور ایک دوسرے کا سہارا بھی۔

کام کی شروعات 

پڈوکوٹائی واپس آ کر انہوں نے بہت چھوٹے پیمانے پر کام شروع کیا۔ٹیوشن پڑھا کر اور ساڑھیاں فروخت کر کے حاصل ہونے والی آمدنی سے انہوں نے چند خواتین کو جمع کیا تاکہ وہ اپنے مسائل پر گفتگو کریں اور ان کے عملی حل تلاش کریں۔ ایک غیر رسمی کوشش کے طور پر شروع ہونے والا یہ سلسلہ جلد ہی ایک منظم تحریک میں تبدیل ہو گیا۔

 1987 میں انہوں نے اسٹیپس ویمنز ڈیولپمنٹ آرگنائزیشن (STEPS Women's Development Organisation) کی بنیاد رکھی، جو گھریلتشدد، طلاق، ترک کیے جانے، غربت اور سماجی محرومی کا شکار خواتین کی مدد کے لیے قائم کی گئی تھی۔ ابتدا میں تنظیم کا مقصد خاندانوں کی مشاورت اور تنازعات کا تصفیہ تھا، مگر وقت کے ساتھ اس کا دائرۂ کار قانونی معاونت، بحالی اور خواتین کے حقوق کی وکالت تک وسیع ہو گیا۔

 اس تنظیم کے مؤثر کام کو دیکھتے ہوئے ضلعی انتظامیہ نے انہیں زمین فراہم کی، جس کے نتیجے میں STEPSکو اپنی سرگرمیوں کے لیے مستقل مرکز قائم کرنے کا موقع ملا۔ مختلف برادریوں کی خواتین کے ساتھ کام کرتے ہوئے شریفہ خانم کا کہنا ہے کہ وہ خود کو شاذ و نادر ہی مذہب کی بنیاد پر دیکھتی تھیں۔ تاہم پڑوسی علاقوں میں فرقہ وارانہ تشدد کے واقعات نے ان کی سوچ میں ایک نئی جہت پیدا کی۔ مسلم خاندانوں، خصوصاً خواتین، میں پائے جانے والے عدم تحفظ نے انہیں یہ احساس دلایا کہ خواتین کی کمزوری کا ایک اور پہلو بھی ہے، جسے مرکزی دھارے کی خواتین تنظیمیں اکثر نظر انداز کرتی ہیں۔اسی پس منظر میں انہوں نے روایتی جماعتوں کے نظام کا جائزہ لینا شروع کیا۔ یہ وہ برادری کے ادارے تھے جو عموماً مساجد سے وابستہ ہوتے ہیں اور جن میں تنازعات کے فیصلے زیادہ تر مرد بزرگ کرتے ہیں۔

  تمل ناڈو مسلم ویمنز جماعت کمیٹی

روایتی جماعتوں کا جائزہ لینے کے بعد شریفہ خانم اس نتیجے پر پہنچیں کہ ان اداروں میں خواتین کو شاذ و نادر ہی منصفانہ سماعت کا موقع ملتا ہے۔انہوں نے یہ بھی محسوس کیا کہ بہت سی خواتین کو مذہبی تعلیمات تک براہِ راست رسائی حاصل نہیں، اس لیے وہ اسلامی قانون کی ان تشریحات پر سوال نہیں اٹھا سکتیں جو ان کے سامنے پیش کی جاتی ہیں۔ خود قرآنِ مجید کا تمل زبان میں ترجمہ پڑھنے کے بعد شریفہ خانم اس نتیجے پر پہنچیں کہ خواتین سے متعلق معاملات میں قرآن کی اصل تعلیمات اور بعض سماجی اداروں کی تشریحات کے درمیان اکثر نمایاں فرق پایا جاتا ہے۔

 اس صورتحال کا متبادل فراہم کرنے کے عزم کے ساتھ شریفہ خانم نے 1991 میں ایک مسلم خواتین جماعت قائم کی۔ بعد ازاں یہ کوشش مزید وسعت اختیار کرتی گئی اور 2000 میں STEPSکے ایک توسیعی منصوبے کے طور پر تمل ناڈو مسلم ویمنز جماعت کمیٹی باقاعدہ وجود میں آئی۔اس کمیٹی کا مقصد سادہ لیکن انقلابی تھا: مسلم خواتین کو ایک ایسا پلیٹ فارم فراہم کرنا جہاں وہ خوف، دباؤ یا ہراسانی کے بغیر انصاف حاصل کر سکیں۔یہ کمیٹی ضلعی اور ریاستی سطح پر باقاعدہ اجلاس منعقد کرتی ہے، جہاں خواتین طلاق، نان و نفقہ، گھریلو تشدد، وراثت کے تنازعات اور دیگر خاندانی مسائل سے متعلق اپنے مقدمات پیش کرتی ہیں۔ کمیٹی کے اراکین سب سے پہلے مشاورت اور مصالحت کے ذریعے مسئلہ حل کرنے کی کوشش کرتے ہیں۔ اگر ضرورت پڑے تو وہ پولیس سے تعاون کرتے ہیں یا عدالتوں کے ذریعے قانونی چارہ جوئی کا راستہ اختیار کرتے ہیں۔

تنازعات کے حل کے علاوہ یہ تنظیم شریعت، قانونی حقوق اور مذہبی و شہری قوانین کے تحت خواتین کو حاصل حقوق سے متعلق تربیتی ورکشاپس بھی منعقد کرتی ہے۔ اس نے فوری تین طلاق کے خاتمے اور مسلم خواتین کے جائیداد کے حقوق کو زیادہ مؤثر قانونی تحفظ دینے جیسی اصلاحات کے لیے بھی مہم چلائی ہے۔

یہ سفر آسان نہیں تھا۔

تنظیم کے مطابق خواتین جماعت کو قدامت پسند مذہبی حلقوں کی جانب سے مسلسل مخالفت کا سامنا کرنا پڑا، حتیٰ کہ اس کے اراکین کو دھمکیاں بھی دی گئیں۔ اس کے باوجود شریفہ خانم ہمیشہ یہ واضح کرتی رہی ہیں کہ ان کی جدوجہد کا مقصد مذہب کو چیلنج کرنا نہیں، بلکہ اس بات کو یقینی بنانا ہے کہ خواتین کو ان فیصلوں اور گفتگو سے باہر نہ رکھا جائے جو براہِ راست ان کی زندگیوں پر اثر انداز ہوتے ہیں۔وقت کے ساتھ انہوں نے حوصلہ افزا تبدیلیاں بھی دیکھیں۔ تمل ناڈو کی بعض مساجد نے بتدریج خواتین کی شرکت کے لیے زیادہ مواقع فراہم کرنا شروع کیے، جو برادری کی سوچ میں ایک سست مگر اہم تبدیلی کی علامت ہے۔

اپنی حقوق کی مہم کے ساتھ ساتھ STEPS آج بھی گھریلو تشدد کا شکار خواتین کے لیے ایک محفوظ پناہ گاہ کے طور پر کام کر رہی ہے۔ یہ تنظیم متاثرہ خواتین کو عارضی رہائش، نفسیاتی و سماجی مشاورت اور بحالی کی سہولتیں فراہم کرتی ہے۔ اس کے علاوہ روزگار، زمین کے حقوق، تعلیم اور ملازمت جیسے وسیع سماجی مسائل پر بھی کام کرتی ہے۔تنظیم کا بنیادی فلسفہ ایک سادہ مگر مضبوط یقین پر قائم ہے کہ خود اعتمادی اور عزتِ نفس ہی خواتین کو بااختیار بنانے کی بنیاد ہے۔

تنظیم کے مطابق گزشتہ برسوں میں اس کی مختلف سرگرمیوں سے تقریباً 3,500 خواتین براہِ راست مستفید ہو چکی ہیں۔ طلبہ، دیہی خواتین اور مقامی برادریوں کے لیے آگاہی پروگرام، ورکشاپس، پوسٹر مہمات، مختلف مقابلے اور سیلف ڈیفنس کی تربیت نے بھی اس کے کام کا دائرہ صرف بحران سے نمٹنے تک محدود نہیں رہنے دیا بلکہ معاشرے میں وسیع پیمانے پر شعور بیدار کیا۔

جب یہ مضمون تیار کیا جا رہا تھا تو شریفہ خانم سے رابطہ ممکن نہ ہو سکا۔ ان کے دفتر کی جانب سے بھی خواتین جماعت یا اس خیال کے بارے میں، جس پر ماضی کے انٹرویوز میں گفتگو ہوئی تھی کہ صرف خواتین کے لیے ایک مسجد قائم کی جائے، کوئی جواب موصول نہیں ہوا۔

تاہم اس سے قبل مختلف مواقع پر وہ یہ واضح کر چکی ہیں کہ خواتین کی مسجد قائم کرنا کبھی ان کا حتمی مقصد نہیں تھا۔ ان کے نزدیک اصل اہمیت اس بات کی ہے کہ ایسی محفوظ جگہیں موجود ہوں جہاں خواتین آزادی کے ساتھ جمع ہو سکیں، اپنے مسائل پر کھل کر گفتگو کر سکیں اور اجتماعی طور پر ان کے حل تلاش کر سکیں۔

یہی وژن آج بھی STEPS اور ویمنز جماعت کی سرگرمیوں کے ذریعے آگے بڑھ رہا ہے۔تقریباً چار دہائیوں سے ڈی۔ شریفہ خانم خاموشی مگر مستقل مزاجی کے ساتھ ایسے ادارے قائم کرتی آ رہی ہیں جن کے بارے میں بہت سے لوگ سمجھتے تھے کہ ان کا وجود ممکن نہیں۔ انہوں نے تبدیلی کے باہر سے آنے کا انتظار کرنے کے بجائے ایسے نظام تشکیل دیے جن کے ذریعے کمزور اور مظلوم خواتین کو سہارا، انصاف اور باہمی یکجہتی میسر آ سکی۔یوں انہوں نے ثابت کیا کہ بعض اوقات قیادت کی سب سے مؤثر شکل یہ ہوتی ہے کہ دوسروں کو اپنی آواز بلند کرنے کا حوصلہ دیا جائے، اور اس بات کو یقینی بنایا جائے کہ آخرکار کوئی ایسا بھی ہو جو ان کی بات سننے کے لیے تیار ہو۔