شاہ تاج خان (پونے)

 اہم کتابوں جیسے دی لونلی پروفیٹ وی پی سنگھ، آزادیز ڈاٹر اور شاہین باغ اینڈ دی آئیڈیا آف انڈیا کی مصنفہ سیما مصطفیٰ 20 اپریل 1955 کو دہلی میں پیدا ہوئیں۔ وہ ایک معروف بھارتی صحافی اور کالم نگار ہیں جو اپنی بے باک صحافت اور سیاسی تجزیوں کے لیے جانی جاتی ہیں۔انہوں نے لکھنؤ یونیورسٹی سے سیاسیات میں بی اے کیا اور صرف 19 برس کی عمر میں لکھنؤ کے اخبار دی پاینیر سے اپنے پیشہ ورانہ کیریئر کا آغاز کیا۔ بعد ازاں انہوں نے صحافت میں اپنی ایک منفرد پہچان قائم کی۔

سیما مصطفیٰ نے 2014 میں اپنا ڈیجیٹل اخبار دی سٹیزن شروع کیا۔ اس وقت وہ آزاد صحافت کے فروغ اور خواتین کی آواز کو مضبوط بنانے پر توجہ مرکوز کیے ہوئے ہیں۔ ان کا ایک مقبول ویڈیو انٹرویو سلسلہ ویمن اونلی سیما مصطفیٰ یوٹیوب پر نشر ہوتا ہے، جس میں وہ خواتین کی زندگیوں اور ان کی جدوجہد کو اجاگر کرتی ہیں جنہوں نے سماج، سیاست، فن اور تعلیم میں نمایاں کردار ادا کیا ہے۔

اس پروگرام کی خاص بات یہ ہے کہ سیما مصطفیٰ کا انداز روایتی انٹرویو کے بجائے ایک دوستانہ گفتگو جیسا ہوتا ہے۔ وہ اپنے مہمانوں سے ان کے ذاتی تجربات اور کامیابی کے سفر پر کھل کر بات کرتی ہیں۔وہ اپنے پروگرام میں سماجی کارکنوں، فلم سازوں، سیاست دانوں، ادیبوں اور دیگر شخصیات کو مدعو کرتی ہیں، خاص طور پر ان خواتین کو جو نچلی سطح پر تبدیلی لانے میں فعال کردار ادا کر رہی ہوں۔

رپورٹنگ کی صلاحیت

چار دہائیوں سے زائد پر محیط صحافتی کیریئر میں سیما مصطفیٰ نے بیروت کی جنگ کی کوریج کی۔ انہوں نے کارگل جنگ کے دوران محاذ سے رپورٹنگ بھی کی جس پر انہیں 1999 میں پریم بھاٹیا ایوارڈ سے نوازا گیا۔ انہوں نے بھارت کے کئی معروف اخبارات اور ٹیلی ویژن اداروں میں اہم عہدوں پر خدمات انجام دیں۔ دی پاینیر سے آغاز کے بعد وہ دی پیٹریاٹ، دی انڈین ایکسپریس، دی ٹیلی گراف، دی ایشین ایج، نیوز ایکس اور دی سنڈے گارڈین میں مختلف ذمہ داریوں پر فائز رہیں۔ انہیں دی اکنامک ٹائمز کے ساتھ بھی کام کرنے کا موقع ملا۔ ان کے کالم بنگلورو کے ڈیکن کرانیکل اور پاکستان کے اخبار ڈان میں بھی باقاعدگی سے شائع ہوتے رہے۔ 2014 میں انہوں نے اپنا ڈیجیٹل اخبار دی سٹیزن شروع کیا جس کی وہ بانی مدیر ہیں۔

صحافت کی ذمہ داریاں اور مصروفیات

سیما مصطفیٰ کا ایڈیٹرز گلڈ آف انڈیا کے ساتھ تعلق بھی اہمیت رکھتا ہے۔ 2020 میں وہ اس ادارے کی پہلی منتخب صدر بنیں، اس سے قبل صدور کا انتخاب عموماً اتفاق رائے سے کیا جاتا تھا۔ اکتوبر 2022 میں انہیں بغیر مقابلہ ایک سال کے لیے دوبارہ صدر منتخب کیا گیا۔ اس کے علاوہ وہ سینٹر فار پالیسی اینالیسس کی ڈائریکٹر بھی ہیں۔ وہ مختلف آزاد یوٹیوب چینلز اور ویب سائٹس پر بطور مبصر اپنی موجودگی برقرار رکھے ہوئے ہیں۔

کتابیں

سیما مصطفیٰ کی کتابیں ان کے سیاسی اور سماجی مشاہدات، خاندانی تاریخ اور صحافتی تجربات کا مجموعہ ہیں۔ ان کی مشہور یادداشت آزادیز ڈاٹر 2017 میں شائع ہوئی جس میں انہوں نے ایک آزاد خیال مسلم گھرانے میں اپنی پرورش کی کہانی بیان کی۔ ان کی دوسری اہم کتاب دی لونلی پروفیٹ وی پی سنگھ سابق وزیر اعظم وی پی سنگھ پر ایک سیاسی یادداشت ہے جس میں ان کی شخصیت، فیصلوں اور کئی غیر معروف واقعات کا ذکر ہے۔ 2020 میں شائع ہونے والی کتاب شاہین باغ اینڈ دی آئیڈیا آف انڈیا میں انہوں نے مختلف اہل علم کی تحریروں کو یکجا کیا اور شاہین باغ احتجاج کو قلم بند کیا۔ ان کی دیگر معروف کتابوں میں دی اسکیم دی کور اپ اینڈ کمپرو مائز 1995 اور جرنلزم ایتھکس اینڈ ریسپانسبلٹیز 2013 شامل ہیں۔

صحافت پر تنقید

صحافت کی دنیا میں ان کی رائے کو اہمیت حاصل ہے۔ سیما مصطفیٰ کا کہنا ہے کہ صحافت کا کام اقتدار سے سوال کرنا ہے نہ کہ اس کی خوشامد کرنا۔ وہ اکثر بھارتی میڈیا پر تنقید کرتی ہیں اور کہتی ہیں کہ یہ نگہبان کے بجائے خوشامدی بن گیا ہے۔ جمہوریت کے بارے میں ان کا کہنا ہے کہ یہ صرف ووٹ ڈالنے کا نام نہیں بلکہ اختلافی رائے کو برداشت کرنے کا نام ہے۔ وہ نوجوان صحافیوں کو بار بار ترغیب دیتی ہیں کہ وہ ایونٹ مینجمنٹ کے بجائے فیلڈ رپورٹنگ پر توجہ دیں۔ اس وقت وہ اپنے ڈیجیٹل پلیٹ فارم دی سٹیزن اور دیگر ذرائع کے ذریعے بھارتی سیاسی، سماجی اور عالمی امور پر اداریے اور تنقیدی کالم لکھ رہی ہیں۔

 وژن اور تجربہ

لیفٹیننٹ کرنل سید مصطفیٰ کی پوتی اور معروف سماجی کارکن و راجیہ سبھا رکن انیس کدوائی کی نواسی سیما مصطفیٰ ایک منظم اور سیکولر ماحول میں پرورش پائیں۔ تقریباً نصف صدی پر محیط ان کا صحافتی سفر ہمت، جرات اور بے خوف صحافت کی ایک مثال ہے جو نئی نسل کے لیے مشعل راہ ہے۔ وہ بھارت میں آزاد اور غیر جانبدار صحافت کی ایک مضبوط آواز بنی ہوئی ہیں۔ آج بھی وہ اپنے پروگرام ویمن اونلی کے ذریعے معاشرے کے پسماندہ طبقات خصوصاً خواتین کی کہانیاں سامنے لا رہی ہیں۔ چاہے میدان جنگ کی رپورٹنگ ہو یا شاہین باغ کی سڑکوں سے اٹھنے والی آوازیں، انہوں نے ہمیشہ اپنی صحافتی ذمہ داریاں جرات اور بے خوفی سے ادا کیں۔ پرنٹ ہو یا الیکٹرانک میڈیا، وہ اپنے مؤقف کو مؤثر انداز میں پیش کرنے کی غیر معمولی صلاحیت رکھتی ہیں۔ سیما مصطفیٰ نے ثابت کیا ہے کہ صحافت صرف ایک پیشہ نہیں بلکہ ایک مشن ہے۔

سیما مصطفیٰ بے باک صحافت کی مضبوط آواز اور جمہوری اقدار کی علمبردارhttps://t.co/fcdcvJdBcG#india #women #Muslim pic.twitter.com/JYUfW6FLHZ

— Awaz-The Voice URDU اردو (@AwazTheVoiceUrd) April 28, 2026