رتنا جی چوٹرانی

کچھ کہانیاں صرف کھانوں کی نہیں ہوتیں، بلکہ وراثت، جذبے اور خوابوں کی خوشبو لیے ہوتی ہیں۔ ایسی ہی ایک کہانی حیدرآباد کی ملیحہ بیگ کی ہے، جنہوں نے روایتی تعلیم یا طویل پیشہ ورانہ شیفنگ تجربے کے بغیر بھی اپنے ہاتھوں سے وہ ذائقے زندہ کر دیے ہیں جو نظامِ حیدرآباد کے شاہی باورچی خانوں کی یاد دلاتے ہیں۔ ان کی کچن سے اٹھنے والی خوشبو صرف کھانے کی نہیں بلکہ تاریخ، ثقافت اور محبت کی علامت ہے۔

ملیحہ بیگ وہ ہوم شیف ہیں جن کے پاس باضابطہ تربیت تو نہیں، مگر وہ وہی خاندانی اور قدیم ترکیبیں رکھتی ہیں جو آج کے بڑے ہوٹلوں اور ریستورانوں کے لیے ایک قیمتی خزانہ سمجھی جاتی ہیں۔ ان کی کلاؤڈ کچن نے حیدرآباد کے کھانے کے منظرنامے میں ایک نئی روح پھونک دی ہے، جہاں روایت اور ذائقہ ایک ساتھ جیتے ہیں۔حیدرآباد میں ہوم شیف کلچر تیزی سے ابھرتا ہوا ایک رجحان ہے، جہاں گھروں کے چھوٹے کچن اب کاروبار، تخلیق اور محبت کا مرکز بن چکے ہیں۔ ملیحہ بیگ اس تبدیلی کی ایک نمایاں مثال ہیں، جو اپنے روایتی اندازِ پکوان کے ذریعے شہری کھانے کے ذوق کو بدل رہی ہیں۔

وہ حیدرآباد کے پوش علاقے بنجارہ ہلز میں رہتی ہیں، جہاں ایک طرف بلند و بالا ریستوران، کلب اور چمکتی عمارتیں ہیں، تو دوسری طرف ایک خاموش گلی میں ان کا گھر ہے جہاں سے شاہی ذائقوں کی خوشبو پھیلتی ہے۔ ان کی پہچان سادہ مگر گہری ہے۔ ان کے مینو میں حیدرآبادی شہر کی پوری روح سمائی ہوئی ہے  گلیوں کے اسٹریٹ فوڈ سے لے کر گھر کے روایتی پکوانوں اور مشہور ریستورانوں کے کلاسک ذائقوں تک۔ ملیحہ کے مطابق ہندوستان کے بڑے شہروں میں ہوم شیفس اب ریجنل فوڈ پاپ اپس کے ذریعے اپنی پہچان بنا رہے ہیں، اور وہ خود بھی تقاریب، لنچ اور ڈنر کے لیے روایتی گھر کے پکوان پیش کرتی ہیں۔

حیدرآبادی کھانا محض ذائقوں کا امتزاج نہیں بلکہ مغلیہ، ترکی، عربی اور تلگو روایات کا حسین سنگم ہے۔ اس کی بنیاد نظامِ حیدرآباد نے رکھی، جنہوں نے نہ صرف مختلف خطوں کے لوگوں کو یہاں بسایا بلکہ ان کے ذائقوں اور تہذیبوں کو بھی اس شہر کی شناخت بنا دیا۔ملیحہ بیگ نے اپنی 35 سالہ کامیاب تعلیمی اور کونسلنگ کیریئر کے بعد اپنی اصل محبت کھانا پکانے کی طرف رخ کیا۔ 2020 کے لاک ڈاؤن نے ان کی زندگی میں فیصلہ کن موڑ پیدا کیا، جب انہوں نے اپنے گھر کے کچن سے ہی نجی ڈنرز کا آغاز کیا۔ یہی تجربہ آگے چل کر ان کی کلاؤڈ کچن کی بنیاد بنا۔

وہ کہتی ہیں کہ نہ ہمارے پاس بڑے وسائل تھے، نہ ہم نے کبھی بیرونی سرمایہ کاری کا سہارا لیا۔ مگر ہمیں اپنے برانڈ، اپنے ذائقے اور اپنی محنت پر مکمل یقین تھا۔ اور یہی یقین آج ان کی کامیابی کی بنیاد ہے۔ ان کے خاص پکوانوں میں لکڑی کی آگ پر تیار کی جانے والی دم اسٹائل کچّے گوشت کی بریانی، دھیرے دھیرے پکایا جانے والا مزیدار حلیم، تااش کباب، شِکم پور، زعفرانی میٹھے اور خشک میوہ جات سے بھرپور لڈو شامل ہیں۔ ان کے پکوانوں میں زعفران، گھی، الائچی اور گلاب کی خوشبو ایک الگ ہی جادو جگاتی ہے۔